PURIM
Ti piesta a maramrambakan iti maika-14 ken maika-15 ti Adar, ti maudi a bulan ti tawen dagiti Judio, katupag ti maudi a paset ti Pebrero ken nasapa a paset ti Marso; naawagan met iti Piesta dagiti Panagbunot. (Est 9:21) Dayta a nagan ket nagtaud iti tignay ni Haman a panangaramid iti pur (panagbunot) tapno masinunuo ti mainugot nga aldaw a panangipatungpal iti sikat a panangtalipupos kadagiti Judio. Yantangay maysa nga Agageo, nalabit naarian nga Amalekita, ken managdaydayaw kadagiti pagano a didiosen, daytoy ti inaramatna kas “maysa a kita ti panagpadles.” (Est 3:7, Le, ftn; kitaenyo ti BINNUNOT, PANNAKA-BUNOT; PANAGPADLES; PUR.) Iti maika-12 a tawen ni Ari Asuero (Xerxes I), iti Nisan 13, mabalbalin nga iti primavera ti 484 K.K.P., ti opisial a bilin a panangtalipupos, nga inanamongan ti ari gapu iti pananguyot ni Haman, ket naisagana maipaay iti amin a probinsia ti Persia, a mangibilbilin iti pannakadadael dagiti Judio.
Pannakalaglagip ti Pannakaispal. Ti piesta ipalagipna ti pannakaispal dagiti Judio manipud pannakadadael nga insikat ni Haman. Gapuna, ti nagan a Purim ket nalabit impaay dagiti Judio gapu iti pannakabaliktad ti paspasamak. (Est 9:24-26) Iti Macabeo, a libro ti Apokripa, naawagan met dayta iti “aldaw ni Mardokeo,” yantangay napateg ti akem ni Mardokeo kadagiti pasamak a nainaig iti dayta a piesta. (2 Macabeo 15:36, AT) Naispal dagiti Judio gapu kadagiti panagregget ni Reyna Ester, a nangirisguanna pay ketdi iti biagna ken kas imbilin ti laklakay a kasinsinna a ni Mardokeo. Nagayunar ni Ester iti tallo nga aldaw sakbay a nagkiddaw a dumatag iti ari tapno awisenna iti maysa a bangkete, ken kalpasanna iti maikadua a bangkete a mabalin a pakaidatagan ti dawatna. (Est 4:6–5:8) Naipangag ken naanamongan ti dawatna, ket yantangay saan a mabalin a baliwan ti orihinal a bilin maigapu iti di mabalusingsing a linteg dagiti Medo ken Persiano (Da 6:8), sabali pay a bilin ti nairuar idi maika-23 nga aldaw ti Sivan. Daytoy a dokumento impaayanna dagiti Judio iti kalintegan a mangikanawa iti bagbagida ken nangted kadakuada iti gundaway nga agsagana. Ni Mardokeo ti nangisurat iti dayta ket naipatarus iti adu a pagsasao agpaay iti nadumaduma a distrito ti Imperio ti Persia. Nakirupak dagiti Judio—babaen iti tulong dagiti prinsipe, satrapa, ken gobernador—ket naan-anay a nabaliktad ti kasasaad maibusor kadagiti kabusor a gumurgura kadagiti Judio. Napasamak ti dakkel a pananggudas idi Adar 13, saan kadagiti Judio, no di ket kadagiti kabusorda. Nagtultuloy dayta iti naarian a siudad ti Susan agingga iti maika-14. Iti maika-14 nga aldaw ti Adar, naginana dagiti Judio nga adda kadagiti masaksakupan a distrito, ken dagidiay adda idiay Susan iti maika-15 nga aldaw, buyogen ti panagdadaya ken panagragrag-o.—Est 8:3–9:19.
Tapno malaglagip daytoy a pannakaispal, impaalagad ni Mardokeo kadagiti Judio ti pannakarambak ti Adar 14 ken 15 iti tunggal tawen buyogen ti “panagdadaya ken panagragrag-o ken panagipatulod kadagiti bingay iti maysa ken maysa ken iti sagsagut kadagiti napanglaw a tattao.” (Est 9:20-22) Idi agangay, naisurat ti sabali pay a surat nga addaan iti pammatalged ni Ester a reyna, a mangibilbilin iti pannakarambak daytoy a piesta. Maangay dayta iti tunggal kaputotan, iti tunggal pamilia, masaksakupan a distrito, ken siudad iti naituding a tiempo iti tunggal tawen.—Est 9:28-31; kitaenyo ti ESTER, LIBRO TI.
