PATANGTANGDANAN A TRABAHADOR
Maysa a maikkan iti tangdan gapu iti panagtrabahona, ngem naiduma iti maysa nga adipen.
Kinalikaguman ti Linteg a ti kakasta a trabahador ket mabayadan iti tunggal ngudo ti aldaw a panagtrabaho. (Le 19:13; De 24:14, 15) Idi umuna a siglo K.P., agparang a napagsaritaanen dagiti tangdan sakbay pay a mangrugi nga agtrabaho dagiti trabahador, a 12 nga oras ti kaatiddog ti panagtrabaho, manipud agarup alas sais ti bigat agingga iti alas sais ti rabii, a ti gagangay a tangdan dagiti trabahador iti kaubasan iti maysa nga aldaw ket nabatad a maysa a denario (74 a sentimo ti U.S.). (Mt 20:1-13) Ti panangtukoy ti Kasuratan kadagiti “tawen ti patangtangdanan a trabahador” ipasimudaagna a naikeddeng met ti kapaut ti tulagan, wenno kontrata, ti panagtrabaho.—Isa 16:14; 21:16.
Nabatad a di nakugit ti adu kadagiti patangtangdanan a trabahador iti Israel, ta imbilin ti Linteg a saanda a makiraman iti Paskua, nupay mabalin a makipaset dagiti nakugit nga adipen yantangay naibilangda kas kameng ti Israelita a pamilia. Kasta met, nupay dagiti patangtangdanan a trabahador ti maysa a padi ket saan a mabalin a mangan kadagiti nasantuan a banag, saan a naparitan dagiti nakugit nga adipen agsipud ta talaga a kamengda ti sangakabbalayan ti padi.—Ex 12:43-45; Le 22:10, 11.
No ti maysa nga Israelita kasapulan nga ilakona ti bagina tapno agpaadipen iti padana nga Israelita, wenno iti ganggannaet nga agnanaed (maysa a makipaggigian wenno kameng ti pamilia ti ganggannaet nga agnanaed) gapu ta nagbalin a narigat ti kasasaadna, masapul a saan a matrato a siuulpit no di ket maipakitaan iti konsiderasion a kasla iti patangtangdanan a trabahador. Kalpasanna, no saanna a kabaelan a sakaen ti bagina, mawayawayaan manipud pannakaadipen inton maikapito a tawen ti pannakaadipenna wenno iti tawen a Jubileo, aniaman ti umuna a dumteng.—Ex 21:2; Le 25:39, 40, 47-49, 53; De 15:12; kitaenyo ti ADIPEN.
No dadduma naabusar dagiti patangtangdanan a trabahador iti im-ima dagiti amoda. Babaen ken mammadto Malakias, impakdaar ni Jehova nga agbalin a nasiglat a saksi maibusor kadagidiay mangkuskusit kadagiti tangdan ti makitegtegged.—Mal 3:5; kitaenyo met ti San 5:4; ABANG, SUPAPAK, TANGDAN.
Gagangay a ti patangtangdanan a trabahador ket magagaran a makakita iti panagngudo ti aldaw ti panagtrabaho ken umawat kadagiti tangdanna. (Job 7:1, 2) Masansan a saan unay a maseknan iti pagimbagan ti amona, kas ipakita ti sasao ni Jesu-Kristo nga itedna ti kararuana maigapu kadagiti karnero kas Nasayaat a Pastor, saan a kas iti patangtangdanan a tao nga agtalaw no adda peggad.—Jn 10:11-15; kitaenyo met ti Jer 46:21.