PALLOKA
Daplak a suelas a lalat, kayo, wenno sabali pay nga aduan-binggas a banag a maisingdan iti saka babaen kadagiti sintas a gagangay a ginisgis a lalat a mayusok iti nagbaetan ti tangan ken ti maikadua a ramay ti saka, sa maipalikmut iti mukod, ken iti rabaw ti saka. No dadduma, dumanon pay ti sintas iti likmut ti palaypalay.
Dagiti Egipcio a palloka ket gagangay a timmangad iti sango. Ti sumagmamano nga Asirio a palloka ket addaan laeng iti suelas iti batog ti mukod ken pingir ti saka, a naikapet iti saka babaen ti sintas ken awan suelasna iti batog ti makinsango a dapan ti saka. Nagpalloka dagiti Romano ken naikuna met a nagsapatosda iti umasping kadagiti maar-aramat iti agdama. Nagaramat iti nagargarbo a palloka wenno sinanbotas a sapatos dagiti natatan-ok ken agtuturay nga Asirio, Romano, ken dadduma pay. Ti sumagmamano a Bedouin iti aglawlaw ti Bantay Sinai agar-aramatda kadagiti palloka a naaramid iti lalat ti maysa a kita ti dugong (kasla foka nga animal iti baybay). Agsao ni Jehova maipapan iti piguratibo a panangsapatosna iti Jerusalem iti “lalat ti foka” (Heb., taʹchash).—Eze 16:10.
Naikuna a sakasaka ti papadi ti Israel no agserbida idi iti tabernakulo ken iti templo. (Idiligyo ti Ex 3:5; Jos 5:15; Ara 7:33.) Ngem ti sakasaka a panagpagnapagna iti ruar ket pagilasinan ti ladingit wenno nakaay-ay-ay a kasasaad.—2Sm 15:30; Isa 20:2-5; ipadisyo ti bilin ken Ezequiel (24:17, 23).
Iti nawatiwat a panagbaniaga, kaugalianda idi ti mangitugot iti kanayonan a paris ti palloka, ta amangan no marunot dagiti suelas ti palloka wenno mapugsat dagiti sintasna. Idi imbaon ni Jesus dagiti apostol, ken uray idi imbaonna dagiti 70 nga adalan, binilinna ida a saanda a mangitugot iti dua a paris ti palloka no di ket agtalekda ti iburay dagidiay mangawat iti naimbag a damag.—Mt 10:5, 9, 10; Mr 6:7-9; Lu 10:1, 4.
Piguratibo nga Usar. Iti sidong ti Linteg, uksoten ti maysa a balo a babai ti palloka ti lalaki a nagkedked a mangitungpal iti “agkayong a pannakiasawa” kenkuana, ket mapanaganan ti lalaki iti pangumsi nga awag a “Ti balay daydiay nauksot ti pallokana.” (De 25:9, 10) Ti panangyawat ti maysa a tao iti pallokana iti sabali kaipapananna ti panangitedna kenkuana iti sanikuana wenno iti kalinteganna a mangsaka.—Ru 4:7-10; kitaenyo ti AGKAYONG A PANNAKIASAWA.
Idi kinuna ni Jehova nga ‘ipalladawkonto ti pallokak iti Edom’ (Sal 60:8; 108:9) mabalin a kayatna a sawen a maiturayanto ti Edom. Posible a nainaig daytoy iti kaugalian a panangipalladaw ti maysa a tao iti pallokana iti sangadisso a daga kas pangipasimudaag iti panangtagikuana iti dayta. Wenno, mabalin nga ipamatmat dayta ti panangumsi iti Edom, ta ti Moab ket naawagan “bakka a pagbugguak” iti isu met laeng a teksto. Idiay Makintengnga a Daya ita, ti panangipalladaw iti palloka ket mangipasimudaag iti panangumsi.
Ni David binilinna ni Solomon a dusaenna ni Joab, ta “inkabilna ti dara ti gubat . . . kadagiti pallokana” bayat ti tiempo ti talna—piguratibo a sasao a mangirepresentar iti panagbasol ni Joab iti dara gapu iti panangpapatayna kada Heneral Abner ken Heneral Amasa. (1Ar 2:5, 6) Dagita a sasao, ken uray met ti punto a no nagpallokan ti maysa a tao adda aramidenna iti ruar ti pagtaenganna (wenno iti sadinoman a pagnanaedanna; idiligyo ti Ara 12:8), ipakitada ti kayat a sawen ti pammagbaga ni apostol Pablo kadagiti Kristiano a ‘sapatosanda dagiti sakada iti alikamen ti naimbag a damag ti kappia.’—Efe 6:14, 15.
Naibilang a nanumo nga aramid ti panangwarwar kadagiti galut ti palloka ti sabali a tao wenno ti panangawit kadagiti pallokana, nga isu ti masansan a trabaho idi dagiti adipen. Daytoy ti inaramat ni Juan a pangiladawan iti kinanumona no idilig ken Kristo.—Mt 3:11; Mr 1:7.