Naibaon ni Pablo Idiay Roma

Idiay Jerusalem ti naudi a napanan ni Pablo bayat ti maikatlo a panagbibiahena tapno mangasaba. Naaresto ken naibalud sadiay. Iti maysa a rabii, imbaga ni Jesus kenkuana babaen iti sirmata: ‘Mapankanto idiay Roma ket mangasabaka sadiay.’ Naipan ni Pablo idiay Cesarea ket naibalud iti dua a tawen. Idi us-usigen ni Gobernador Festo ti kasona, imbaga ni Pablo: ‘Kayatko a ni Cesar ti mangukom kaniak idiay Roma.’ Imbaga ni Festo: “Nagapelarka ken Cesar; mapankanto ken Cesar.” Nailugan ni Pablo iti barko nga agpa-Roma. Kaduana ti dua a kakabsat a da Lucas ken Aristarco.

Idi addada iti baybay, adda simmangpet a napigsa a bagyo ket bimmayag iti adu nga aldaw. Impagarupda amin a mataydan. Ngem kinuna ni Pablo: ‘Kakadua, imbaga kaniak ti maysa nga anghel iti tagtagainep: “Dika agbuteng, Pablo. Makadanonkanto idiay Roma, ken awanto ti maan-ano kadakayo.” Dikay agbuteng! Saantayo a matay.’

Bimmayag ti bagyo iti 14 nga aldaw. Idi kuan, makitkitadan ti isla ti Malta. Naisadsad ti barko ket nadadael, ngem natalged a nakadanon iti isla ti 276 a nakalugan iti barko. Naglangoy ti dadduma ken kimpet ti dadduma kadagiti narakrak a paset ti barko. Inasikaso ida dagiti taga-Malta ken nangpasgedda iti apuy a pagpapudotda.

Kalpasan ti tallo a bulan, inlugan dagiti soldado ni Pablo iti sabali a barko nga agpa-Roma. Idi nakasangpet ni Pablo, napan sinabat dagiti kakabsat. Idi nakitana ida, nagyaman ken Jehova ken pimmigsa ti pakinakemna. Uray balud ni Pablo, napalubosan nga agyan iti maab-abangan a balay a bambantayan ti maysa a soldado. Dua a tawen a nagyan sadiay. Adda dagiti bimmisbisita kenkuana ket inkasabana kadakuada ti maipapan iti Pagarian ti Dios ken insurona ti maipapan ken Jesus. Sinursuratan met ni Pablo dagiti kongregasion iti Asia Menor ken Judea. Talaga nga inusar ni Jehova ni Pablo a mangikasaba iti naimbag a damag kadagiti nasion.