SIUDAD TI PAPADI

Luglugar iti Naikari a Daga a nailasin kas disso a pagnaedan maipaay iti Aaroniko a papadi ken ti pampamiliada. Kadagiti 48 a siudad a naited iti tribu ni Levi manipud dadduma a tribu ti Israel, 13 ti naituding iti Cohatita a papadi iti pamilia ni Aaron. (Jos 21:1-42; 1Cr 6:54-81) Dagiti tribu da Juda ken Simeon nangtedda kadakuada iti siam a siudad ket uppat ti inted ti tribu ni Benjamin. Gapuna, “amin dagiti siudad ti annak ni Aaron, ti papadi, sangapulo ket talloda a siudad ken dagiti pagpaarabanda.” (Jos 21:4, 9-19) Dagitoy a siudad ket Hebron (maysa a siudad a pagkamangan), Libna, Jattir, Estemoa, Holon (mabalbalin a Hilen), Debir, Ain (Asan), Jutta, Bet-semes, Gabaon, Geba, Anatot, ken Almon (Alemet), nga amin dagitoy, malaksid iti Jutta ken Gabaon, ket naulit a nainaganan iti 1 Cronicas 6:54-60.

Idi tiempon nga ipan ni David ti lakasa ni Jehova idiay Jerusalem, nangipatulod iti bilin kadagiti papadi iti nadumaduma a siudadda nga aguummongda a sangsangkamaysa. (1Cr 13:1-5) Ket espesipiko a natukoy ti pannakadutok dagiti lallaki nga agibunong kadagiti naikontribusion a bingay maipaay kadagiti papadi a kakabsatda nga agnanaed kadagiti siudad ti papadi bayat ti panagturay ni Ari Ezekias.​—2Cr 31:11-19.