Adu ti saanen a makimismisa ta awan ti maaw-awatda a naespirituan a tulong wenno liwliwa. Apay ngarud a masapul nga umatenderka kadagiti Nakristianuan a gimong nga inyurnos dagiti Saksi ni Jehova? Ania ti manamnamam sadiay?

Maragsakanka a makikadua kadagiti nadungngo ken manangisakit a tattao. Idi umuna a siglo, dagiti Kristiano kadagiti kongregasion ket naggigimong tapno agdaydayaw iti Dios, agadal iti Kasuratan, ken agpipinnaregta. (Hebreo 10:24, 25) Naayat ti panaglalangenda kadagiti taripnongda isu a mariknada a kaduada dagiti pudno a gagayyem​—ti kakabsatda iti naespirituan. (2 Tesalonica 1:3; 3 Juan 14) Sursurotenmi ita dayta a pagtuladan isu a naragsakkami met kadagiti gimongmi.

Masursurom no kasano nga iyaplikar dagiti prinsipio ti Biblia. Kas idi panawen ti Biblia, dagiti lallaki, babbai, ken ubbing ket agkakadua met kadagiti gimongmi. Ti Biblia ti us-usaren dagiti kualipikado a mannursuro tapno tulongandakami a mangtarus no kasano nga iyaplikar dagiti prinsipiona iti inaldaw. (Deuteronomio 31:12; Nehemias 8:8) Mabalin a makipaset ti amin iti panagkanta ken kadagiti paset nga agkomento dagiti immatender. Gundawaytayo dayta tapno mayebkastayo ti Nakristianuan a namnamatayo.​—Hebreo 10:23.

Mapatibker ti pammatim iti Dios. Imbaga ni apostol Pablo iti maysa kadagiti kongregasion idi kaaldawanna: “Il-iliwek a makitakayo . . . tapno makapagpipinnaregtatayo iti pammati, dakayo ken siak.” (Roma 1:11, 12) Kadagiti gimongmi, ti regular a pannakilangen kadagiti kapammatianmi ti mangpatibker iti pammati ken determinasionmi nga agbiag kas Kristiano.

Kayatmo kadi a mapadasan dagita? Awisendaka iti sumaruno a gimongmi. Maragsakankami a mangpasangbay kenka. Libre ti amin a gimongmi​—awan ti maaramid a panagkolekta.

• Ania a pagtuladan ti sursurotenmi kadagiti gimongmi?

• Ania ti maitulong kadatayo ti iyaatender kadagiti Nakristianuan a gimong?

Regular a makigimgimongkami uray masapul a pagnaenmi dagiti nasamek a kabakiran wenno sarakusokenmi ti dakes a paniempo. Uray adda dagiti problemami ken mabambannogkami iti agmalem a trabaho, apay nga ikagkagumaanmi ti makikadua kadagiti kapammatianmi?

Pagsayaatanmi dayta. Insurat ni Pablo kadagiti miembro ti kongregasion: “Agpipinnanunottayo.” (Hebreo 10:24) Ti kaipapanan dayta a sao ket am-ammuentayo a naimbag ti maysa ken maysa. Parparegtaennatayo ngarud ti apostol a maseknantayo koma iti sabsabali. No am-ammuentayo ti dadduma a Kristiano a pamilia, maammuantayo a napagballigian ti dadduma kadakuada dagiti problema a kas kadagiti problematayo isu a matulongandatayo met nga agballigi.

Maaddaankami iti manayon a panaggagayyem. Kadagiti gimongmi, agtataripnongkami saan laeng a kas agaammo, no di ket kas grupo dagiti nasinged nga aggagayyem. No dadduma, agkakaduakami met iti nasayaat a paglinglingayan. Ania ti pagsayaatanna? Lalo a maapresiarmi ti tunggal maysa, ket umirut ti panagiinnayatmi. Natibker ti panaggagayyemmi isu a sidadaankami nga agtitinnulong no adda problema. (Proverbio 17:17) Babaen ti pannakikaduami kadagiti kakongregasionmi, ipakpakitami nga ‘agsisinnakitkami.’​—1 Corinto 12:25, 26.

Iparparegtami a makigayyemka kadagiti mangar-aramid iti pagayatan ti Dios. Masarakam dagiti kasta a gagayyem kadagiti Saksi ni Jehova. Dimo koma ipalubos nga adda lapped iti pannakikaduam kadakami.

