Nakasaganaka Kadin a ‘Mangtawid iti Daga’?
KAYATTAYO la unayen a makita ti kaitungpalan daytoy a kari ni Jesus: “Naragsak dagiti naalumamay, ta tawidendanto ti daga.” (Mat. 5:5) Ti daga ket tawidento dagiti dinutokan ti espiritu inton agbalinda nga ari a kadua ni Jesus idiay langit. (Apoc. 5:10; 20:6) Kaaduan a pudno a Kristiano ita ket magagaran a mangtawid iti daga ken agbiagdanto nga agnanayon iti dayta. Agbalindanto a perpekto, naragsak, ken natalna ti panagbiagda. Tapno naan-anay a matungpal dayta, adunto ti aramidenda. Kitaentayo ti tallo: panangkultibar iti daga, panangasikaso kadagiti mapagungar, ken panangisuro kadakuada. Usigem met no kasano nga uray pay itan ket maipakitamon a kayatmo nga aramiden dagita idiay baro a lubong.
NAKASAGANA A MANGKULTIBAR ITI DAGA
Idi imbilin ni Jehova kadagiti tattao a ‘punnuenda ti daga ken kultibarenda,’ impakitana nga inton agangay, agbalin a paraiso ti intero a daga. (Gen. 1:28) Dayta nga orihinal a bilin ket surotento dagiti mangtawid iti daga. Iti damo, saanto pay la a paraiso ti daga. Ngamin, awanen ti hardin ti Eden. Kalpasan ti Armagedon, adunto ti aramidentayo tapno madalusan ti dadduma a paset ti daga a nadadael. Nagadunto la ketdi ti trabahotayo!
Dayta ti mangipalagip kadatayo iti naipaaramid kadagiti Israelita idi nagsublida manipud Babilonia. Iti 70 a tawen, awan ti nagnaed iti dagada. Ngem impadto ni Isaias a babaen ti pamendision ni Jehova, mapapintasda manen dayta. Kuna ti padto: “Pagbalinennanto a kas iti Eden ti let-angna ken kas iti hardin ni Jehova ti tanapna.” (Isa. 51:3) Nagballigi dagiti Israelita. Kasta met, babaen ti pamendision ni Jehova, dagidiay mangtawid iti daga agballigidanto a mangkultibar iti dayta. Ken uray pay itan, addan dagiti mabalinmo nga aramiden a mangipakita a talaga a kayatmo ti makipartisipar iti dayta.
Ti maysa a pamay-an ket no pagtalinaedem a nadalus ken naurnos ti balaymo ken ti aglawlawmo. Maaramidmo dayta uray no saan a kasta ti ar-aramiden dagiti kaarrubam. Mabalinmo ti tumulong iti panagdalus ken panangmantener iti Kingdom Hall ken Assembly Hall iti lugaryo. No ipalubos ti kasasaadmo, mabalinmo met ti agaplay kas maysa a boluntario iti lugaryo a makipaset iti panangsaranay kadagiti nadidigra. Iti kasta, ipakpakitam a nakasaganakan a tumulong kadagiti agkasapulan. Isaludsodmo iti bagim, ‘Mabalin ngata nga agsursuroak kadagiti paglaingan a mausarkonto no bilang ipalubos ni Jehova a maysaak kadagiti mangtawid iti daga?’
NAKASAGANA A MANGASIKASO KADAGITI MAPAGUNGAR
Pinagungar ni Jesus ti anak a babai ni Jairo. Kalpasan la unay dayta, imbagana nga ikkanda ti ubing iti kanenna. (Mar. 5:42, 43) Mabalin a saan a kasta karigat nga ipaay ti kasapulan ti maysa a 12 ti tawenna a balasitang. Ngem panunotem no kasano kaadu ti aramidentayo inton tungpalen ni Jesus ti karina nga “amin a natay nga adda iti pakalaglagipan a tanem mangngegdanto ti timekna ket rummuarda.” (Juan 5:28, 29) Saan a mangted ti Biblia iti adu a detalye. Ngem maimadyintayo a kasapulanto dagiti mapagungar ti tulong tapno maaddaanda iti taraon, pagyanan, ken bado. Maipakitam kadi nga uray pay itan ket nakasaganakan a tumulong? Dagitoy ti sumagmamano a saludsod a pagpampanunotam.
