SAGRADO A MUNMON

Ti Hebreo a termino a kasta ti pannakaipatarusna kangrunaanna a tumukoy iti maysa a banag a naipatakder wenno naisaad. Nabatad a dayta ket sinanmabagbagi ti lalaki kas simbolo ni Baal wenno, no dadduma, dagiti sabali pay nga ulbod a didios. (Ex 23:24; 2Ar 3:2; 10:27) Iti nadumaduma a disso idiay Makintengnga a Daya, nasarakan dagiti nakapatakder a munmon a bato nga awan ti nalawag a pakaaramatan ti pannakaipatakderda. Ti pannakatakuat kadagitoy agraman dagiti kadaanan nga alikamen a nainaig iti relihion ipasimudaagna a sagrado a munmon dagitoy. Di natikapan ti sumagmamano kadagitoy ken addaan iti katayag a 1.8 m (6 pie) wenno nasursurok pay.

Sakbay ti iseserrekda iti Naikari a Daga, naibilin kadagiti Israelita a saanda a mangipatakder iti aniaman a sagrado a munmon ket rugpuen wenno burakenda dagiti addan a sagrado a munmon dagiti Canaanita. (Ex 34:13; Le 26:1; De 12:3; 16:22) Ti pamay-an a panangdadael kadagitoy ipasimudaagna a nalabit naaramid dagitoy iti bato. Nupay kasta, iti 2 Ar-ari 10:26, nadakamat ti panangpuor kadagiti sagrado a munmon, a mangipasimudaag a ti sumagmamano ket naaramid iti kayo. Iti daytoy a kaso, nupay kasta, mabalin a ti matuktukoy isu ti sagrado a teddek, wenno Asera.​—Kitaenyo ti SAGRADO A TEDDEK.

Saan nga inkankano ti Israel dagiti nabatad a pammakdaar ti Dios a naited babaen ken Moises. Ti teritoria ti pagarian ti Juda ken ti teritoria ti sangapulo-tribu a pagarian napno kadagiti sagrado a munmon. (1Ar 14:22, 23; 2Ar 17:10) Nupay kasta, dagiti matalek nga ar-ari ti Juda, kas kada Asa, Ezekias, ken Josias, tinukkotukkolda ken rinumekda dagiti sagrado a munmon (2Ar 18:4; 23:14; 2Cr 14:3), ket idi inkisap ni Jehu ti panagdaydayaw ken Baal manipud sangapulo-tribu a pagarian, narugpo ti sagrado a munmon ni Baal.​—2Ar 10:27, 28.