HISOPO
[Heb., ʼe·zohvʹ; Gr., hysʹso·pos].
Di masigurado ti apag-isu a pakabigbigan ti hisopo. Dagiti Hebreo ken Griego a termino mabalin nga, iti kinapudnona, saklawenda ti adu a nadumaduma a kita ti mula.
Kunaen ti sumagmamano nga agdama-aldaw nga eskolar a ti hisopo iti Hebreo a Kasuratan ket nalabit marjoram (Origanum maru). Gagangay idiay Palestina daytoy a mula iti pamilia ti yerbabuena. Iti sidong dagiti mainugot a kasasaad, madanonna ti katayag a 0.5 agingga iti 0.9 m (1.5 agingga iti 3 pie). Muldotan ti sangsanga ken napuskol a bulbulongna, ket kas naipatuldo iti 1 Ar-ari 4:33, masarakan nga agtubtubo kadagiti lengngan ti bato ken kadagiti pader.
Hisopo ti inaramat dagiti Israelita idiay Egipto a pangiwarsi iti dara ti naparti iti Paskua iti dua a bautek ken iti makinngato a paset ti ruangan dagiti balayda. (Ex 12:21, 22) Iti inagurasion ti Linteg ti tulag, hisopo ti inaramat ni Moises iti panangwarsina iti libro ti Linteg ken kadagiti umili. (Heb 9:19) Nairaman met ti hisopo iti seremonia ti panangdalus maipaay iti tattao wenno balbalay a naimpektaran iti kukutel (Le 14:2-7, 48-53; kitaenyo ti NADALUS, KINADALUS [Kukutel]) ken iti panangisagana kadagiti dapo a maaramat iti “danum a pangdalus,” kasta met iti panangiparsiak iti daytoy a danum iti sumagmamano a banag ken tattao. (Nu 19:6, 9, 18) Gapuna, mayanatup nga inkararag ni David a magugoran manipud basol babaen iti hisopo.—Sal 51:7.
Ti sumagmamano pagarupenda a ti hisopo a nadakamat mainaig iti pannakailansa ni Jesu-Kristo (Jn 19:29) ket tumukoy iti durra, wenno Indian millet, maysa a kita ti gagangay a bukakaw (Sorghum vulgare). Dayta ket natayag, babassit-binukelna a mula nga atiddog ken akaba ti bulbulongna. Idiay Palestina, daytoy a mula kadawyanna a madanonna ti katayag a di kumurang a 1.8 m (6 pie). Ngarud, makaipaay la ketdi daytoy iti ungkay, wenno “runo,” nga umdas ti kaatiddogna a mangidanon iti espongha ti naalsem nga arak iti ngiwat ni Jesus. (Mt 27:48; Mr 15:36) Pagarupen ti dadduma nga uray iti daytoy a kaso, ti hisopo mabalin a marjoram, ket isingasingda a mabalin a sangareppet a marjoram ti naikapet iti “runo” a dinakamat da Mateo ken Marcos. Sigun iti sabali pay a panangmatmat, hys·soiʹ (pika, gayang) ti orihinal a mabasa iti Juan 19:29, saan a hys·soʹpoi (hisopo); dayta ti makagapu nga adda dagiti patarus nga “iti pika” (AT) ken “iti gayang” (Mo).