ABDIAS, LIBRO TI
Ti kaababaan a naimpadtuan a libro ti Hebreo a Kasuratan. Insurat ni Abdias (a maipapan kenkuana awanen ti ammo no di ti naganna), daytoy a libro naglaon iti waragawag maipapan ti panangukom ni Jehova maibusor iti Edom, idatagna ti makagapu iti dayta a panangukom, ken ipatuldona ti masanguanan a pannakaisubli maipaay iti “balay ni Jacob.” Ti pannakaungaw dagiti Edomita kas maysa nga ili ken ti pannakaisubli dagiti Israelita iti dagada pasingkedanda ti umiso a kaitungpalan ti padto ni Abdias.—Abd 17, 18; kitaenyo ti EDOM, DAGITI EDOMITA.
Naipaay daytoy a padto gapu iti ‘di nainkabsatan’ a panangtrato dagiti Edomita “iti annak ni Juda” idi a dagiti “annak ni Juda” naglak-amda iti pannakaabak. Babaen iti inapoda a ni Esau, dagiti Edomita adda pannakikabagianda kadagiti Israelita. Nagrag-oan dagiti Edomita ti pannakadidigra ti Juda, nakipasetda iti panagala iti samsam manipud kadagiti Judio, ket linapdanda ida nga agtalaw manipud iti daga, nga inyawatda pay ketdi ida iti kabusor. (Abd 12-14) No ti padto ni Abdias ket idilig iti sasao da Jeremias (25:15-17, 21, 27-29; 49:7-22) ken Ezequiel (25:12-14; 35:1-15), nabatad a napasamak daytoy mainaig iti pannakadadael ti Jerusalem babaen kadagiti buyot ti Babilonia ket, ngarud, mabalin nga idi agarup tawen 607 K.K.P. ti pannakaputar ti libro.
Yantangay adu kadagiti banag a naipadto iti padto ni Abdias ket naipadto met iti libro ni Jeremias, daytoy pinaminduana ti kinasigurado ti pannakatungpal ti sao ni Jehova maipapan iti Edom.—Idiligyo ti Ge 41:32.
[Kahon iti panid 20]
DAGITI TAMPOK TI ABDIAS
Ti panangukom ni Jehova maibusor iti Edom ken ti kari a pannakaisubli maipaay iti ili ni Jehova
Naisurat idi agarup 607 K.K.P., ti tawen a dagiti taga Babilonia pinaglangalangda ti Jerusalem
Ti paset ti Edom iti kinaranggas a naaramid kadagiti kaputotan ni Jacob
Idi naparmek ti Jerusalem ken idi a dagiti umilina ket maiturturong iti pannakakautibo, nagpaspasuli lattan ti Edom (ber 10, 11)
Saanna a rebbeng a siraranggas a nagrag-oan ti pannakadidigra ti Juda, a nakipaset iti panangsamsam iti ili ti Dios ket dagiti nakalasat inyawatna iti kabusor (ber 12-14)
Ti didigra dumtengto iti Edom
Ni Jehova awaganna dagiti nasion a tumakderda maibusor iti Edom iti bakal (ber 1)
Iti laksid ti kasla natalged a saadna, maipababanto ti Edom (ber 2-4)
Dagiti mannanakaw wenno agan-ani alaenda laeng ti kaykayatda ket mangiteddada; inton matnag ti Edom, naan-anayto a masamsaman; allilawento dagidiay nakitulaganna, ket dagiti masirib ken nabileg a tattaona aglak-amdanto iti pannakadadael (ber 5-9)
Ti balay ni Esau umawatto iti isu met laeng a kita ti pannakatrato a kas iti inaramidna iti Juda; maawanto ti balay ni Esau (ber 15, 18)
Maisublinto ti balay ni Jacob
Ti Sion agbalinto a nasantuan; ti balay ni Jacob isunto ti apuy a mangibus iti balay ni Esau a kasla punget ti garami (ber 17, 18)
Ti naisubli nga ili ni Jehova tagikuaendanto “ti bambanag nga ikutanda,” agraman “ti nakabambantay a rehion ni Esau” (ber 19, 20)
Ti kinaari agbalinto a kukua ni Jehova (ber 21)