Dagiti Tampok iti Napalabas a Tawen

KALPASAN ti maysa manen a nagsayaat a tawen ti sagrado a panagserbi, addaantayo iti rason tapno agrag-o. No repasuentayo ti dadduma kadagiti tampok ti nagdakkel a trabaho nga ar-aramiden ti Dios babaen kadagiti adipenna, sigurado a maibagatayo kenkuana: “Kinoronaam ti tawen iti kinaimbagmo”!​—Sal. 65:11.

“NAIMBAG A DAMAG” ITI INTERNET

Kas Saksi ni Jehova, sipapasnek nga itungtungpaltayo ti annongentayo a ‘mangikasaba iti naimbag a damag ti pagarian iti intero a mapagnaedan a daga maipaay a pangsaksi kadagiti amin a nasion’ sakbay a dumteng ti panungpalan. (Mat. 24:14) Kadagiti naglabas a tawen, nakatulong dagiti kabaruan a panagrang-ay ti teknolohia tapno mapapartak ti pannakaisaknap “ti sao ti pagarian.” (Mat. 13:18-23) Iti 11 a tawenen, us-usarentayo ti opisial a Web site a www.watchtower.org iti panangipaay iti naespirituan nga impormasion iti Internet. Dagidiay agsirarak iti dayta a Web site mabalinda a maammuan ti kinapudno iti Biblia iti aniaman kadagiti 314 a lenguahe ken mabalinda a kitaen dagiti paulo a kas iti “Beliefs and Activities,” “Current Topics,” “God and Your Future,” “Medical Care and Blood,” ken “Publications Available.”

Adu ti mangluklukat iti www.watchtower.org tapno basaenda ti Biblia. Iti inaldaw, nasurok nga 6,300 ti mangbasbasa iti New World Translation of the Holy Scriptures iti Web site iti aniaman kadagiti sangapulo a lenguahe. Dagiti paborito a libro ti Biblia iti Web site ket ti Salmo, Proverbio, ken dagiti salaysay ti Ebanghelio maipapan iti biag ni Jesus.

Iti kada lawas, adda dagiti napili nga artikulo ti Pagwanawanan wenno Agriingkayo! a mainaynayon iti Web site iti 12 a lenguahe. Dagitoy dagiti espesipiko nga artikulo a nagparang kadagiti nayimprenta a magasin a nairanta nga agpaay iti publiko. Adu dagiti agsalsaludsod maipapan kadagiti patpatientayo, no kasano a maang-angay dagiti gimongtayo, ken no kasano a masupsuportaran ti trabahotayo a panangasaba. Dagiti sungbat kadagita a saludsod ket mabalin a magun-odan dagiti agsirsirarak iti Web site babaen ti pananglukatda iti elektroniko a broshur a Jehovah’s Witnesses​—Who Are They? What Do They Believe? Ti publikasion a The End of False Religion Is Near! ket mabalin a mabasa iti www.watchtower.org iti 252 a lenguahe, agraman dagiti paset ti video iti lima a sign language.

PANANGSAPUL ITI KINAPUDNO ITI INTERNET

Ania dagiti resulta ti pannakaikabil dagita a publikasion iti Web site? Kada aldaw, nasurok nga 60,000 a tattao ti promedio a bilang dagiti mangluklukat iti www.watchtower.org! Adu ti agnanaed kadagiti lugar a manmano dagiti Saksi wenno kadagiti pagilian a maiparit wenno malaplapdan ti trabahotayo. Ngem dagidiay mawaw iti kinapudno mabalinda ti uminum iti makapnek a danum ti kinapudno a magun-odan iti Web site-tayo.

“Pagay-ayatko nga adalen ti Biblia,” kuna ni Bryon, “ngem tunggal mapanak iti simbaan a kaduak dagiti gagayyemko, agkakanta ken agaayam laeng ti ar-aramidenda.” Intultuloy ni Bryon ti panageskuelana ken ti pannakipasetna iti isport. Nagadal iti lima a lenguahe ket nakagun-od iti scholarship iti maysa a kolehio, ngem awan ti nakapennek iti naespirituan a kasapulanna. Gapuna, inkarkararagna a masarakanna ti kinapudno.

“Kasta unay ti panagsapulko kadagiti sungbat,” insalaysay ni Bryon. “Inkeddengko a kitaen ti Saksi ni Jehova iti Internet gapu ta imbaga dagiti Saksi a gagayyemko iti eskuelaan a Jehova ti nagan ti Dios. Linuktak ti Web site ti organisasion ket rinugiak a basaen ti broshur nga Ania ti Kalikaguman ti Dios Kadatayo? Kas resultana, nasungbatan met laengen dagiti saludsodko.” Nagpayadal ni Bryon iti Biblia, napartak a rimmang-ay, ket indedikarna ti biagna ken Jehova idi 2004. Agserserbi itan kas regular pioneer ket mangnamnama a mausarna dagiti naadalna a lenguahe iti panagserbina kas misionero.

