Ad-adda a Makaparagsak ken Makagunggona a Panagadal
Kasano nga agbalin nga ad-adda a makaparagsak ken makagunggona ti panagadaltayo iti Biblia? Usigentayo ti tallo a napateg nga addang tapno magunggonaantayo a naimbag iti personal a panagadaltayo iti Biblia.
1 KARARAG: Ti umuna nga addang ket ti panagkararag. (Sal. 42:8) Apay? Rumbeng nga ibilangtayo ti panagadaltayo iti Sao ti Dios a paset ti panagdayawtayo. Isu a masapul a kiddawentayo ken Jehova a luktanna ti isiptayo ken ipaayannatayo iti nasantuan nga espirituna. (Luc. 11:13) Kuna ni Barbara a nabayagen a misionera: “Kanayon nga agkararagak sakbay nga agbasa wenno agadalak iti Biblia. Kalpasanna, mariknak a tultulongannak ni Jehova ken ammok a maragsakan iti ar-aramidek.” Ti panagkararag sakbay ti panagadal isaganana ti isip ken pusotayo tapno naan-anay a matarusantayo ti adu a naespirituan a taraon nga ipaunegtayo.
2 PANAGUTOB: Gapu ta awan ti tiempo ti dadduma, parparawpaw laeng ti panagbasada iti Sao ti Dios. Ngem saanda a magunggonaan iti panagadalda iti Biblia. Ni Carlos a nasurok a 50 a tawenen nga agserserbi ken Jehova naamirisna a napateg nga adda tiempona nga agutob tapno ad-adda a magunggonaan iti panagadalna. Kunana: “Saanen a lumbes iti dua a panid ti Biblia ti basbasaek iti kada aldaw tapno ad-adu ti tiempok a mangutob iti nabasak ket maipapusok dagiti naadalko.” (Sal. 77:12) No iwayaantayo ti agutob, umuneg ti pannakaammo ken pannakaawattayo iti pagayatan ti Dios.—Col. 1:9-11.
3 PANANGYAPLIKAR: No makitatayo ti kinapateg ti maysa nga aktibidad, ad-adda a magunggonaantayo iti dayta. Pudno met dayta iti panagadal iti Biblia. “Ti panagadal tulongannak a mangrisut kadagiti inaldaw a problema, ken agbalin a nakasagana a tumulong iti sabsabali,” kuna ni Gabriel, maysa nga agtutubo a kabsat a regular nga agad-adal iti Biblia. Innayonna: “Ikagkagumaak nga iyaplikar ti amin a maad-adalko.” (Deut. 11:18; Jos. 1:8) Wen, adu nga impormasion maipapan iti Dios ti mabalintayo a masursuro ken mayaplikar.—Prov. 2:1-5.
REPASO: Nagdakkel a pribilehio a sukimaten ti pannakaammo nga ipapaay ni Jehova, ti Gubuayan ti amin a sirib! (Roma 11:33) Isu nga inton sumaruno nga agadalka, agkararagka nga umuna ken Jehova ket kiddawem a luktanna ti isipmo ken ipaayna ti nasantuan nga espirituna. Kalpasanna, agsardengka sagpaminsan tapno utobem ti nabasam. Ken iti inaldaw a panagbiagmo, iyaplikarmo dagiti naadalmo. No aramidem dagita a nagpateg nga addang, maragsakan ken magunggonaanka unay iti panagadalmo iti Biblia.