SENAA

Nasurok a 3,000 nga “annak ni Senaa” ti nagsubli a kadua ni Zorobabel idi 537 K.K.P. manipud pannakaidestiero idiay Babilonia. (Esd 2:1, 2, 35; Ne 7:38) Ni Senaa mabalin nga isu met laeng ni Hassenaa, nagan nga addaan iti Hebreo a piho a pangtukoy a ha(s).​—Ne 3:3.

Nalawag a luglugar imbes a tattao ti adu kadagiti nagan a nailanad iti listaan ti Esdras 2 ken Nehemias 7, iti kasta pagarupen ti dadduma a ti Senaa ket lugar nga amiananen laeng ti Jerico, a dinakamat da Eusebius ken Jerome nga adda maysa a torre sadiay a naawagan “Magdalsenna.” (Onomasticon, 154, 16, 17) Nupay saan a sigurado, naikuna nga isu ti Khirbet al Beiyudat (Horvat ʼel-Beidat), agarup 11 km (7 mi) iti amianan nga amianan-a-daya ti Jerico.