“TI DIOS ADDA KADAKAYO”

Anian a makaparagsak a maammuan a rinibribu a tattao “manipud kadagiti amin a pagsasao ti nasnasion” ti inaldaw a mangluklukat iti Web site a www.watchtower.org! Iti inaldaw, adda promedio a 94 a tattao a mangipatpatulod iti form a Would You Welcome a Visit? iti Web site.​—Zac. 8:23.

Ni Denise ti maysa kadagiti nagsaludsod maipapan iti patpatien dagiti Saksi ni Jehova, ngem bumdeng a mapan iti Kingdom Hall iti lugarna. Nupay kasta, nagsirarak iti Internet ket nasarakanna ti www.watchtower.org. Ti impormasion a naammuanna ti nangkombinsir kenkuana a nasarakannan ti kinapudno. Nupay kasta, nagalikaka ni Denise a makipagadal iti Biblia gapu ta ammona a kasapulanna ti agbalbaliw tapno maitunosna ti panagbiagna kadagiti pagalagadan ti Biblia. Namimpat a sinuratanna ti form a Would You Welcome a Visit? iti Web site, ngem iti kada gundaway, saanna nga insubmitir dayta gapu ta bumdeng.

Idi Marso 2007, sinuratan ni Denise ti form iti maikalima a daras. Iti dayta a gundaway, impatulodna ti form nga agkidkiddaw iti sumarungkar kenkuana. Naipatulod ti kiddawna iti kongregasion iti lugarna, ket maysa a kabsat a babai ti dinutokan dagiti panglakayen a sumarungkar ken Denise. Iti las-ud ti umuna a lawas a panagsarungkar kenkuana ti kabsat a ni Vonnie, nangrugin a tumabuno ni Denise kadagiti gimong iti Kingdom Hall.

Idi agngudo ti kalgaw, dinadael ni Denise dagiti narelihiosuan nga alikamenna, nagikkat iti relihionna, ket nagbalin a kualipikado a di bautisado nga agibumbunannag. Napartak a rimmang-ay ni Denise ken uray dagiti dua a babbaritona, ket ti agtawen iti walo nga anakna nagpasalistan iti Teokratiko nga Eskuelaan ti Panagministro. Idi Enero 2008, nabautisaran ni Denise, ken dua a bulan kalpasanna​—eksakto a makatawen kalpasan ti panangipatulodna iti form iti Web site​—nagbalin a kualipikado nga agserbi kas auxiliary pioneer. “No saanak a nagsirarak iti Web site,” kuna ni Denise, “saanko koma a maisalaysay daytoy a kapadasan.”

Idi Enero 2008, adda baro a probision a magun-odan iti Web site a www.pr2711.com​—dagiti audio a bersion ti dadduma a publikasion a mabalin a magun-odan iti 17 a lenguahe. Nagadu ti interesado iti daytoy a probision ket nasurok a maysa a milion a publikasion ken indibidual nga artikulo ti makopkopia iti kada bulan! Adu nga agibumbunannag ti dumdumngeg iti audio dagiti artikulo ti magasin bayat ti panagluganda a mapan iti trabaho wenno eskuelaan.

DAGITI PATARUS A MANGPENNEK ITI PANAGKASAPULAN

Anian a makaparagsak ta tultulongandatayo dagiti anghel bayat nga idagdagadagtayo kadagiti tattao iti “tunggal nasion ken tribu ken pagsasao” nga idayawda ti Dios! (Apoc. 14:6, 7) Tapno matulongan dagiti tattao a mangawat iti mensahe ti Biblia iti lenguahe a talaga a maawatanda, mangpatpataud dagiti Saksi ni Jehova kadagiti literatura iti agarup 450 a lenguahe.

Ti libro nga Ania a Talaga ti Isursuro ti Biblia? ket nabiit pay a nairuar iti lenguahe a Tetum, ti lenguahe iti East Timor, ngem saan nga umdas ti napataud a kopia. Ni Maria, maysa a kabbaro nga agad-adal iti Biblia a mangus-usar iti Indonesian a libro nga Isursuro ti Biblia ket awanan iti Tetum a kopia. Isu a dua nga aldaw a binulodna ti Tetum a libro ti mangyad-adal kenkuana iti Biblia. Iti simmaganad nga aldaw, sirarayray nga imbinsabinsana ti amin a nasursurona. Babaen ti panangusarna iti libro iti mismo a lenguahena, adu a kinapudno ti nalawlawagen a maawatanna ngem iti panagadalna iti Indonesian a libro. Gapuna, ti mangyad-adal saannan nga innala ti impabulodna ken Maria a Tetum a libro. Agtultuloy ti panagadal ken pannakigimong ni Maria.

