BEEROT

[Dagiti Bubon].

Maysa kadagiti uppat a siudad dagiti Heveo a nainsiriban a nangyurnos iti maysa a tulag ken Josue, a ti lallaki ti siudad ti Gabaon ti nalawag a nangidaulo itoy a banag. (Jos 9:3-17) Kalpasan dayta, ti siudad ket nairaman iti uneg ti tawid ti tribu ni Benjamin. (Jos 18:21, 25) Idi nadeskribir ti panangpapatay ti lallaki manipud Beerot iti anak ni Saul a ni Is-boset, naikuna a “ti met Beerot maibilbilang idi kas paset ti Benjamin.” Mabalin nga ipasimudaag daytoy a ti siudad ket asideg iti ketegan ti maysa a kabangibang a tribu, gapuna masapul a dakamaten a mismo ti tribu a makinteritoria iti ayanna. (2Sm 4:2-6) Nadakamat ti panagtalaw dagiti agtataeng iti dayta nga agturong idiay Gittaim, ngem saan a nailawlawag ti rason; mabalin a gapu kadagiti panangrubbuot dagiti Filisteo kalpasan ti panagballigida maibusor kadagiti puersa ni Saul idiay Bantay Gilboa, wenno mabalin a napasamak dayta kalpasan ti pannakapapatay ni Is-boset, a nagtalawda tapno saanda ida a balsen gapu iti dayta a panangpapatay. Nupay kasta, kalpasan ti pannakaidestiero idiay Babilonia, nailista ti lallaki ti Beerot a karaman kadagidiay nagsubli iti daga ti Juda.​—Esd 2:1, 25; Ne 7:29.

Nupay kunaen ti sumagmamano nga isu dayta ti Khirbet el Burj wenno Nabi Samwil iti abagatan, kuna ti dadduma nga isu ti el Bira, maysa a kabangibang nga ili ti agdama a Ramallah, a masarakan iti agarup 14 km (9 mi) iti amianan ti Jerusalem ken agarup 8 km (5 mi) iti amianan nga amianan-a-daya ti Gabaon, adda ngarud iti asideg ti beddeng ti Efraim. Adda ubbog sadiay a mangipapaay iti umdas nga abasto a danum. Ipasimudaag dagiti nabatbati a pagilasinan ti kadaanan a pagdagusan a dayta ket pagsardengan idi dagiti sangkakuyogan a managbiahe.