SIKLO

Ti ar-aramaten dagiti Hebreo a kangrunaan a rukod ti dagsen (1Sm 17:5, 7; Eze 4:10; Am 8:5) ken gatad ti kuarta. Maibatay iti promedio a kadagsen ti agarup 45 a nakitikitan a siklo a padagsen, mapattapatta a 11.4 g (0.403 oz avdp; 0.367 oz t) ti timbang ti maysa a siklo. Ti maysa a siklo katupagna ti 20 a gera (Nu 3:47; 18:16), ket adda pammaneknek a ti 50 a siklo katupagna ti maysa a mina. (Kitaenyo ti MINA.) Maibatay iti agdama a gatad, mapattapatta a ti maysa a siklo a pirak ket aggatad iti $2.20, ket ti maysa a siklo a balitok, $128.45.

Masansan a natukoy ti siklo mainaig iti pirak wenno balitok. (1Cr 21:25; Ne 5:15) Sakbay ti pannakaaramat dagiti sinsilio, dagiti kapisi a pirak (manmano unay a balitok) ti nausar kas kuarta, a matimbang dagitoy iti tiempo ti transaksion. (Ge 23:15, 16; Jos 7:21) No dadduma, ti bambanag a nainaig iti tabernakulo ket nadakamat maibatay iti siklo “iti siklo ti nasantuan a disso.” (Ex 30:13; Le 5:15; 27:2-7, 25) Mabalin a naaramat daytoy tapno maipaganetget a ti dagsen dagita ket rumbeng nga eksakto, wenno nalabit rumbeng a mayataday iti maysa a pagrukodan iti dagsen nga adda iti tabernakulo.

Pagarupen ti kaaduan a dagiti “kapisi a pirak” a masansan a nadakamat iti Hebreo a Kasuratan ket siklo a pirak, ti kadawyan a yunit ti kuarta. (Uk 16:5; 1Ar 10:29; Os 3:2) Pasingkedan daytoy ti Septuagint (a ti naaramat a Griego a sao maipaay kadagiti ‘kapisi a pirak’ iti Genesis 20:16 ket isu met laeng ti Griego a sao maipaay iti “siklo” iti Genesis 23:15, 16) kasta met dagiti Targum. Sigun iti Jeremias 32:9, “pito a siklo ken sangapulo a kapisi a pirak” ti imbayad ti mammadto maipaay iti maysa a talon. Nalabit legal a pormula laeng daytoy a kaipapananna ti 17 a siklo a pirak (AS, Da, NE, RS), wenno mabalbalin a kaipapananna ti pito a balitok a siklo ken sangapulo a siklo a pirak.

Ti 2 Samuel 14:26 mabalin nga ipasimudaagna nga adda idi “naarian” a siklo a naiduma iti gagangay a siklo, wenno mabalin a ti matuktukoy ket ti maysa a pagrukodan iti dagsen nga adda iti naarian a palasio.