Iti gobierno ken negosio idiay Kenya, gagangay a maus-usar ti lenguahe nga Ingles ken Swahili. Nupay kasta, kaykayat ti minilion a taga-Kenya ti agsao iti Kikuyu, Kikamba, Luo, ken dadduma pay a lenguahe dagiti umili. Gapuna, dakkel ti naitulong ti pannakapataud dagiti literatura kadagitoy a lenguahe tapno matignay dagiti umili nga agdayaw ken Jehova. Idi rinugian ti Kongregasion ti Siaya nga usaren dagiti literatura ken aggigimong iti lenguahe a Luo, insurat dagiti panglakayen: “Nalawlawagen a maawatan dagiti kakabsat ti maisursuro kadakuada. Ad-adda itan nga agimdeng dagiti ubbing. Sipud idi agus-usarkamin iti Luo a balabala iti panagpalawagmi, immadu iti 60 a porsiento ti makigimgimong.”

Idiay Nicaragua, adu ti agsasao iti lenguahe a Miskito imbes nga Espaniol, ken nasurok a 200 ti timmabuno iti Miskito a kombension distrito. Dadduma ti nangaramid iti dakkel a panagsakripisio tapno makatabunoda. Kas pagarigan, iti bassit nga ili ti Asang iti Coco River, adda 13 a kakabsat a nagaramid iti atiddog a balsa ket dua nga aldaw a naglayagda a nagturong iti ili ti Waspam. Kalpasanna, lima nga oras a nagluganda iti likudan ti trak a nagturong iti siudad a pagkombensionan. Dayta ti damo a kombension distrito a tinabunuan ti kaaduan kadakuada. Maragsakanda a makangngeg iti programa iti bukodda a lenguahe. Gapu ta nagastoda ti amin a kuartada iti siudad a pagkombensionan, dadduma a delegado ti nagdonar tapno adda pagpleteda nga agawid.

Kasta unay ti ragsak dagiti Miskito a nakikombension idi nairuar ti libro nga Ania a Talaga ti Isursuro ti Biblia? iti lenguaheda. Dagiti payunir ti nangnangruna nga agyamyaman unay. Sakbay dayta, us-usarenda ti Espaniol nga Isursuro ti Biblia iti panangyadalda iti Biblia sada ipatarus iti Miskito dagiti parapo ken saludsod. Ita, maipamaysadan nga isuro dagiti kinapudno iti Biblia ta saanen a masapul nga agipatarusda.

Ti Quechua ket maysa a lenguahe dagiti Amerindian idiay South America. Insurat ti sumagmamano nga agibumbunannag a Quechua idiay Peru: “Kalpasan ti presentasionmi, ibagami iti bumalay nga addaankami kadagiti publikasion a Quechua. Kasta unay ti pannakatignay ti dadduma nga uray la a nakaluada ken inagkanda dagiti publikasion.” Insurat ti sanga nga opisina idiay Peru: “Kadagiti lugar a Quechua ti lenguaheda, kasta unay ti panangyebkas ti dadduma a kakabsat iti panagyamanda. Kalpasan a nabasada ti Quechua nga Ania a Talaga ti Isursuro ti Biblia?, kinuna ti maysa a kabsat a naawatanna met laengen ti kababagas ken pateg ti subbot ni Kristo. Dagiti agbasbasa pinatulodanda ti sanga nga opisina kadagiti patatas, empanada, kinarkarton a prutas, ken dadduma pay a banag kas panangyebkas iti panagyamanda.”

Ikagkagumaan met ti organisasion nga ipatarus dagiti literatura kadagiti lenguahe a maus-usar kadagiti naiputputong nga isla iti Pacifico. “Agyamanak ken Jehova ta nalagipnatayo,” kinuna ti maysa a kabsat iti misionera iti isla ti Pohnpei idiay Micronesia. “Sumangsangpet idi kadakami ti Ponapean a Pagwanawanan a sumagmamano a bulan a naladladaw ngem iti Ingles.” Sana inyangaw: “Siguro, naladladaw met a sumangpet kadakami ti Armagedon. Ngem ti panagadalmi ita kadagiti artikulo iti magasin ket maigiddanen kadagiti ad-adalen dagiti kakabsat iti sangalubongan, ken napintas metten dagiti magasinmi a kas iti Ingles. Agyamankami unay iti pannakaseknan ti Bagi a Manarawidwid.”

