Salsaludsod Dagiti Agbasbasa
Apay a kinuna ni Jesus iti maysa a babai a pagaammo a managbasol a napakawanen dagiti basolna?—Luc. 7:37, 48.
Bayat a nakasadag ni Jesus iti panganan iti balay ti Fariseo nga agnagan iti Simon, maysa a babai ti ‘nagsaad iti likudan dagiti saka ni Jesus.’ Babaen ti luluana binasána dagiti saka ni Jesus ket pinunasanna ida kadagiti buokna. Kalpasanna, sidudungngo nga inagkanna dagiti saka ni Jesus ken sinapsapuanna dagita iti bangbanglo a lana. Sigun iti salaysay ti Ebanghelio, ti babai ket ‘pagaammo iti siudad kas maysa a managbasol.’ Siempre, managbasol ti amin nga imperpekto a tattao, ngem masansan a dakamaten ti Kasuratan daytoy a termino a mangiladawan iti maysa nga agdindinamag ti naaramidna a basol wenno addaan iti reputasion a managbasol. Agparang a ti babai ket maysa a balangkantis. Iti kasta a kita ti tao a kinuna ni Jesus: “Dagiti basolmo mapakawanda.” (Luc. 7:36-38, 48) Ania ti kayat a sawen ni Jesus iti dayta? Yantangay saan pay idi a naipaay ti pangsubbot a daton, kasano a posible dayta a pannakapakawan ti basol?
Kalpasan a ti babai inugasan ken sinapsapuanna ti saka ni Jesus, ken sakbay nga isu ket napakawan, nagusar ni Jesus iti maysa a pangngarig a mangilawlawag iti maysa a napateg a punto iti nangsangaili kenkuana a ni Simon. Iti panangyarigna iti basol kas dakkel nga utang a narigat a bayadan, kinuna ni Jesus ken ni Simon: “Dua a lallaki ti addaan utang iti maysa nga agpapautang; ti maysa nakautang iti lima gasut a denario, ngem ti sabali limapulo. Idi awananda ti aniaman a maibayad, sibubulos a pinakawanna ida nga agpadpada. Gapuna, siasino kadakuada ti mangayatto kenkuana iti ad-adu?” Kas sungbat, kinuna ni Simon: “Pagarupek a daydiay sibubulos a pinakawanna iti ad-adu.” Simmungbat ni Jesus: “Impatom a siuumiso.” (Luc. 7:41-43) Obligasiontayo amin ti agtulnog iti Dios. Gapuna, no agsukir ken agbasoltayo Kenkuana, saantay nga ipapaay ti maiparbeng iti Dios a panagtulnog. Iti kasta, maurnongantayo iti utang kenkuana. Ngem ni Jehova ket mayarig iti maysa nga agpapautang a sidadaan a mamakawan kadagiti nakautang. Dayta ti makagapu a pinaregta ni Jesus dagiti pasurotna nga agkararagda iti Dios ken kiddawenda: “Pakawanennakami kadagiti utangmi, a kas met iti panangpakawanmi kadagiti nakautang kadakami.” (Mat. 6:12) Tinukoy ti Lucas 11:4 dagitoy nga utang kas basbasol.
Ania dagiti nangibatayan ti Dios iti panangpakawanna kadagiti basol iti naglabas? Ti naan-anay a kinahustisiana kalikagumanna ti dusa nga ipapatay gapu iti basol. Gapuna, natay ni Adan kas supapak ti basolna. Nupay kasta, iti sidong ti Linteg nga inted ti Dios iti nasion ti Israel, mabalin a mapakawan ti nakabasol babaen ti panangidatonna iti animal agpaay ken Jehova. Insurat ni apostol Pablo: “Nganngani amin a bambanag madalusanda babaen ti dara sigun iti Linteg, ket malaksid no maiparukpok ti dara awan maaramid a pannakapakawan.” (Heb. 9:22) Malaksid iti dayta, awanen ti sabali pay a pamay-an nga ammo dagiti Judio tapno magun-odda ti pammakawan ti Dios. Di ngarud pakasdaawan no apay a sinupiat dagiti siiimatang idi kaaldawan ni Jesus ti kinunana iti babai. Dagidiay kadua ni Jesus a nakasadag iti panganan rinugianda a kunaen iti bagbagida: “Asino daytoy a tao a mangpakawan pay kadagiti basol?” (Luc. 7:49) Ania ngarud ti nakaibatayan ti pannakapakawan daytoy a managbasol a babai?
