SUPOT TI TARAON

Maysa a supot, gagangay a naaramid iti lalat, nga inyabaday dagiti agdaldaliasat, papastor, mannalon, ken dadduma pay. Naaramat dayta a pagikabilan iti taraon, pagan-anay, ken dadduma pay, ngem naiduma dayta iti basbassit a supot a barikes a nakaikabilan ti sinsilio a balitok, pirak, ken gambang. (Mt 10:9; Mr 6:8) Di pagduaduaan a ti “supot ti pastor” a kukua ni David ket maysa a supot ti taraon. (1Sm 17:40) Idi imbaon ni Jesu-Kristo ti 12 nga apostol ken kalpasanna ti 70 nga adalan tapno mangasabada iti Israel, imbagana kadakuada a saanda a mangawit kadagiti supot ti taraon. (Mt 10:5, 9, 10; Lu 9:3; 10:1, 4) Ipaayto ni Jehova dagiti kasapulanda babaen iti im-ima dagiti padada nga Israelita gapu ta kaugalianda idi ti agpadagus. Sakbay ti ipapatay ni Jesus, kinunana nga agbaliwto dagiti kasasaad kas resulta ti opisial nga ibubusor, isu nga imbagana kadagiti adalanna a mangitugotda iti supot ti kuarta ken supot ti taraon. Nupay kasta, masapul a sapulenda nga umuna ti Pagarian ti Dios imbes a maringgoranda kadagiti material a kasapulanda; iti kasta pampaneknekanda nga agpampannurayda ken Jehova a Dios nga aywananna ida iti ministerioda.​—Lu 22:35, 36; Mt 6:25-34.