ASTAROT

Siudad iti rehion ti Basan, kadawyan a maikunkuna ita nga isu ti Tell ʽAshtarah nga agarup 32 km (20 mi) iti daya ti Baybay ti Galilea. Ti nababa a turod sadiay ket nalikmut iti nasayaat-pannakapadanumna a tanap. Ipasimudaag ti naganna a mabalin a sentro idi dayta ti panagdaydayaw iti diosa a ni Astoret.

Ti kaaduan a panangtukoy ti Biblia iti dayta ket mainaig ken higante nga Ari Og ti Basan, a nadakamat kas agturturay “iti Astarot, idiay Edrei.” (De 1:4; Jos 9:10; 12:4; 13:12) Ti naparmek a teritoria ti pagarian ni Og ket dati a naited kadagiti Maquirita iti tribu ni Manases, ngem idi agangay nayallawat ti Astarot kadagiti Gersonita kas siudad dagiti Levita. (Jos 13:29-31; 1Cr 6:71) Iti Josue 21:27, a tumupag iti salaysay iti 1 Cronicas 6:71, ti siudad ket naawagan iti Beestera.

Ti siudad ket natukoy kadagiti kitikit ti Asiria ken iti Amarna a Taptapi.​