• Apay a pagsayaatantayo ti pannakigimong?

• Kaano ti kayatmo a pannakigimong tapno maam-ammom dagiti kakongregasionmi?

No aggigimong idi dagiti nagkauna a Kristiano, agkantada, agkararag, agbasa iti Kasuratan, ken pagsasaritaanda dayta. Awan ti aramidenda nga aniaman a ritual. (1 Corinto 14:26) Kasta met laeng ti maar-aramid kadagiti gimongmi ita.

Dagiti maisursuro ket naibatay iti Biblia ken praktikal. Iti ngudo ti lawas, aggigimong ti tunggal kongregasion tapno dumngeg iti 30-minuto a palawag a naibatay iti Biblia a mangilawlawag nga adda pakainaigan ti Biblia iti biagtayo ken iti tiempo a pagbibiagantayo. Maiparparegta kadakami amin nga usarenmi ti Bibliami bayat ti palawag. Kalpasanna, adda maysa nga oras a Panagadal iti “Pagwanawanan.” Amin a miembro ti kongregasion ket mabalin a makiraman iti panangadal iti artikulo manipud iti pagadalan nga edision Ti Pagwanawanan. Daytoy ti tumulong kadakami a mangyaplikar kadagiti balakad ti Biblia. Agpapada ti artikulo nga adalen ti nasurok a 120,000 a kongregasionmi iti intero a lubong.

Matulongankami a mangpasayaat iti abilidadmi a mangisuro. Aggigimongkami met iti tengnga ti lawas para iti tallo ti pasetna a programa a napauluan iti Panagbiag ken Ministeriotayo kas Kristiano, a naibatay iti material iti binulan a Workbook iti Gimong a Panagbiag ken Ministerio. Ti umuna a pasetna ket Gameng Manipud iti Sao ti Dios. Tulongannakami dayta nga agbalin a pamiliar iti paset ti Biblia a nabasan a nasaksakbay ti kongregasion. Iti sumaruno a pasetna nga Agbalin a Mas Epektibo iti Ministerio, maipabuya no kasano nga ilawlawag ti Biblia iti sabsabali. Adda mamalbalakad a tumulong kadakami tapno sumayaat ti abilidadmi nga agbasa ken makisarita. (1 Timoteo 4:13) Iti maudi a pasetna a Panagbiag kas Kristiano, mailawlawag no kasano nga iyaplikar dagiti prinsipio ti Biblia iti inaldaw. Karaman iti dayta ti saludsod ken sungbat a panagadal a mangpauneg iti pannakaawatmi iti Biblia.

No umatenderka kadagiti gimongmi, sigurado a magustuam ti kalidad dagiti masursurom iti Biblia.​—Isaias 54:13.

• Ania ti namnamaem a mangngegmo kadagiti gimong dagiti Saksi ni Jehova?

• Ania kadagiti linawas a gimongmi ti kayatmonto manen nga atenderan?

Kadagiti ladawan iti daytoy a broshur, makitam kadi a desente ti bado dagiti Saksi ni Jehova no makigimongda? Apay a kasta ti panagbadbado ken panaglanglangami?

Tapno ipakitami ti panagraem iti Diosmi. Pudno a saan a ti makinruar a langa ti kitkitaen ti Dios. (1 Samuel 16:7) Ngem no aggigimongkami tapno agdaydayaw kenkuana, kayatmi la unay nga ipakita ti panagraem kenkuana ken kadagiti kapammatianmi. No sumangotayo iti hues iti korte, sigurado a kayattayo a nasayaat ti langatayo kas panagraem iti saadna. Umasping iti dayta, ipakita ti panaglanglangami a makigimong a raraemenmi “ti Ukom ti intero a daga,” a ni Jehova a Dios, ken ti lugar a pagdaydayawanmi kenkuana.​—Genesis 18:25.