Maragragsakan dagiti kakabsat idiay Marshall Islands iti makin-amianan a Pacifico iti pannakaipablaak ti baro a pangpubliko nga edision ti Marshallese a Pagwanawanan. Pagay-ayat dagitoy a kakabsat ti agbasa kadagiti pakasaritaan ti biag, ngem dagiti dati nga edision Ti Pagwanawanan ket awanan iti umdas nga espasio para kadagiti pakasaritaan ti biag, isu a kasapulan nga adda mangipatarus kadagita a salaysay manipud iti Ingles a magasin. Gapuna, anian a ragsakda idi damo a nagparang ti pakasaritaan ti biag iti pangpubliko nga edision iti mismo a lenguaheda. Kinuna ti maysa a 16 anyos nga agbasbasa iti magasin: “Adun a tawen a buybuyaek dagiti ladawan kadagiti pakasaritaan ti biag iti Ingles a magasin ken tinartarigagayak a mabasak koma ti artikulo. Ita, mabasak met laengen.”

Mabalin nga agbalbaliw ti biag ti maysa a tao no mabasana ti uray maysa laeng a publikasion iti lenguahena. Iti maysa a pagilian iti Makintengnga nga Asia a sadiay maiparit ti trabahotayo, nasaknap a naiwaras ti broshur nga Ania ti Kalikaguman ti Dios Kadatayo? Maysa nga agkabannuag a lalaki a nakagun-od ken nangbasa iti daytoy a broshur ti natignay nga uray la a napan iti karayan iti asideg ket “binautisaranna” ti bagina. Idi naammuanna a kasapulanna ti agpayadal iti Biblia, si-gagagar a nagpayadal ket di nagbayag, nabautisaran iti umiso a pamay-an. Mangbusbusbos itan iti adu a tiempo a mangikaskasaba iti naimbag a damag.

PANAGRANG-AY TI PANANGIPATARUS ITI BIBLIA

Ipatpateg dagiti Saksi ni Jehova ti Biblia a Sao ti Dios ket mabigbigda a masapul nga umiso ken nalawag ti pannakaipatarus dayta. Gapuna, maragsakan ti ili ti Dios ta addaandan iti Biblia a Baro a Lubong a Patarus a kompleto wenno pasetna, iti nasurok a 70 a lenguahe. Nupay makapagagar ti damo a pannakairuar ti Biblia, ti talaga a mangtignay iti puspuso dagiti tattao ken mangpasayaat iti panagpampanunotda ket ti inaldaw a panangusar iti dayta iti personal a panagadal, kadagiti gimong iti kongregasion, ken iti tay-ak ti ministerio.

Adu a surat ti panagyaman ti maaw-awat ti sanga nga opisina iti Russia gapu iti kompleto a Ruso nga edision ti Baro a Lubong a Patarus. “Nupay namin-adun a nabasak ti Biblia,” insurat ti maysa a babai, “kasla damdamok ti agbasa iti Biblia no basaek daytoy a patarus! Makaluaak ken kasta unay ti ragsakko gapu iti makatignay iti puso a mensahe ti Biblia.”

Gapu iti kinalawag ti patarus, maysa pay nga agbasbasa ti natignay a nangyebkas: “Kalpasan ti panangbasak iti Genesis kapitulo 18 ita nga aldaw, natignayak nga agsurat kadakayo. Nagutugotak unay iti pannakisarita ni Abraham ken Jehova, a nairekord iti bersikulo 23-32. Nupay basbasaek ti Biblia iti maikaliman a daras, daytoy ti damo a gundaway a pinagpanunotnak dayta a panagsarita. Maawatak ti rikna ni Abraham ket “tinimudko” a naimbag ti saritaanda ken Jehova. Nakaluaak iti kinamanagimdeng ni Jehova. Nagbalin a kasla agpaypayso ti situasion gapu iti daytoy a patarus. Saanko la a naammuan dagiti galad ni Jehova no di ket personal pay a nariknak dagita.”

“Pagyamanan iti kompleto a Baro a Lubong a Patarus!” insurat ni Svetlana manipud Moscow. “Saankamin a mariro a mangbasa iti ‘Daan a Tulag’ gapu ta ti basbasaenmin ket ti simple a patarus, saanen a ti daan ken makatikaw a patarus!”

