INKAPILITAN A PANAGSERBI
Ti Hebreo a sao maipaay iti “inkapilitan a panagserbi” ket seʹvel, nga adda pannakainaigna iti literal wenno piguratibo nga awit, naipapilit a dadagsen, wenno makapadagsen a panagtrabaho. Mabalin nga agaplikar dayta iti kasla pannakibatara, awan sabali, di mabayadan wenno bassit bayadna a panagtrabaho nga ipataw ti autoridad agpaay iti sumagmamano a tattao, kas kadagiti agnanaed iti maysa a masinunuo a lugar.
Ti salmista, iti panangpampanunotna iti pannakaispal ti Israel manipud panangadipen dagiti Egipcio, imbagianna ni Jehova kas agkunkuna: “Inlisik ti abagana uray pay manipud iti dadagsen [wenno inkapilitan a panagserbi].” (Sal 81:6; Ex 1:11) Nangipasalista ni Ari Solomon iti lallaki maipaay iti pinuersa a panagtrabaho iti nadumaduma a proyekto a panagibangon ket nangisaad kadagiti kapatas nga agaywan kadakuada. (1Ar 5:13; 9:15, 23) Idi napaliiw ni Solomon a ti agtutubo a ni Jeroboam maysa a napinget a trabahador, “pinagbalinna a manangaywan iti isuamin nga inkapilitan a panagserbi iti balay ni Jose,” awan sabali, agaywan iti lallaki a naipasalista manipud kadagiti tribu da Efraim ken Manases.—1Ar 11:26-28.
Nainaig iti Hebreo a sao a seʹvel ti sab·balʹ, kaipapananna ti “agbumbunag iti awit.” Kalpasan ti panangsensusna iti lallaki a ganggannaet nga agnanaed iti Israel, pinagserbi ida ni Solomon, ket ti 70,000 iti bilangda nagbalin nga agbumbunag iti awit. (2Cr 2:2, 17, 18) Adu a tawen kalpasanna, tinarimaan ni Ari Josias ti templo, ket dagiti “agbumbunag iti awit” karamanda idi kadagidiay mangitungtungpal iti trabaho.—2Cr 34:12, 13.
Ti Hebreo a sao a tsa·vaʼʹ, a masansan nga agaplikar iti panagserbi iti militar wenno panagserbi iti gubat, kaipapananna met ti “inkapilitan a panagtrabaho,” awan sabali, agikaro iti utang wenno pannakabasol. Gapuna maikuna iti Jerusalem a ti “panagserbina iti militar” natungpalen ket ti biddutna nabayadanen. (Isa 40:1, 2, Rbi8 ftn) Idi masubsubok, ti maparparigatan ken matutuok iti ut-ot a ni Job inyaspingna ti biag iti narigat, makapaksuy a panagserbi wenno “inkapilitan a panagtrabaho,” nga inyimtuodna: “Saan aya nga adda inkapilitan a panagtrabaho a maipaay iti mortal a tao iti daga, ket dagiti aldawna saanda aya a kas kadagiti aldaw ti maysa a patangtangdanan a trabahador?” (Job 7:1) Buyogen ti umasping a sentimiento, kinunana idi agangay iti Dios: “Pagbalinemto a dakdakkel ti panagluksawmo kaniak; agsusukot a pakarigatan ti adda kaniak,” wenno “maysa a batang ti inkapilitan a panagtrabaho kalpasan ti sabali ti adda kaniak.” (Job 10:17, Rbi8 ftn) Nabatad nga iti panagrikna ni Job naynayonan ti Dios ti pannakaparigatna babaen ti panangyegna kenkuana iti maysa a baro a rigat kalpasan ti sabali. Ti tiempo a kaadda ti natay idiay Sheol inyasping met ni Job iti inkapilitan a panagtrabaho, maysa a dadagsen a naipapilit; nupay kasta nangyebkas iti namnama iti panagungar.—Job 14:14.