PAGSAPLIT, BAUT

Gagangay a naamnut a tali wenno lalat nga ablat nga addaan iti pagiggaman. Naar-aramaten daytoy a pangablat iti tattao idi pay nagkauna a tiempo (2Cr 10:11, 14) kasta met a pangabug ken pangiturong iti an-animal.​—Pr 26:3; Na 3:2.

Impasindayag ni Ari Rehoboam a no dagiti Israelita ket dinusa ni amana a Solomon babaen kadagiti “baut,” isu dusaenna ida babaen kadagiti “pannaplit.” Piguratibo ti sasao ni Rehoboam, ngem dagiti dakdakamatenna a pannaplit mabalin nga ablat a namontaran kadagiti tirad, ta ti Hebreo a sao (ʽaq·rab·bimʹ) maipaay kadagiti “pannaplit” literal a kaipapananna ti “manggagama.”​—1Ar 12:11, 14, Rbi8 ftn; 2Cr 10:11, 14.

Dinakamat ni Elifaz a Temanita ti maipapan iti “pagsaplit ti dila.” (Job 4:1; 5:21) Nalawag a ti kayatna a sawen ket ti panangaramat iti dila tapno mangdangran, kas iti panangpardaya ken panagsao a sibabassawang.​—Idiligyo ti Pr 12:18; San 3:5-10.

Idi tiempo ti Paskua ti 30 K.P., “kalpasan a nakaaramid iti pagsaplit a taltali, pinaruar [ni Jesus] amin dagidiay addaan kadagiti karnero ken bakbaka manipud iti templo.” Ti mangipakita a saan a dagiti tattao nga addaan kadagiti karnero ken bakbaka ti sinaplit ni Jesus no di ket dagiti laeng animal isu ti berbal a panamagtalawna kadagiti aglaklako iti kalapati, saan ket a babaen iti pagsaplit. Kasta met, riniribukna ti panagnegosioda babaen ti panangabugna kadagiti baka babaen iti pagsaplit, ket siempre sinurot dagiti tattao dagiti bakada tapno maummong dagita.​—Jn 2:13-17.