“Umay Koma ti Pagariam”

Inkari ni Jehova: ‘Awanton ti panagsangit, ut-ot, sakit, wenno ipapatay. Punasekto ti amin a lua kadagiti matada. Saanton a maipalagip ti amin a dakes a napasamak iti napalabas.’

Pinagyan ni Jehova da Adan ken Eva iti hardin ti Eden tapno agbiagda a natalna ken naragsak. Masapul nga agdayawda iti nailangitan nga Amada ken punnuenda ti daga kadagiti annakda. Nagsukir da Adan ken Eva ken ni Jehova, ngem saan a nagbaliw ti panggep ni Jehova. Nakitata iti daytoy a libro a matungpal ti amin a kari ti Dios. Mangipaayto ti Pagarianna kadagiti nagsasayaat a bendision ditoy daga, kas iti inkarina ken Abraham.

Din agbayag, mapukawton ni Satanas, dagiti demoniona, ken ti amin a dakes a tattao. Amin a sibibiag dayawendanton ni Jehova. Saantayton nga agsakit wenno matay. Agriingtayton kada bigat a napigsa ken naragsak. Agbalinton a paraiso ti daga. Addanton naimas a makan ken natalged a balay para iti amin. Nasingpetton dagiti tattao, saan a naulpit wenno naranggas. Saandatayton a kabuteng dagiti atap nga animal ken saantayto metten a mabuteng kadakuada.

Nakaragragsaktayto inton pagungaren ni Jehova dagiti natay. Sabatentayto dagiti tattao a nagbiag idi, kas kada Abel, Noe, Abraham, Sara, Moises, Ruth, Ester, ken David. Kaduatayto ida a mamagbalin iti daga a paraiso. Adunto ti makaparagsak a trabaho nga aramidentayo.

Kayat ni Jehova nga addakanto sadiay. Nakaad-adunto pay ti maammuam maipapan kenkuana. Ikagumaantayo koma ti agbalin a nadekdekket ken Jehova iti tunggal aldaw, ita ken iti agnanayon!