Tapno maipakitami a nangato dagiti prinsipiomi. Iparparegta ti Biblia kadagiti Kristiano nga agbadoda “buyogen ti kinaemma ken kinasimbeng ti panunot.” (1 Timoteo 2:9, 10) Ti panagbado “buyogen ti kinaemma” kaipapananna ti saan a panagbado kadagiti makaatrakar unay, nakipet, nakiting, wenno makagargari. Ti met ‘nasimbeng a panunot’ ti tumulong kadakami nga agpili kadagiti napintas ken nanakman a bado a saan a nagarbo unay. Uray adda dagita a prinsipio, adu latta ti estilo ti bado a mabalin a pagpilian. Ti makaay-ayo ken nasayaat a panaglanglangami ‘arkosanna ti sursuro ti Manangisalakantayo’ ken ‘idaydayawna ti Dios.’ (Tito 2:10; 1 Pedro 2:12) No desente ti panagbadbadomi kadagiti gimong, maipakitami iti sabsabali no ania ti rumbeng a panangmatmatda iti panagdaydayaw ken Jehova.

Uray awan ti pormal a badom, dika agbain a makigimong. Saan met a kasapulan a nangina wenno nagarbo ti badotayo. Ti napateg ket maitutop, nadalus, ken presentable dayta.

• Kasano kapateg ti panagbadbadomi no agdaydayawkami iti Dios?

• Ania dagiti prinsipio a sursurotenmi iti panagbadbado ken panaglanglangami?

No iyad-adalannaka iti Biblia ti maysa kadagiti Saksi ni Jehova, mabalin nga agsagsaganaka sakbay ti panagadalyo. Tapno magunggonaanka a naimbag, nasayaat no kasta met ti aramidem sakbay a makigimongka. Nasaysayaat pay no regular nga aramidem dayta.

Ammuem no kaano ken sadinoka nga agadal. Kaano a mas maisentrom ti panunotmo nga agadal? Iti bigbigat, sakbay a rugiam dagiti trabahom, wenno iti rabii, no nakaturogen dagiti ubbing? Uray no agadalka iti apagbiit, mangikeddengka iti oras a panagadalmo, ken dimo ipalubos nga adda makaistorbo. Agadalka iti naulimek a lugar, iddepem ti radio, TV, ken selpon tapno awan ti makasinga. Agkararagka sakbay nga agadalka tapno malipatam dagiti pakadanagam ket maisentrom ti panunotmo iti Sao ti Dios.​—Filipos 4:6, 7.

Markaam ti adalem ken agisaganaka iti sungbat. Kitaem ti pakabuklan ti adalem. Panunotem ti paulo ti artikulo wenno kapitulo ken ti koneksion ti tunggal subtitulo iti kangrunaan a tema. Kitaem dagiti ladawan ken dagiti pangrepaso a saludsod a mangipaganetget kadagiti kangrunaan a punto. Kalpasanna, basaem ti tunggal parapo, ken birokem ti sungbat ti saludsod. Kitaem ken basaem dagiti nadakamat a teksto, ken panunotem no ania ti koneksionda iti ad-adalem. (Aramid 17:11) No nabirokam ti sungbat ti saludsod, ugedam wenno markaam ti sumagmamano a napateg a sasao iti parapo a mangipalagip kenka iti sungbat. Inton gimong, mabalinmo nga itayag ti imam no kayatmo ti agkomento iti ababa iti bukodmo a sasao.

No linawas nga agsaganaka para kadagiti gimong, ti ‘pagidulinam iti gameng’ ket manayonam kadagiti baro a pannakaammo maipapan iti Biblia.​—Mateo 13:51, 52.

• Ania nga eskediul ti nasayaat a surotem nga agsagana kadagiti gimong?

• Kasanoka a makapagsagana nga agkomento iti gimong?

Manipud pay idi un-unana, kayat ni Jehova nga agkakadua ti tunggal pamilia tapno pabilgenda ti relasionda kenkuana ken relasionda a sangapamiliaan. (Deuteronomio 6:6, 7) Gapuna, linawas nga adda eskediul dagiti Saksi ni Jehova nga agdaydayaw kas pamilia, tapno nawayada a mangadal iti naespirituan a bambanag a maibagay iti kasapulanda. Uray no maymaysam, mabalinmo latta nga usaren dayta a tiempo para iti Dios. Mabalinmo ti mangpili iti topiko iti Biblia a kayatmo nga adalen.