Insurat ti sabali pay nga agbasbasa: “Iti pagtrabahuak, kaskasabaak ti trabahadorko a ni Irina. Idi damo, adawek laeng dagiti teksto. Ngem idi inukagko ti Bibliak tapno ipakitak kenkuana ti modelo a kararag ni Jesus, insaludsodna, ‘Isu kadi daytoy ti ikarkararagtayo nga Amami?’ Idi nabasana ti sasao ni Jesus, uray la nagrimat dagiti matana iti ragsak bayat a kinunana: ‘Nagsayaaten! Naglawag ti pannakaibagana! Masansan a mangngegko daytoy a kararag ngem diak pulos naawatan. Ngem ditoy, nalawag ken simple ti pannakaibagana! Kayatko ti maaddaan iti kastoy a Biblia! Mabalin kadi nga iyalaannak iti kastoy a Biblia?’ Ngem kinunak, ‘Dagiti laeng interesado nga agbasa iti Biblia ti ipapaayanmi iti Biblia.’ Sipapasnek nga insungbatna: ‘No idi, talaga a diak pulos agbasbasa iti Biblia. Impadawatko pay ketdin amin dagitay sumagmamano a Bibliak. Ngem ita, talaga a kayatkon ti agbasa iti Biblia!’”

Insurat ti maysa a kabsat a lalaki maipapan iti Ukranio a Baro a Lubong a Patarus ti Kristiano a Griego a Kasuratan: “Kayatko nga iyebkas ti panagyamanko gapu iti daytoy nagsayaat a sagut manipud ken Jehova ken ti organisasionna. Maragragsakanak a mangbasa iti tunggal panid, ken itugtugotko daytoy a Biblia iti sadinoman. Simple ken maawatan ti sasao a nausar. Immukuok dagiti sasao iti pusok ken nalakak a maawatan ti amin a mainaig kadagiti pannursuro ti Biblia.”

Adu met ti nangapresiar iti Serbiano ken Croatiano nga edision. “Naglaka a basaen,” insurat ti maysa a Croatiano a kabsat a babai, “ken nalaklaka nga amang a maawatan ngem iti Biblia nga adun a tawen nga us-usarenmi. Nalaklakan nga umukuok iti pusok dagiti balakad ti Kasuratan, ken mariknak nga umun-uneg itan ti pannakaammok ken Jehova.”

Idi Nobiembre 2, 2007, ni Kabsat Geoffrey Jackson a kameng ti Bagi a Manarawidwid inruarna ti Samoano nga edision Ti Baro a Lubong a Patarus ti Kristiano a Griego a Kasuratan. Manmano ken nangina idi dagiti kopia ti daan a Samoano a Biblia, isu a maragsakan unay dagiti kakabsat ta nalakan a magun-odanda ti Biblia. Kalpasan ti panangusarna iti Biblia iti sumagmamano a bulan, kinuna ti maysa nga agibumbunannag, “Ti daan a patarus ti Biblia kasla kullaapanna dagiti idea, ngem ti baro a patarus ibuksilanna dagiti kapanunotan, a pagbalinen dagita a nalawlawag.”

Iti maysa a panagadal iti Biblia, nadakamat ti Santiago 4:8 iti publikasion a maad-adal. Insalaysay ti kabsat a babai a mangyad-adal: “Imbagak iti bumalay a nupay ammomin dayta a teksto, rumbeng a basaenmi dayta iti Baro a Lubong a Patarus. Impagarupmi a biddut ti teksto a basbasaenmi ngem idi sinukimatmi, naammuanmi nga umiso ti teksto. ‘Nabaliwan ti teksto,’ makmaklaat a kinuna ti kaduak a nangyadal. Iti daan a patarus ti Biblia, saan a naibatad ti punto a ti ‘iyaadani’ kaipapananna a nasken a maaddaankami iti nasinged a relasion ken Jehova, ngem nalawag a maawatanmi dayta itan. Dinanonna a talaga ti pusomi ken ginutugotnakami a mangpatanor iti nasinged a relasion ken Jehova.”

Di nagbayag kalpasan a nairuar ti Tsino a Baro a Lubong a Patarus, insurat dagiti misionero nga agserserbi idiay Taiwan: “Naaddaankami iti gundaway a mangyam-ammo iti Baro a Lubong a Patarus iti maysa nga abogado a pagaayatna ti agbasa a regular kadagiti magasintayo. Kayatna a maammuan no apay a kasapulan ti baro a patarus. Idi impakitami ti sumagmamano laeng a teksto, nagutugot ti abogado, ken kinunana a nalaklaka a maawatanna ti baro a patarus ngem ti Biblia a Union Version a nabayagen a basbasaenna.” Imparangda pay ti baro a patarus iti kameng ti Parliamento, ket imbatina dayta iti opisinana. Maysa a komentarista iti radio a manangbabalaw kadagiti Saksi ni Jehova ti nakakita iti dayta ket binasana ti sumagmamano a paset. Nagustuanna ti patarus isu a tineleponuanna dagiti misionero tapno agkiddaw iti kopia dayta a Biblia.

