ENOS

[Mortal a Tao].

Ti anak ni Set, a nayanak kenkuana idi agedad iti 105. Agtawen ni Enos iti 90 idi pinutotna ni Quenan, ket agdagup iti 905 a tawen ti panagbiagna. (Ge 5:6-11) Nailista met ti naganna iti listaan dagiti kapuonan iti 1 Cronicas 1:1 ken Lucas 3:38. Idi kaaldawanna, “narugian ti iyaawag iti nagan ni Jehova.” (Ge 4:26) Nalawag a saan nga iyaawag daytoy ken Jehova buyogen ti pammati ken nadalus a panagdaydayaw kas iti inaramid ni Abel nasurok a 105 a tawen sakbay ti pannakayanak ni Enos. Ti sumagmamano nga eskolar iti Hebreo iruprupirda nga iti daytoy a teksto mailanad koma ti “nangrugi a sitatabbaaw,” wenno “idin nangrugi ti panagtabbaaw.” Mainaig iti kaaldawan ni Enos, kunaen ti Targum ti Jerusalem: “Dayta idi ti kaputotan nga idi kaaldawanda rinugianda ti agbasol, ken inyaramidanda ti bagbagida kadagiti idolo ket pinanagananda dagita iti nagan ti Sao ti Apo.” Mabalin nga impanagan dagiti tattao ti nagan ni Jehova iti bagbagida wenno iti sabali a tattao, a babaen kadakuada nagin-aadanida iti Dios tapno agdayaw; wenno, no saan, impanaganda ti naganna kadagiti idoloda.