Tiempo dayta nga agbalin a nasingsinged ken Jehova. “Umasidegkayo iti Dios, ket umasidegto kadakayo.” (Santiago 4:8) Iti naisurat a Saona, ad-adda a maam-ammotayo ni Jehova no adalentayo dagiti detalye maipapan iti personalidadna ken kadagiti aramidna. Ti nalaka a pamay-an a panangirugi iti panagdaydayaw ti pamilia ket ti napigsa a panagbasa iti Biblia a sangsangkamaysa, a nalabit surotenyo ti linawas nga eskediul ti Gimong a Panagbiag ken Ministerio. Adda paset a basaen ti tunggal miembro ti pamiliayo sa pagsasaritaanyo dagiti nasursuroyo manipud iti Kasuratan.

Tiempo dayta a mangpasinged iti relasion ti pamilia. Tumibker ti relasion dagiti agassawa, ken dagiti nagannak ken annak, no agadalda iti Biblia a sangapamiliaan. Dayta ket masapul a naragsak, natalna, ken segseggaan ti intero a pamilia iti tunggal lawas. Depende iti edad dagiti ubbing, mabalin a mangpili dagiti nagannak kadagiti praktikal a topiko nga adalenda, a nalabit usarenda dagiti paset Ti Pagwanawanan ken Agriingkayo! wenno ti website-tayo a jw.org. Mabalin a pagsasaritaanyo ti problema dagiti annakyo iti eskuelaan ken no kasano a masolbar dayta. Mabalin a buyaenyo ti maysa a programa iti JW Broadcasting (tv.jw.org) sa pagsasaritaanyo kalpasanna. Mabalinyo met a praktisen dagiti makanta iti gimong ken agmeriendakayo kalpasan ti panagdaydayaw ti pamilia.

Daytoy nga espesial a tiempo kada lawas para iti panagdaydayaw ken Jehova a sangapamiliaan ket makatulong iti amin a miembro a maragsakan a mangadal iti Sao ti Dios. Sigurado a sibabaknang a bendisionan ni Jehova dagiti panagreggetyo.​—Salmo 1:1-3.

• Apay nga iyeskediultayo ti panagdaydayaw ti pamilia?

• Ania ti aramiden dagiti nagannak tapno naragsak ti panagadalda kas pamilia?

Apay a nagraragsak dagiti tattao iti daytoy a ladawan? Ngamin, umat-atenderda iti maysa kadagiti asambleami. Naibilin kadagiti agserserbi iti Dios idi un-unana nga agtataripnongda iti mamitlo iti makatawen. Kas kadakuada, magagarankami met nga umatender iti dadakkel a taripnong. (Deuteronomio 16:16) Kada tawen, umat-atenderkami iti tallo a dadakkel nga okasion: dua nga asamblea sirkito a saggaysa nga aldaw ken ti tallo nga aldaw a rehional a kombension. Ania ti maitulong dagita kadakami?

Patibkerenda ti panagkakabsatmi kas Kristiano. Kas kadagiti Israelita a naragsakan a mangidaydayaw ken Jehova “kadagiti asamblea,” maragragsakankami met nga agdaydayaw a sangsangkamaysa kadagiti espesial nga okasion. (Salmo 26:12, footnote; 111:1) Kadagita a taripnong, adda gundawaymi a makiam-ammo ken makilangen kadagiti Saksi a naggapu iti dadduma a kongregasion wenno pagilian. Iti pangngaldaw, agkakaduakami a mangan iti pagasambleaan isu nga agbalin a naragragsak dagitoy a naespirituan nga okasion. (Aramid 2:42) Kadagita nga asamblea a mariknami a mismo ti ayat a namagkaykaysa kadakami ‘amin nga agkakabsat’ iti intero a lubong.​—1 Pedro 2:17.

Tulongandakami a rumang-ay iti naespirituan. Gapu ta nailawlawag ti Kasuratan kadagiti Israelita, “naawatanda ti naipakaammo kadakuada.” (Nehemias 8:8, 12) Ap-apresiarenmi met dagiti pannursuro iti Biblia a maad-adalmi kadagiti asambleami. Ti tema ti tunggal programa ket naibatay iti maysa a teksto iti Biblia. Babaen kadagiti makapainteres a palawag, simposium, ken demostrasion, masursuromi no kasano nga aramiden ti pagayatan ti Dios. Maparegtakami met no mangngegmi dagiti kapadasan ti kakabsatmi a nakapagtalinaed a matalek iti laksid dagiti nakaro a pannubok. Kadagiti rehional a kombension, adda dagiti mabuya a drama maipapan kadagiti salaysay iti Biblia ken mangisuro kadakami kadagiti praktikal a leksion. Iti tunggal asamblea, mabautisaran dagidiay mangisimbolo iti dedikasionda iti Dios.