Ania dagiti mabalinmo nga aramiden itan tapno maipakitam a nakasaganakan a mangtawid iti daga?
No maipakaammo a bumisita iti kongregasionyo ti manangaywan iti sirkito, agboluntarioka kadi a maysakanto kadagiti agpakan? No adda dagiti special full-time servant a kas kadagiti Bethelite a ma-reassign iti kongregasionyo wenno agpatinggan ti manangaywan iti sirkito iti trabaho a panagdaliasat, mabalinmo kadi a tulongan nga agbirok iti pagyananna? No adda rehional wenno espesial a kombension iti lugaryo, makapagboluntarioka kadi a tumulong sakbay wenno kalpasan ti kombension, wenno mangpasangbay kadagiti delegado?
NAKASAGANA A MANGISURO KADAGITI MAPAGUNGAR
Maitunos iti Aramid 24:15, ekspektarentayo a binilion a tattao ti mapagungar. Adu kadakuada ti saan man la a naaddaan iti gundaway a maam-ammo ni Jehova. Inton mapagungarda, addaandanton iti dayta a gundaway.a Makipasetto iti dayta a trabaho a panangisuro dagiti matalek ken eksperiensiado nga adipen ti Dios. (Isa. 11:9) Segseggaan dayta ni Charlotte, a napadasannan ti nangasaba iti Europe, South America, ken Africa. Maragragsakan a nangibaga: “Eksaytedakon a mangisuro kadagiti mapagungar. No adda mabasak maipapan iti maysa a tao a nagbiag idi un-unana, masansan no kua a mapanunotko: ‘No la koma ta naam-ammona ni Jehova, sabali koma ti nagbalin a biagna.’ Magagaranakon a mangibaga kadagiti mapagungar kadagiti banag a nakaikapisanda.”
Nagadunto ti sursuruen uray dagiti matalek nga adipen ni Jehova a nagbiag sakbay nga immay ni Jesus ditoy daga. Agasem! Maysanto a pribilehio ken makaparagsak ti panangilawlawag ken Daniel iti kaitungpalan dagiti padto nga insuratna ngem dina naawatan. (Dan. 12:8) Ti ngay met panangtulong kada Ruth ken Noemi a mangammo no kasano a ti pamiliada ket karaman iti nagbalin a kapuonan ti Mesias? Talaga a makaparagsakto ti makiraman iti dayta a sangalubongan a programa ti panangisuro, nga awanton ti di nasayaat nga impluensia ken pakasingaan manipud iti agdama a dakes a lubong!
Kasanom a maipakita itan a nakasaganakan a makipaset iti dayta a programa? Ti maysa a pamay-an ket ikagumaam a parang-ayen ti abilidadmo a mangisuro ken regular a makipasetka iti sangalubongan a trabaho a panangasaba. (Mat. 24:14) Uray no limitado dagiti maar-aramidam ita gapu iti edad wenno dadduma pay a rason, ti panagreggetmo ti mangipakita a nakasaganakan a mangisuro kadagiti mapagungar.
Wen, nagsayaat a panunotem dagitoy a nagpateg a saludsod: Talaga kadi a segseggaamon a tawiden ti daga? Eksaytedka kadin a mangkultibar iti daga, ken mangasikaso ken mangisuro kadagiti mapagungar? Maipakitam a nakasaganakan no ita pay laeng ket gunggundawayamon dagiti oportunidad a makipasetka kadagiti trabaho a kas kadagiti aramidem inton tawidemon ti daga!
a Kitaen ti artikulo a “Panangtulong iti ‘Adu nga Agbalin a Nalinteg’” iti Pagwanawanan a Septiembre 2022.