MANANGIBALES ITI DARA

Iti Hebreo, daytoy a sasao ket go·ʼelʹ had·damʹ. Ti Hebreo a go·ʼelʹ (a nagaplikar iti maysa a manangibales iti dara) ket maysa a porma ti berbo a ga·ʼalʹ, kaipapananna ti “bawyen; gatangen a bawyen; sakaen; subboten.” (Ex 15:13; Sal 69:18; Le 25:25; Isa 43:1; Sal 72:14) Iti Hebreo a linteg, tumukoy daytoy a termino iti kaasitgan a kabagian a lalaki, a rebbengenna nga ibalesan ti dara daydiay napapatay. (Nu 35:19) Ti termino a go·ʼelʹ ket tumukoy met iti maysa a kabagian a lalaki nga addaan kalintegan a mangsaka (wenno mangsubbot).​—Le 25:48, 49; Ru 2:20, Rbi8 ftn; kitaenyo ti SAKAEN, MANANGSAKA.

Ti panangibales iti dara ket naibatay iti imbilin ti Dios ken Noe mainaig iti kinasagrado ti dara ken ti biag ti tao. Kinuna ni Jehova: “Singirekto ti dara dagiti kararuayo . . . manipud iti ima ti tunggal maysa a kabsatna, singirekto ti kararua ti tao. Asinoman a mangibukbok iti dara ti tao, babaen ti tao maibukbokto ti bukodna a dara, ta iti ladawan ti Dios inaramidna ti tao.” (Ge 9:5, 6) Ti sipapakinakem a pimmatay ket papatayen ti “manangibales iti dara,” ket saan a mabalin a masubbot ti kasta a pimmatay.​—Nu 35:19-21, 31.

Siguraduento ni Jehova a ti awanan basol a dara ti amin a matalek nga adipenna ket maibalesan iti naikeddeng a tiempo.​—De 32:43; Apo 6:9-11.

Ti di mangidumduma a linlinteg ni Jehova silalawag a pinagdumada ti sipapakinakem ken ti di inggagara a panangpapatay. Siaayat a naipaay dagiti siudad a pagkamangan tapno ti di ingagara a nakapapatay masalakniban manipud manangibales iti dara. (Nu 35:6-29; De 19:2-13; Jos 20:2-9) Kasta met, nabuangay dagiti legal a pangukoman tapno mausig dagiti kaso mainaig iti panagbasol iti dara.​—De 17:8, 9; 2Cr 19:10.