BANNAGAW

[Heb., tin·sheʹmeth].

Ti nagan daytoy a reptilia nairaman kadagiti “agpangpangen a parsua” a “narugit” iti sidong ti Mosaiko a Linteg. (Le 11:29, 30) Ti nagan ket naikuna a naadaw iti na·shamʹ, ramut a sao a kaipapananna ti “aganangsab.” (Idiligyo ti Isa 42:14.) Da Koehler ken Baumgartner, iti panangidilig iti Arabiko, isingasingda ti “managbang-es” kas kaipapananna. (Lexicon in Veteris Testamenti Libros, Leiden, 1958, p. 1035) Nupay saan a masigurado ti pakabigbigan dayta, ti nagan mabalin nga agaplikar iti bannagaw. Ti kadawyan a Chamaeleo chamaeleon masansan a masarakan idiay Egipto ken Palestina.

Ti bannagaw ket nainayad nga aggargaraw, agnanaed-iti-kayo nga alibut a pagaammo gapu iti pannakabaelna a mamagbaliwbaliw iti marisna. Ti marisna nangnangruna a pagbaliwen ti temperatura, kinaraniag ti lawag, ken emosional a kasasaadna.

Iti Levitico 11:18 ti isu met laeng a Hebreo a sao mayap-aplikar iti kalamon kas maysa kadagiti “narugit” nga agtatayab.