SIUDAD A PAGKAMANGAN

Nakabatbatad ti linteg ni Jehova maipapan iti kinasagrado ti dara. Gapu iti panagibukbok iti dara ti tao narugitan ti daga a pagnanaedan ti annak ti Israel, nga iti tengnga dayta agtataeng ni Jehova, ken ti laeng makaabbong iti dayta ket ti dara daydiay nangibukbok iti dayta. (Ge 9:5, 6; Nu 35:33, 34) Gapuna, no adda nakapatay, maibalesan ti dara ti biktimana ken mapennek ti linteg a ‘biag iti biag’ no ti nakapatay ket “di bumurong” a papatayen ti manangibales iti dara. (Ex 21:23; Nu 35:21) Ngem ti met ngay di inggagara a nakapapatay, kas pagarigan, daydiay nakapatay iti kabsatna idi aksidente a timmayab ti ulo ti wasay bayat nga agbalbalsig iti kayo? (De 19:4, 5) Maipaay iti kakasta a piman ti kasasaadda, siaayat a nangipaay ni Jehova kadagiti siudad a pagkamangan, nga innem ti bilangda, a sadiay ti di inggagara a nangibukbok iti dara magun-odanna ti pannalaknib ken kinatalged manipud iti manangibales iti dara.​—Nu 35:6-32; Jos 20:2-9.

Pakasarakan. Sakbay ti ipapatay ni Moises, nangituding iti tallo kadagitoy a siudad iti daya ti Jordan. Ti umuna, Bezer, idiay abagatan iti tanap ti teritoria a kukua ti tribu ni Ruben, ket adda iti daya ti makin-amianan nga ungto ti Natay a Baybay; ti maikadua, Ramot, idiay Galaad, kukua ti tribu ni Gad ket adda idi iti agarup katengngaan ti makindaya a benneg ti daga a sinakup ti Israel; ti maikatlo, Golan, idiay Basan, ket adda iti amianan iti teritoria ti Manases. (De 4:43; Jos 21:27, 36, 38) Idi nakaballasiwen dagiti Israelita iti makinlaud a deppaar ti Jordan, nangituding ni Josue iti tallo pay a siudad a pagkamangan: Hebron, iti abagatan idiay teritoria ti Juda; Siquem, idiay makintengnga a nakabambantay a rehion ti Efraim; ken iti amianan, Kedes, idiay teritoria ti Neftali, nga idi agangay pagaammo kas rehion ti Galilea. (Jos 21:13, 21, 32) Amin dagitoy a siudad ket siudad dagiti Levita ken maysa ti siudad ti papadi, ti Hebron. Kanayonanna pay, gapu ta nailasinda kas siudad a pagkamangan, naibilangda a sagrado.​—Jos 20:7.

Legal a Pamay-an. Apaman a ti pugante makadanon iti maysa a siudad a pagkamangan, dakamatenna ti kasona iti lallakay iti ruangan ti siudad ket siaayat a pasangbayenda. Tapno dagiti sipapakinakem a pimmatay saanda a mapan agpaing sadiay kas pananggundaway iti daytoy nga urnos, inton daydiay agtaltalaw ket nakastreken iti siudad a pagkamangan, kasapulan a maipan ket mausig pay kadagiti ruangan iti siudad a makinsakup iti nakapasamakan ti panangpapatay, tapno paneknekanna nga awan basolna. No masarakan nga awan basolna, isu maisubli iti siudad a pagkamangan. Nupay kasta, masigurado laeng ti pannakasalaknibna no agtalinaed iti siudad bayat ti natda a panagbiagna wenno agingga a matay ti nangato a padi. Awan ti maawat a subbot a mangbalbaliw kadagitoy a kondision. (Nu 35:22-29, 32; Jos 20:4-6) Uray ti sagrado nga altar ni Jehova saanna a naikaluya dagiti nakapapatay, kas nailadawan iti napasamak ken Joab.​—Ex 21:14; 1Ar 1:50; 2:28-34; kitaenyo ti MANANGIBALES ITI DARA.

Ngarud, anian a naiduma ti urnos ni Jehova maipaay iti pannakasalaknib dagiti di inggagara a nakapapatay no idilig kadagiti pagkamangan nga impaay dagiti nagkauna a pagano a nasion ken dagiti simbaan ti Kakristianuan iti unos ti naglabas a panawen! Bayat a dagiti naud-udi a nadakamat a pagkamangan ket agpadpada a pagsalinongan dagiti kriminal ken dagiti awanan basol, dagiti laeng nakapapatay a di inggagara ti sinalakniban dagiti siudad a pagkamangan ti Israel ngem adda laeng bambanag a naiparit, ket iti kasta naitandudo ti panagraem iti kinasagrado ti biag.