• Apay a dagiti asamblea ket naragsak nga okasion?

• Ania ti maitulong kenka ti iyaatendermo iti asamblea?

Kinuna ni Jesus sakbay ti ipapatayna: “Ti naimbag a damag maipapan iti Pagarian maikaskasabanto iti intero a daga tapno maammuan ti amin a nasion; kalpasanna, umayton ti panungpalan.” (Mateo 24:14) Ngem kasano a maaramid daytoy a sangalubongan a trabaho a panangasaba? Babaen ti panangsurot iti ulidan ni Jesus idi adda ditoy daga.​—Lucas 8:1.

Ikagkagumaanmi a kasarita dagiti tattao iti balbalayda. Sinanay ni Jesus dagiti adalanna a mangikasaba iti naimbag a damag iti binalaybalay. (Mateo 10:11-13; Aramid 5:42; 20:20) Adda naited a teritoria a pangasabaan dagiti ebanghelisador idi umuna a siglo. (Mateo 10:5, 6; 2 Corinto 10:13) Kasta met la ita. Organisado met ti trabahomi a panangasaba, ken adda naited a teritoria a pangasabaan ti tunggal kongregasion. Iti kasta, ad-adu pay a tattao ti madanonmi agingga a posible tapno maitungpalmi ti bilin ni Jesus a “mangasabakami kadagiti tattao.”​—Aramid 10:42.

Ikagkagumaanmi a kasarita dagiti tattao iti sadinoman nga ayanda. Inyulidan met ni Jesus ti panangasaba kadagiti tattao iti publiko a lugar, kas iti igid ti baybay wenno iti abay ti bubon. (Marcos 4:1; Juan 4:5-15) Kasaritami met dagiti tattao maipapan iti Biblia iti sadinoman a pakasarakanmi kadakuada​—kadagiti lansangan, lugar ti negosio, parke, wenno babaen ti telepono. Kaskasabaanmi met dagiti kaarruba, katrabahuan, kaklase, ken kabagianmi no adda maitutop a gundaway. Gapu kadagitoy amin a panagreggetmi, minilion a tattao iti intero a daga ti nakangngegen iti ‘naimbag a damag ti panangisalakan.’​—Salmo 96:2.

Adda kadi mapanunotmo a kayatmo a pangibagaan iti naimbag a damag maipapan iti Pagarian ti Dios ken no ania ti epekto dayta a damag iti masakbayanda? Dimo bukbukodan daytoy a mensahe a mangted iti namnama. Iranudmo daytoy kadakuada iti kabiitan a panawen agingga a mabalin!

• Ania a “naimbag a damag” ti masapul a maiwaragawag?

• Kasano a tultuladen dagiti Saksi ni Jehova ti ulidan ni Jesus iti panangasaba?

Ti termino a “payunir” masansan a tukoyenna dagidiay mangtaktakuat kadagiti baro a teritoria ken manglukat iti dalan a suroten ti dadduma. Ni Jesus ket kas iti payunir, ta naibaon ditoy daga tapno itungpalna ti ministerio a makaited iti biag ken nangilukat iti gundaway para iti pannakaisalakan. (Mateo 20:28) Kas ken Jesus, us-usaren met dagiti pasurotna ita ti adu a tiempoda tapno ‘pagbalinenda nga adalan’ dagiti tattao. (Mateo 28:19, 20) Adda pay ketdi dagiti makipaspaset iti aw-awaganmi a panagserbi kas payunir.

Ti payunir ket agserserbi kas amin-tiempo nga ebanghelisador. Amin a Saksi ni Jehova ket agibumbunannag iti naimbag a damag. Ngem adda dagiti nangikeddeng nga agserbi kas regular pioneer. Kada bulan, 70 nga oras a mangasabada. Tapno maaramidda daytoy, adu ti agtrabtrabaho laeng iti part-time. Adda met dagiti napili nga agserbi kas special pioneer kadagiti lugar nga agkasapulan iti ad-adu a mangikasaba iti Pagarian. Kada bulan, 130 nga oras wenno ad-adu pay a mangasabada. Kontento dagiti payunir iti simple a biag. Agtalekda nga ipaay ni Jehova dagiti kangrunaan a kasapulanda. (Mateo 6:31-33; 1 Timoteo 6:6-8) Dagidiay saan a makapagpayunir iti amin a tiempo ket mabalin nga agserbi kas auxiliary pioneer no kabaelanda. Mangasabada iti 30 wenno 50 nga oras iti makabulan.