Adda maysa a Kirghiz a kabsat a babai a marigatan nga agbasa gapu ta adda parikut iti matana isu a makauma kenkuana ti agbasa iti Biblia. Ngem nagbalbaliw ti riknana idi maaddaan iti Baro a Lubong a Patarus ti Kristiano a Griego a Kasuratan iti lenguahe a Kirghiz. Maragragsakan itan a mangbasa iti Biblia gapu iti simple ken nalawag a patarus.

“Nagsayaat dayta a patarus!” kinuna ti maysa a kabsat a babai. “Saanak nga agbeddal no basaek dayta iti napigsa. Kayatko nga ulit-uliten a basaen dayta. Mariknak a kasla mangrugrugiak manen nga agadal iti kinapudno.”

Iti suratna iti Bagi a Manarawidwid, kastoy ti kinuna ti maysa a kabsat a babai a di unayen makangngeg: “Magusgustuak ti Ebanghelio ni Mateo iti American Sign Language (ASL). Nabiag ti Biblia ket tigtignayenna ti pusok itan. Makitak ti personalidad, ekspresion ti rupa, kinaimbag, ken nasged nga ayat ni Jesus kadagiti tattao. Magusgustuak ti ASL ti libro a Mateo. Ngem . . . di la mabalin a parpartakanyo nga aramiden dagiti dadduma nga ASL ti libro ti Biblia?”

Nalawag, ti Biblia nga umiso ti pannakaipatarusna ikkatenna ti aniaman a mangkulkullaap iti kababagas ti Sao ti Dios, a pagraniagenna ti mensahe ti kinapudno agingga iti puso ti agbasbasa. Gapuna, dagidiay agtartarigagay nga umadani iti nailangitan nga Amada maragsakanda unay no magun-odanda ti Baro a Lubong a Patarus iti mismo a lenguaheda​—ti lenguahe a makagutugot iti pusoda.

AD-ADU A TRABAHADOR TI NAIBAON TAPNO AGANI

Kas resulta ti panangpasimple kadagiti trabaho kadagiti sanga nga opisina, adu a kameng ti pamilia ti Bethel iti Estados Unidos ti naawis nga agserbi iti sabali nga annongen. Nupay dadduma ti naibaon kadagiti sanga nga opisina iti sabali a pagilian, sumagmamano a gasut ti naibaon kas special pioneer ken regular pioneer iti nagduduma a paset ti pagilian. Ania ti riknada idi nabaliwan ti annongenda? Kasano a napagballigianda dagiti karit iti baro nga annongenda? Kasano a nagunggonaan dagiti kongregasion?

Kinuna da Todd ken Leslie: “Adun a tawen nga ipakpakaasimi ‘iti Apo ti panagani a mangibaon kadagiti trabahador iti paganianna.’ Ngem dimi ammo a karamankami kadagiti maibaon kas sungbat ti pakaasi! Ita, naamirismi a ni Jehova ti mangiturturong iti bambanag, ket mariknami a maysa a pribilehio nga ‘imbilangnakami ni Kristo a matalek babaen ti panangtudingna kadakami iti maysa a ministerio.’”​—Mat. 9:37, 38; 1 Tim. 1:12.

Maipapan iti umuna a sumagmamano a bulan a binusbosda ken baketna iti baro nga annongenda, kinuna ni Franco: “Dimi pulos impagarup ken baketko a nagdakkel pay la gayam ti pakasapulan kadagiti manangaskasaba idiay Estados Unidos. Idi nakasangpetkami iti teritoriami, nagadu ti nasarakanmi a mayat nga agpayadal iti Biblia.” Kas panangyebkas iti rikna ti adu kadagitoy a payunir, kinuna da Curtis ken Karolynne: “Maragsakankami a mangawat iti annongenmi iti tay-ak! Nangted daytoy iti gundaway tapno maipakitami ken Jehova a talaga a napudnokami idi tinallikudanmi ti bagbagimi ken insakripisiomi ti biagmi kenkuana babaen ti panagdedikarmi.”

PANAGTALEK ITI “APO TI PANAGANI”

Siempre, adda latta pakadanagan dagidiay maibaon iti tay-ak kalpasan ti adu a tawen a panagserbida iti Bethel. “Kabaelanminto ngata ti agabang iti pagnaedanmi?” insaludsod ti maysa nga agassawa, “ken yantangay agibumbunannagkami laeng ita, kasanonto a maragpatmi ti 120 wenno 130 nga oras iti tay-ak ti serbisio iti kada bulan ken agbalinkami a makaparegta iti kongregasion?” Ania ti inaramid daytoy nga agassawa ken ti dadduma iti sidong ti baro a kasasaad?

