PIHAHIROT
Ti maudi a lugar a nagpakarsuan dagiti Israelita sakbay a bimmallasiwda iti Nalabaga a Baybay. (Nu 33:7, 8) Kalpasan a nagpakarsoda idiay “Etam iti igid ti let-ang” (Ex 13:20), immawat ni Moises kadagiti bilin manipud ken Jehova a Dios nga “agsublida ket agpakarsoda iti sanguanan ti Pihahirot iti nagbaetan ti Migdol ken ti baybay a matannawagan ti Baal-zefon.” (Ex 14:1, 2) No ammo laeng koma ita ti ayan ti Migdol ken Baal-zefon, saan koma a narigat nga ibaga no sadino ti ayan ti Pihahirot. Nupay kasta, saan a masinunuo ita ti ayan dagitoy a lugar ken agbaliwbaliw ken saan pay a sigurado ti maibagbaga nga ayanda a lugar iti igid ti makindaya a pagbedngan ti nagkauna nga Egipto. Gapu itoy, agparang a ti kasayaatan a pangibatayan iti pamalatpatan no sadino ti ayan ti Pihahirot ket ti sumagmamano a lugar a nadakamat iti salaysay.
Adda ti Pihahirot iti maysa a disso iti asideg ti Nalabaga a Baybay a dayta laengen ti kakaisuna a ruta a lumasatan tapno malisian dagiti dumardarup a puersa dagiti Egipcio. Ti baybay iti dayta a disso ket apag-isu ti kaadalemna tapno ‘mabisngay’ ti dandanumna ken mapagnaan ti “tengnga ti baybay,” a ti dandanum nagbalinda a kas “pader” iti agsumbangir a sikigan. (Ex 14:16, 21, 22) Awan ti kastoy a disso iti amianan ti Gulpo ti Suez. Pudno nga adu a moderno nga eskolar ti umanamong iti teoria a bimmallasiw dagiti Israelita iti ababaw a Bitter Lakes, a mangrugi agarup 25 km (16 mi) iti amianan ti Suez. Ngem sigun iti daytoy a teoria, bimmallasiwda saan a gapu iti naaramid a milagro (nga ibagbagada a ti binallasiwda ket maysa laeng nga aluguog wenno lutulot) wenno dimmanon iti Bitter Lakes ti nagkauna a makin-amianan nga ungto ti Nalabaga a Baybay ken ad-adalem idi ti danum sadiay, nupay paneknekan ti arkeolohia a bassit laeng ti nagbalbaliwan ti kangato ti danum sipud idi un-unana.
Gapuna, agparang a ti kaasitgan a tumunos iti salaysay ti Biblia ket ti ibagbaga a mismo dagiti nagkauna nga eskolar (idi maika-19 a siglo). Nabatad a ti Pihahirot ket lugar iti akikid a tanap iti makin-abagatan a daya ti sakaanan ti Jebel ʽAtaqah agarup 20 km (12 mi) iti abagatan a laud ti Suez. Maikunkuna a nangrugi a bimmallasiw dagiti Israelita iti nagdawadaw a daga a naawagan Ras ʽAtaqah ken limmasat iti lansad ti baybay nga agturong iti nadam-eg nga ʽAyun Musaʼ iti bangir a takdang. Ti lansad ti baybay iti daytoy a paset ket in-inut nga umadalem manipud agsumbangir a takdang gapu kadagiti baknad a 3 km (2 mi) manipud agsumbangir a sikigan. Ti kaadalman a paset daytoy a ruta ket agarup iti katengngaanna a dumanon iti 15 m (50 pie). Ti distansia iti nagbaetan ti agsumbangir a takdang ket agarup 10 km (6 mi). Daytoy a distansia ket kalkalainganna iti agarup tallo a milion nga Israelita tapno lumasatda iti namilagruan a dalan iti lansad ti baybay, bayat a lumaslasat met iti daytoy dagiti kumamkamat a puersa militar ni Faraon tapno kamakamenda ti bunggoy dagiti Israelita.—Kitaenyo ti IPAPANAW (Ruta ti Ipapanaw).
Daytoy a kapanunotan ket tumunos iti nabayagen a panangmatmat nga inlanad ni Josephus (Judio a historiador idi umuna a siglo K.P.) a sakbay a bimmallasiw dagiti Israelita, ‘nariputda iti nagbaetan ti di makalay-at a rangrangkis ken ti baybay.’ (Jewish Antiquities, II, 324, [xv, 3]) Ti ‘panagsubli’ ti nasion ti Israel manipud Etam a napanda iti disso a nadeskribiren ket tumunos met iti impakpakauna ni Jehova a kunaento ni Faraon maipapan kadakuada, “Agallaallada iti daga gapu iti pannakariribuk. Inalikubkob ida ti let-ang.” (Ex 14:3) Saan a kastoy ti maikuna maipapan kadagiti lugar iti amianan ti Suez. Gapu ta adda ti Pihahirot iti asideg ti Jebel ʽAtaqah, napartak a makamakam dagiti puersa ni Faraon dagiti agtaltalaw nga Israelita no dumalanda iti masansan a mapagnaan a ruta manipud Memfis (nalabit kabesera ti Egipto iti daydi a tiempo) nga agturong iti Peninsula ti Sinai.—Ex 14:4-9.
Nupay daytoy a maikunkuna nga ayan ti Pihahirot ket tumunos kadagiti nadakamat a detalye iti Kasuratan, rumbeng nga ibilang a pattapatta pay laeng ti ayanna, nga agpannuray iti masarakanto pay laeng nga ebidensia.