Salsaludsod Dagiti Agbasbasa
Kaano a nagbalin a maikapito a kabilgan a turay ti Anglo- Americano a Turay ti Lubong maitunos iti padto ti Biblia?
▪ Ti dakkel a metal a ladawan a nakita ni Ari Nabucodonosor saanna nga irepresentar ti amin a nagbalin a kabilgan a turay ti lubong. (Dan. 2:31-45) Irepresentarna ti lima laeng a turay manipud idi tiempo ni Daniel nga agpatpatuloy ken addaan dagita iti napateg a pakainaigan iti ili ti Dios.
Ipasimudaag ti deskripsion ni Daniel iti metal a ladawan a ti Anglo-Americano a Turay ti Lubong ket agtaud iti Roma imbes nga isu ti mangparmek iti dayta. Nakita ni Daniel a landok dagiti gurong ti ladawan agingga kadagiti saka ken ramramayna. (Naglaok ti landok ken pila kadagiti saka ken ramramayna.)a Ipakita dayta a deskripsion nga agtaud ti Anglo-Americano a Turay kadagiti gurong a landok. Paneknekan ti historia nga umiso dayta. Ti Britania, a sigud a paset ti Imperio ti Roma, ket nangrugi a lumatak idi arinunos ti 1700. Idi agangay, nagbalin a nabileg a nasion ti Estados Unidos ti America. Ngem saan pay idi a nabukel ti maikapito a kabilgan a turay ti lubong a naipadto iti Biblia. Apay? Saan pay a nagaliansa ti Britania ken Estados Unidos para iti maysa a napateg a panggep. Napasamak laeng dayta bayat ti Gubat Sangalubongan I.
Iti daydi a tiempo, aktibo dagiti “annak ti pagarian” nangnangruna iti Estados Unidos, nga ayan ti sangalubongan a hedkuarterda iti Brooklyn, New York. (Mat. 13:36-43) Aktibo idi dagiti kameng ti klase napulotan a mangaskasaba kadagiti pagilian a sakup ti Imperio ti Britania. Kabayatan ti Gubat Sangalubongan I, nabukel ti naisangsangayan a singgalut iti nagbaetan ti Britania ken America idi nagkaduada a nangparmek kadagiti kabusorda a nasion. Kas resulta ti ad-adda a pannakaitandudo ti nasionalismo gapu iti gubat, impakitada met ti panangbusorda kadagiti paset ti bin-i ti “babai” a kukua ti Dios, nga imparitda dagiti publikasion dagitoy ken imbaludda dagiti mangidadaulo iti trabaho a panangasaba.—Apoc. 12:17.
Gapuna, maitunos iti padto ti Biblia, saan a nabukel idi arinunos ti 1700 ti maikapito a kabilgan a turay iti lubong idi nangrugi nga aglatak ti Britania. Imbes ketdi, nabukel dayta iti rugi ti aldaw ti Apo.b
[Footnotes]
a Ti pila a nailaok iti landok irepresentarna dagiti elemento iti sakup ti arig landok nga Anglo-Americano a Turay ti Lubong. Iti panaglabas ti tiempo, daytoy a pila ti namagbalin a nakapkapuy ti bileg dayta a turay.
b Daytoy a pannakailawlawag ti mangsukat iti impormasion a nailanad iti panid 57, parapo 24, ti libro a Padto ni Daniel ken dagiti tsart iti panid 56 ken 139.
[Ladawan iti panid 19]
Walo a kakabsat manipud iti hedkuarter ti Watchtower ti naibalud idi Hunio 1918