Dadduma ti nakasapul iti di nangina a pagnaedan iti maudi nga aldaw a panagsapulda iti pagdagusanda lugar a naituding a pagserbianda. Kas pagarigan, ti balasang nga agnagan Jessica napan iti teritoriana ket dua a lawas a nagsapsapul iti pagnaedanna ngem awan ti nabirokanna. Iti aldaw sakbay ti naituding a panagsublina iti Bethel tapno iyakarna koman dagiti alikamenna, kasta unay ti ragsakna idi intukon ti maysa a panglakayen ti panagnaedna iti bassit a balay a mabalinna nga abangan iti bassit a kantidad.

Da Jeff ken Cynthia dinakamatda iti manedyer ti maysa nga apartment a maysada kadagiti Saksi ni Jehova. “Am-ammok dagiti Saksi ni Jehova,” kinuna ti manedyer, “ket ammok nga awan ti rumbeng a pagdanagak kadakayo. Masiguradok nga agbayadkayo ta tulongannakayo ni Jehova!”

“Dagiti kapadasan a kas kadagiti kapadasanmi ipalagipna kadakami a nasken a kanayon nga agpannuraykami ken Jehova,” kinuna ni Eric ken Melonie. “Makitami nga inaldaw a tultulongannakami ni Jehova. Talaga a napabileg ti pammatimi gapu iti dayta.”

MANANGSUPORTAR A KONGREGASION

Ti naayat a suporta dagiti kongregasion ket dakkel a nakatulong kadagitoy a payunir tapno mairuamda iti baro nga annongenda. Inreport ti maysa a manangaywan iti sirkito nga adu a kongregasion ti mangipatpateg “kadagiti ing-ingungotenmi nga special pioneer.” Innayonna, “Inabrasa ken tultulongan ida ti intero a sirkito.” Siyayaman nga insurat ti maysa a kabsat: “Kayatko nga ibaga iti sanga nga opisina, ‘Pagyamanan.’ Nagdakkel a bendision kadakami amin dagitoy a payunir!”

Ti maysa a kongregasion idiay Kansas ket addaan iti 100 a teritoria nga adun a bulan a saan a nakaskasabaan. Babaen ti tulong ti maysa nga agassawa nga special pioneer, regular itan ti panangasaba iti kaaduan kadagita a teritoria. “Saanmi a pulos impagarup a makagunggona unay daytoy nga urnos,” insurat dagiti panglakayen.

Bayat a nagbalin dagiti kongregasion a “makapabileg a tulong” kadagiti payunir, nagunggonaan met a mismo dagiti lokal nga agibumbunannag. (Col. 4:11) Inreport ti maysa a manangaywan iti sirkito, “Talaga a naparegta ken natignay dagiti kakabsat a lallaki ken babbai gapu iti regta ken ganaygay dagiti payunir.” Insurat ti maysa pay nga agdaldaliasat a mana-ngaywan, “Nakadkadlaw unay ti ayat ken rag-o dagiti special pioneer, isu a naparegta ti dadduma a mangiparangarang met kadagita a galad.”

Maysa nga agassawa ti nakatulong iti sangapulo a kakabsat tapno agbalinda manen nga aktibo nga agibumbunannag. Kasta met, nagsayaat ti epekto ti panagserbi ti dadduma kas panglakayen. “Makapabang-ar ti kaadda dagiti balanse ken nasanay a kakabsat iti kongregasion,” insurat ti maysa a panglakayen. “Dagita ti talaga a kasapulan ti kongregasion ken ti bagi dagiti panglakayen.”

‘KATRABAHUAN TI DIOS’

Pinaraburan ni Jehova dagiti mangikaskasaba iti Pagarian iti adu a naragsak a kapadasan. Kas pagarigan, bayat ti tiempo ti lam-ek, nagbalaybalay da Steve ken Gaye. Iti umuna a balay, nakairugida iti maysa a panagadal iti Biblia iti maysa a malmalday a lakay. Iti uneg ti dua a lawas, nakigimongen iti Kingdom Hall, a sadiay nga inyebkas ti agassawa ti panangapresiarda iti kinasingpetna gapu ta pinastrekna ida iti damo nga isasarungkarda. “Inawiskayo a sumrek saan a gapu ta nasingpetak,” insungbatna. “Inawiskayo a sumrek gapu ta ammok nga umaykayo. Tallo nga aldaw idin nga ikarkararagko nga adda koma tumulong kaniak.” Regular itan a makigimgimong ken rumangrang-ay tapno agbalin a kualipikado iti bautismo.

