PANAGBANIAGA

Ti sao a “panagbaniaga” ket masansan a maaramat iti Biblia kas tumukoy iti gagangay a distansia a madaliasat. (Ge 31:23; Ex 3:18; Nu 10:33; 33:8) Ti distansia a madaliasat iti maysa nga aldaw ket agpannuray iti naaramat a pagsakayan, nadumaduma a kasasaad, ken iti kita ti daga a pagnaan ti agdaliasat. Ti kalalainganna a kawatiwat ti maysa nga aldaw a panagbaniaga iti daga ket nalabit 32 km (20 mi) wenno nasursurok pay. Ngem ab-ababa nga amang ti maysa nga “aldaw ti sabbath a panagdaliasat (panagbaniaga).” (Mt 24:20) Ipasimudaag ti Aramid 1:12 a “maysa nga aldaw ti sabbath a panagdaliasat (panagbaniaga)” ti kaadayo iti nagbaetan ti Jerusalem ken Bantay dagiti Olibo. Nalabit a gapu ta dua a nagduma a disso ti nangrugian ti panangpattapatta ni Josephus iti kaadayo daytoy a distansia, isu nga inlanadna ti kaadayo dayta kas lima nga estadio (925 m; 3,034 pie) ken kas innem nga estadio (1,110 m; 3,640 pie) iti sabali pay a gundaway. Maibatay iti Josue 3:4, kunaen dagiti rabbiniko a sursurat a ti “maysa nga aldaw ti sabbath a panagdaliasat (panagbaniaga)” ket 2,000 a kasiko (890 m; 2,920 pie).