Ti kaunaan a padto a naisawang kalpasan ti panagrebelde ti umuna a pagassawaan dakamatenna ti panggep ni Jehova a mangpataud iti maysa a ‘bin-i’ a madunorto ti mukodna babaen ken ni Satanas ken iti ‘bin-ina.’ (Gen. 3:15) Napasamak dayta a pannakadunor idi a dagiti kabusor ti Dios pinapatayda ni Jesus. (Gal. 3:13, 16) Ti naiparukpok a dara ni Kristo ket agserbi kas subbot a mangwayawaya iti sangatauan manipud iti basol ken ipapatay. Yantangay awan ti makalapped ken Jehova iti panangtungpalna iti panggepna, imbilangna a naipaayen ti subbot apaman a nayebkas dagiti sasao iti Genesis 3:15. Mabalinnan a pakawanen dagidiay mangipakita iti pammati kadagiti karina.
Sakbay ti panawen dagiti Kristiano, adda dagiti imbilang ni Jehova a nalinteg, kas kada Enoc, Noe, Abraham, Rahab, ken Job. Buyogen ti pammati, sineggaanda ti pannakatungpal dagiti kari ti Dios. “Naaddaan ni Abraham iti pammati ken Jehova,” insurat ni adalan a Santiago, “ket naibilang dayta kenkuana kas kinalinteg.” Maipapan ken Rahab, kinuna ni Santiago: “Iti isu met laeng a pamay-an saan kadi a ni Rahab a balangkantis naideklara met a nalinteg babaen kadagiti aramid?”—Sant. 2:21-25.
Ni Ari David iti nagkauna nga Israel ket nakaaramid iti sumagmamano a nakaro a basol, ngem nabileg ti pammatina iti pudno a Dios ken imparangarangna ti pudpudno a panagbabawi tunggal makaaramid iti basol. Maysa pay, kuna ti Kasuratan: “[Ni Jesus ket] impasdek ti Dios kas maysa a daton a maipaay iti pannakikappia babaen ti pammati iti darana. Daytoy ket tapno maipakita ti bukodna a kinalinteg, agsipud ta pinakpakawanna dagiti basol a naaramid iti napalabas bayat a ti Dios watwatwatenna idi ti kinamanagpalabas; tapno maipakita ti bukodna a kinalinteg iti daytoy agdama a panawen, iti kasta isu nalinteg koma uray iti panangideklarana a nalinteg ti tao nga addaan iti pammati ken Jesus.” (Roma 3:25, 26) Maibatay iti pangsubbot a daton ni Jesus a maipaay pay laeng idi iti masanguanan, mabalinen a pakawanen ni Jehova dagiti basol ni David a dina ikompromiso dagiti bukodna a pagalagadan iti kinahustisia.
Nabatad nga umasping dayta iti situasion ti babai a nangsapsapo iti saka ni Jesus. Nupay imoral idi ti panagbiagna, pinagbabawyanna dayta. Binigbigna a kasapulanna ti pannubbot manipud iti basol ken ipakita ti inaramidna a pudno nga apresiarenna daydiay inusar ni Jehova a mangipaay iti subbot. Nupay saan pay idi a naipaay ti subbot, mapangnamnamaan unay dayta a ti pategna ket agaplikaren kadagiti tattao kas iti managbasol a babai. Gapuna, kinuna kenkuana ni Jesus: “Dagiti basolmo mapakawanda.”
Kas nalawag nga ipakita daytoy a salaysay, saan a liniklikan ni Jesus dagiti managbasol. Nangipakita iti kinaimbag kadakuada. Maysa pay, sidadaan a mangpakawan ni Jehova kadagidiay agbabbabawi a managbasol. Anian a nagsayaat ken makaparegta a pammatalged dayta kadatayo a managbasol a tattao!
[Ladawan iti panid 7]
Naibilangda a nalinteg gapu iti pammati a nabuyogan iti aramid