Ti maysa a payunir ket agserserbi gapu iti ayatna iti Dios ken kadagiti tattao. Kas ken Jesus, makitkitami ita ti kakaasi a kasasaad dagiti tattao iti naespirituan. (Marcos 6:34) Ngem adda ammomi a makatulong kadakuada itan ken mangted kadakuada iti sigurado a namnama iti masanguanan. Ti ayat iti kaarruba ti mangtigtignay iti maysa a payunir a mangusar iti tiempo ken pigsana a tumulong kadagiti tattao iti naespirituan. (Mateo 22:39; 1 Tesalonica 2:8) Gapu iti dayta, tumibtibker ti pammatina, sumingsinged iti Dios, ken naragragsak isuna.​—Aramid 20:35.

• Ania ti payunir?

• Ania ti mangtigtignay iti dadduma nga agpayunir iti amin a tiempo?

Nabayagen a napateg kadagiti Saksi ni Jehova ti nadiosan nga edukasion. Adda dagiti espesial nga eskuelaanmi a nairanta kadagiti mangikaskasaba iti Pagarian iti amin a tiempo tapno ‘naan-anay a maitungpalda ti ministerioda.’​—2 Timoteo 4:5.

Pioneer Service School. No makatawenen ti maysa kas regular pioneer, isu ket mairaman iti innem nga aldaw a panageskuela a mabalin a maangay iti Kingdom Hall. Panggep dayta a tulongan ti payunir nga agbalin a nasingsinged ken Jehova, agbalin a mas epektibo iti amin a paset ti ministerio, ken agtultuloy iti matalek a panagserbina.

School for Kingdom Evangelizers. Nairanta daytoy dua a bulan a panageskuela a mangsanay kadagiti aduan-kapadasan a payunir a situtulok a mapan iti sadinoman a pakaibaonanda. Kasda la ibagbaga, “Adtoyak! Ibaonnak!” kas panangtulad iti katan-okan nga Ebanghelisador a nagserbi ditoy daga, ni Jesu-Kristo. (Isaias 6:8; Juan 7:29) Iti adayo a pakaibaonanda, nalabit kasapulan a makibagayda iti nasimsimple a biag, naiduma unay a kultura, klima, ken taraon. Nalabit nasken pay nga agsursuroda iti baro a lengguahe. Tultulongan daytoy nga eskuelaan dagiti babbaro, babbalasang, ken agassawa, nga agtawen iti 23-65, a mangpasayaat kadagiti naespirituan a kualidad a kasapulan iti annongenda ken abilidad a makatulong tapno ad-adda a mausar ida ni Jehova ken ti organisasionna.

Watchtower Bible School of Gilead. Iti Hebreo, “Bunton a Pangsaksi” ti kaipapanan ti “Gilead.” Manipud idi nangrugi ti Gilead idi 1943, nasuroken a 8,000 a nagturpos ti naibaon kas misionero tapno mangasaba “agingga kadagiti ungto ti daga” ket nakabalballigida. (Aramid 13:47) Idi damo a simmangpet iti Peru dagiti nagturpos iti Gilead, awan pay kongregasion sadiay, ngem nasurok itan a 1,000. Idi nangrugi nga agserbi dagiti misioneromi idiay Japan, awan pay 10 ti Saksi, ngem ita, nasuroken a 200,000. Ti lima a bulan a panageskuela iti Gilead ramanenna ti detalyado a panagadal iti Sao ti Dios. Dagiti special pioneer wenno misionero, agserserbi kadagiti sanga nga opisina, wenno manangaywan iti sirkito ket maawis iti daytoy nga eskuelaan tapno masanayda a naimbag a tumulong a mangpabileg ken mangpatibker iti sangalubongan a trabaho.

• Ania ti panggep ti Pioneer Service School?

• Siasino dagiti mabalin nga ageskuela iti School for Kingdom Evangelizers?