Ti Maudi a Pangrabii ni Jesus

Kada tawen, selselebraran dagiti Judio ti Paskua iti maika-14 nga aldaw ti bulan ti Nisan. Dayta ti mangipalagip kadakuada no kasano ida nga inruar ni Jehova idiay Egipto a nakaadipenanda ket impanna ida iti Naikari a Daga. Idi tawen 33 C.E., sinelebraran ni Jesus ken dagiti apostolna ti Paskua iti makinngato a kuarto ti maysa a balay idiay Jerusalem. Idi malmalpasdan a mangan, kinuna ni Jesus: ‘Maysa kadakayo ti mangtraidorto kaniak.’ Nakigtot dagiti apostol, ket insaludsodda: ‘Asino?’ Imbaga ni Jesus: ‘Isu daydiay pangtedak iti daytoy a tinapay.’ Idi kuan, inikkanna ni Judas Iscariote iti tinapay. Dagus a timmakder ni Judas ket pimmanaw.

Kalpasanna, nagkararag ni Jesus, pinisipisina ti tinapay, sa intedna kadagiti nabatbati nga apostolna. Imbagana: ‘Kanenyo daytoy a tinapay. Isimbolo daytoy ti bagik nga itedko para kadakayo.’ Kalpasanna, inkararaganna ti arak, sa intedna kadagiti apostolna. Kinunana: ‘Inumenyo daytoy nga arak. Isimbolo daytoy ti darak nga itedko tapno mapakawan dagiti basol. Ikarik a kaduakayto nga agbalin nga ari idiay langit. Tinawen nga aramidenyo daytoy kas panglaglagip kaniak.’ Agingga ita, tinawen a selselebraran dagiti pasurot ni Jesus dayta a rabii. Maawagan dayta ita iti Pangrabii ti Apo.

Idi nakapangrabiidan, nagriririan dagiti apostol no asino kadakuada ti kangatuan. Ngem imbaga ni Jesus: ‘Ti kangatuan kadakayo ket daydiay mangibilang iti bagina a kaubingan ken kababaan.

‘Gagayyemkayo. Ibagak kadakayo ti amin a kayat ni Amak nga ibagak. Dandaniakon agsubli ken Amak idiay langit. Mabatikayo ditoy, ket maammuanto dagiti tattao a dakayo dagiti adalak gapu iti ayatyo iti maysa ken maysa. Masapul nga ayatenyo ti maysa ken maysa kas iti panagayatko kadakayo.’

Kalpasanna, inkararag ni Jesus ken Jehova a protektaranna ti amin nga adalanna. Indawatna ken Jehova a tulonganna ida nga agkaykaysa nga agtrabaho. Inkararagna a madaydayaw koma ti nagan ni Jehova. Kalpasanna, nagkankanta ni Jesus ken dagiti apostolna iti pammadayaw ken Jehova sada rimmuar. Dandani idin maaresto ni Jesus.