Agingga kadagitoy nga aldaw, daytoy a piesta ket ramrambakan pay laeng dagiti Judio maitunos iti amin a detalyena, ngem adun ti nainayon. Ti maysa kadagiti tradision a nainayon bayat ti panaglabas ti panawen isu ti pannakaituding ti maika-13 nga aldaw ti Adar kas aldaw a panagayunar, naawagan Panagayunar ni Ester. Saan a naiparit ti panaglako wenno panagbannog bayat daytoy a piesta.
Supiat Mainaig iti Juan 5:1. Awan ti direkta a pannakadakamat ti Piesta ti Purim iti Kristiano a Griego a Kasuratan. Adda dagiti mangibagbaga a natukoy dayta iti Juan 5:1: “Kalpasan dagitoy a banag adda idi piesta dagiti Judio, ket ni Jesus simmang-at idiay Jerusalem.” Nupay kasta, awan ti pammaneknek a ti Piesta ti Purim ti pakayaplikaran daytoy a bersikulo. Ti sumagmamano a manuskrito addaanda iti piho a pangtukoy, a kadagita mabasa: “ti piesta dagiti Judio.” (Kitaenyo ti Rbi8 ftn.) Ipasimudaag daytoy a maysa la ketdi dayta kadagiti tallo a nadaeg a naipanapanawen a piesta a nailanad iti Deuteronomio 16:16, nangnangruna no imutektekantayo a simmang-at ni Jesus idiay Jerusalem, a saanna koma a kasapulan nga aramiden ti kasta no ti Piesta ti Purim ti maramrambakan idi. Ti Purim ket ad-adda a nainaig iti lokal a sinagoga ken iti lokal a lugar imbes nga iti templo; marambakan idi ti piesta iti siudad nga ayan ti taeng ti maysa. Imposible met nga agdaliasat ni Jesus a magmagna agingga idiay Jerusalem ket kalpasanna pumanaw manen nga agturong idiay Galilea, a makabulan laengen sakbay ti Paskua. Kanayonanna pay, no ti maysa akseptarenna ti panangmatmat a ti Juan 5:1 tumukoy iti Purim ket ti Juan 6:4 tumukoy iti Paskua a maaramid kalpasan ti maysa a bulan, imposible a mapagraragup ti adu a pasamak iti daytoy ababa a periodo, ta iramanna ti ministerio ni Jesus idiay Capernaum, dagiti panagdaliasatna idiay Galilea, ken ti isusublina idiay Capernaum ken idiay Judea ken Jerusalem. (Kitaenyo ti JESU-KRISTO [Tsart ti Kangrunaan a Paspasamak iti Biag ni Jesus Ditoy Daga].) Ngarud, adda rason iti panamati a ti “piesta dagiti Judio” iti Juan 5:1 ket, iti kinapudnona, piesta ti Paskua ti 31 K.P.—Kitaenyo ti JESU-KRISTO (Pammaneknek iti tallo ket kagudua a tawen a ministeriona).
Panggep. Nupay kunaen ti sumagmamano a komentarista a ti Piesta ti Purim a ramrambakan dagiti Judio iti agdama nga aldaw ket ad-adda a sekular imbes a narelihiosuan ken no dadduma mapakuyogan iti panaglablabes, saan a kasta ti kasasaad daytoy idi tiempo ti pannakayussuatna ken ti immuna a pannakarambakna. Da Mardokeo ken Ester agpadpadada nga adipen ti pudno a Dios a ni Jehova, ket naipasdek ti piesta kas panangidayaw Kenkuana. Ti pannakaispal dagiti Judio iti daydi a tiempo maikuna a gapuanan ni Jehova a Dios, agsipud ta timmaud ti isyu gapu iti kinatarnaw ni Mardokeo mainaig iti naipamaysa a panagdaydayawna ken Jehova. Nalabit Amalekita ni Haman, a ti nasionna espesipiko nga inlunod ken kinondenar ni Jehova maipaay iti pannakadadael. Rinaem ni Mardokeo ti bilin ti Dios ket nagkitakit nga agruknoy ken Haman. (Est 3:2, 5; Ex 17:14-16) Kasta met, ti sasao ni Mardokeo ken Ester (Est 4:14) ipasimudaagna nga isu nanginanama iti nangatngato a pannakabalin maipaay iti pannakaispal dagiti Judio, ket ti panagayunar ni Ester sakbay a napan iti sanguanan ti ari tapno idatagna ti orihinal a dawatna, a dayta ket awis iti maysa a bangkete, impasimudaagna ti panagpatulongna iti Dios.—Est 4:16.