DIBLA

Disso a dinakamat ni Ezequiel (6:14) idi inlanadna ti padto ni Jehova maipapan iti panaglangalang a dumteng iti daga ti Israel kas supapak ti panagdaydayawna iti idolo. Awan ti aniaman a kadaanan a disso nga addaan iti kastoy a nagan, ket ngarud kaaduan a moderno nga eskolar patienda a ti “Dibla” ket biddut a pannakakopia ti “Ribla,” yantangay ti umuna a Hebreo a letra maipaay iti “R” (ר) nalaka a mapagkamalian kas Hebreo a letra maipaay iti “D” (ד). No kastoy ti napasamak, mabalin nga isu dayta ti dinakamat ti Biblia a Ribla (rebrebba iti asideg ti agdama a Ribleh) iti Karayan Orontes, “iti daga ti Hamat” (2Ar 23:33), ket ti “let-ang nga agturong iti Dibla [Ribla]” mabalin a tumukoy iti nabato ken patad a tanap ti Desierto ti Siria nga adda iti abagatan ken abagatan a daya ti Ribla. Nupay kasta, ti sumagmamano a managipatarus ilanadda ti sasao ni Ezequiel kas “manipud let-ang agingga iti Ribla.” (RS) Ti kasta a patarus mabalin a kaipapananna a ti saklawen ti panangukom ni Jehova ket manipud “let-ang,” ti nabayagen a maikunkuna a makin-abagatan a beddeng ti Naikari a Daga (Ex 23:31), agingga iti rehion ti “Hamat” (inrepresentar ti Ribla) iti adayo nga amianan. (1Ar 8:65) Ti panagusar ni Ezequiel iti kasta a sasao ket katupag ngarud ti ad-adda a pagaammo a sasao a “manipud Dan agingga iti Beer-seba.”​—Uk 20:1; kitaenyo ti RIBLA Num. 2.