SAMMAH

1. Maysa nga Edomita a shik; apoko ni Esau babaen ken Reuel.​—Ge 36:10, 13, 17; 1Cr 1:37.

2. In-inauna a kabsat ni Ari David, naawagan met iti Simea(h) ken Simei. (1Cr 2:13; 2Sm 13:3; 21:21) Gapu ta ni Sammah ti maikatlo nga anak ni Jesse, mabalin nga isu ti maikatlo a napagpilian a mapulotan kas ari ngem linaksid ni Samuel. (1Sm 16:6-9) Kameng idi iti buyot ni Saul a rinurrurod ni Goliat idi nangyeg ni David kadagiti abasto. (1Sm 17:13, 14, 20, 23) Ni Jonatan a maysa kadagiti annak ni Sammah ti nangpapatay iti maysa a Filisteo a higante. (2Sm 21:20, 21; 1Cr 20:6, 7) Kunaen ti dadduma a ni Jonatan nga anak ni Sammah ket naawagan met iti Jehonadab ken isu idi ti nasikap a manangbalakad ni Amnon.​—2Sm 13:3, 32.

3. Maysa kadagiti tallo a kalaingan a mannakigubat ni David; anak ni Age a Hararita. Iti maysa a pasamak, inkanawa ni Sammah ti maysa a benneg ti talon maibusor kadagiti Filisteo, nga adu kadakuada ti pinapatayna. (2Sm 23:11, 12) Ni Sammah ken ti dua pay a kangrunaan a nabileg a lallaki napanda iti pagurnongan ti danum ti Betlehem (idi tiempo nga inikutan dagiti Filisteo) tapno iyalaanda ni David iti danum, ngem saanna nga ininum dayta. (2Sm 23:13-17) No idilig kadagiti kapadana a listaan iti 1 Cronicas 11:33, 34 ken iti 2 Samuel 23:32, 33 (nga anamongan ti kaaduan a ti mabasa iti 2 Samuel 23:32, 33 ket “ni Jonatan nga anak ni Sammah a Hararita”), makita a ti Sage ket sabali pay a nagan ni Sammah, ken adda anak ni Sammah nga agnagan iti Jonatan a nagbalin met a mabigbigbig a mannakigubat ni David.

4. Maysa kadagiti 30 a nabileg a lallaki ni David; maysa a Harodita. (2Sm 23:8, 25) Ti sabali pay a nadakamat a naganna ket masarakan iti 1 Cronicas 11:27 (Sammot) ken iti 1 Cronicas 27:8 (Samhut). Iti 1 Cronicas 27:8, nadakamat kas pannakaulo ti maikalima a benneg ti binulan a panagserbi.