PAGPESPESAN
Kagawaan a pakapespesan ti bunga tapno rummuar ti tubbogna. Yantangay ti panagburas iti olibo ket sumaruno iti panagburas iti ubas, masansan a ti naaramat a pagpespesan iti tubbog ti ubas isu met laeng ti naaramat a pagpespesan iti lana ti olibo, nupay naaramat met kadagiti olibo ti sinan-adigi a pagladditan.
Dagiti kadawyan a pagpespesan ket kaaduanna nga addaan iti dua a narabaw a sinanlababo nga abut a naikungkong iti natural nga apug a bato, a makinngato a paset ket kumamang iti makimbaba a paset babaen iti bassit a tubong. (Nu 18:27, 30; 2Ar 6:27) Dagiti ubas wenno dagiti olibo ket maibaddebaddek wenno mapespes iti makinngato a lungog (gath, Ne 13:15), iti kasta agayus dagiti tubbog babaen iti grabidad nga agturong iti makimbaba a tangke (yeʹqev, Uk 7:25; Pr 3:10; Joe 2:24; Hag 2:16). Agparang dagita a dua a termino iti Joel 3:13: “Umaykayo, sumalogkayo, ta napnon ti pagpespesan iti ubas [gath]. Dagiti tangke [ha·yeqa·vimʹ, pangadu a porma ti yeʹqev] a pagpespesan pudno nga aglippiasda.” Nalawag a ti termino a yeʹqev naaramat met mainaig kadagiti pagpespesan a maymaysa ti lungogda, a pakaibaddebaddekan dagiti ubas ken pakaurnongan metten ti tubbogda. (Job 24:11; Isa 5:2; 16:10; Jer 48:33) Nasalsalog ti lansad dagitoy a pagpespesan ngem iti kadawyan a pagpespesan a dua ti lungogna, tapno maurnong ti tubbog iti nababbaba a pasetna. No atiddog ken akikid ti pagpespesan, kas iti maysa a kalasugan, naawagan dayta iti pu·rahʹ. (Isa 63:3; Hag 2:16) Dakamaten met ti Kristiano a Griego a Kasuratan ti maipapan iti pagpespesan iti ubas (le·nosʹ, Mt 21:33), kasta met ti “tangke a pagpespesan iti ubas” (hy·po·leʹni·on, Mr 12:1).
Adda nasarakan a kasta a pagpespesan iti ubas, a ti makinngato a lungogna ket 2.4 m (8 pie) ti kuadrado a kalawana ken 38 cm (15 pul.) ti kaunegna. Ti basbassit a tangke, a nababbaba iti agarup 0.6 m (2 pie), nga isu ti pagturongan ti tubbog, ket 1.2 m (4 pie) ti kuadrado a kalawana ken 0.9 m (3 pie) ti kaunegna. Kasta a pagpespesan ti ubas ti inaramat ni Gideon a nangirikanna iti trigona.—Uk 6:11.
Saksaka laeng wenno nadagsen a batbato ti gagangay a naaramat a panglusak kadagiti bunga kadagitoy a pagpespesan. Dua agingga iti pito wenno ad-adu pay nga agibaddek ti agkakadua iti pagpespesan. Makapainteres ngarud a kinuna ni Isaias a ti Naindaklan a Manangibaddek, ni Jehova, agibaddekto nga is-isuna iti kalasugan ti arak. (Isa 63:3) Adda naibaribar nga awanan iti ngatuen ti ul-ulo dagiti agibaddek, nga isu ti nakaigalutan dagiti aguy-uyaoy a tali a pagkaptan dagiti lallaki. Mamansaan idi dagiti makinngato a kawes dagiti manangibaddek no agparsiak ti “dara dagiti ubas.” (Ge 49:11; Isa 63:2) Nupay adu a bannog ti kasapulan bayat ti panawen ti panagpespes, gagangay a naragsak dayta a tiempo; ti sirarag-o a panagpukkaw wenno panagdir-i, ken panagkakanta ket nakatulong tapno agbabansag ti panagibaddekda. (Uk 9:27; Jer 25:30; 48:33) Ti pannakaaramat ti termino nga “iti Gittith” (naipatarus a “pagpespesan iti ubas” iti Griego a Septuagint ken iti Latin a Vulgate) iti paulo ti tallo a Salmo (8, 81, 84) ipakitana a dagita a kanta ket mabalin a nainaig iti panagburas iti ubas.
Piguratibo nga Usar. Adda sumagmamano a Nainkasuratan a pagarigan a ti pagpespesan iti ubas ket natukoy a piguratibo ti kaipapananna. (Isa 63:2, 3; Un 1:15) Inton aldaw ni Jehova nga isu ti pannakaummong dagiti bunggoy iti nababa a tanap ti pangngeddeng, maibilinto: “Mangiparaspaskayo iti kumpay, ta ti anien naluomen. Umaykayo, sumalogkayo, ta napnon ti pagpespesan iti ubas. Dagiti tangke a pagpespesan pudno nga aglippiasda; ta ti kinadakesda immadu.” (Joe 3:13, 14) Umasping iti dayta, nasirmata ni Juan “ti ubas ti daga” a naipuruak “iti dakkel a pagpespesan iti ubas ti unget ti Dios,” a sadiay a naipayatpayat agingga a “rimmuar ti dara a kas kangato dagiti pangngednged kadagiti kabalio” manipud iti pagpespesan iti ubas. Daydiay naawagan “Matalek ken Napudno,” “Ti Sao ti Dios,” isunto ti agipayatpayat iti daytoy a pagpespesan ti ubas ti “kinaunget ti pungtot ti Dios a Mannakabalin-amin.”—Apo 14:19, 20; 19:11-16.