Iti maysa nga agsapa, bayat nga agmanmaneho ni Ray a kaduana ni Jill a baketna, adda nakitada a lalaki a magmagna iti igid ti bangir a kalsada ket inkeddengda a kasarita. Nangipakitada iti literatura ken intukonda iti lalaki ti panagadal iti Biblia. Innala ti lalaki dagiti magasin ken inlawlawagna a makipagad-adal idi kadagiti Saksi ni Jehova. Nabiit pay nga immakar iti dayta a lugar ket siraragsak nga immanamong nga agpayadal manen iti Biblia.

Amin nga agtultuloy nga agsaksakripisio iti panagserbida ken Jehova ammoda a ‘saan a nakillo ti Dios tapno lipatenna ti aramidda ken ti ayat nga ipakpakitada maipaay iti naganna.’ (Heb. 6:10) No kasano a ti bagi ti tao addaan iti adu a paset a tunggal maysa ket mangipaay iti kasapulan, tunggal kameng ti kongregasion adda met maipaayda a mangparang-ay ken mangpapintas iti espiritualidad ti kongregasion. “Ti Dios insaadna dagiti kameng iti [kongregasion], tunggal maysa kadakuada, kas iti kinayatna,” ket gapu iti panagregget ti tunggal kameng a makitinnulong, “amin dagiti dadduma a kameng agrag-oda.” (1 Cor. 12:18, 26) Daytoy a panagtutunos dagiti ‘katrabahuan ti Dios’ mangyeg iti pakaidayawan ni Jehova, a “nangpadpadakkel iti dayta.”​—1 Cor. 3:6, 9.

LEGAL A PANANGIPASDEK ITI NAIMBAG A DAMAG

Kinuna ni Jesus kadagiti apostolna: “Puntiriakayto ti pananggura dagiti amin a tattao maigapu iti naganko.” (Mat. 10:22) Ekspektaren dagiti pudno nga adalan a dagiti bumusbusor ‘siuulbod a sawenda ti tunggal kita ti nadangkes a banag maibusor kadakuada maigapu kenkuana.’ (Mat. 5:11) Ania ti inaramid dagiti moderno nga adalan ni Kristo tapno ‘legal a maipasdek ti naimbag a damag’?​—Fil. 1:7.

Armenia

Iti nagbaetan ti Abril 2007 ken Abril 2008, dagiti opisial ti aduana (custom) idiay Armenia dida kayat a paluspusan ti nasurok a pito a tonelada a Biblia ken naibatay-Biblia a literatura malaksid no mabayadan dagiti nakanginngina a buis. Idi Abril 2008, naited met laeng kadagiti kakabsat ti umuna a naibiahe a literatura kalpasan a nabayadan dagiti nangina unay a buis a singsingiren ti aduana, ngem ik-ikutan pay laeng ti aduana ti dadduma a kargamento. Mangar-ramid dagiti kakabsat kadagiti legal a tignay tapno marisut ti parikut.

Kazakhstan

Dua a kakabsat manipud iti sangalubongan a hedkuarter dagiti Saksi ni Jehova, a napan idiay Kazakhstan tapno paregtaenda dagiti kakabsat sadiay, ti naarestar kalpasan ti maysa nga espesial a panagtataripnong idiay Almaty. Naipanda iti estasion ti polis, napalutpotda, sada naisaklang iti administratibo a pangukoman ti maysa a hues a nangikeddeng a nagbasolda gapu iti “panagmisionero.” Nupay nawayawayaanda idi agangay, maipampamuspusan pay laeng ti pannakaabsueltoda. Kadagitoy nabiit, agtultuloy a rarauten dagiti autoridad dagiti pagtaengan dagiti kakabsat tapno masinga ti panagtataripnong maipaay iti panagkararag ken panagadal iti Biblia. Sinuspende dagiti korte dagiti narelihiosuan nga aktibidad ti tallo a kongregasion a legal a nairehistro. Kasta met, iti maysa a rehion iti amianan ti Caspian Sea, dagiti aktibidad dagiti Saksi ket maulit-ulit a sininga dagiti ahensia a mangipatpatungpal iti linteg.

Tajikistan

Ti Religious Community of Jehovah’s Witnesses idiay Tajikistan ket legal a nairehistro idi 1994, a nangted kadakuada iti wayawaya nga agtataripnong tapno agdayaw. Ngem idi Oktubre 11, 2007, nangipaulog ti ministry of culture iti pangngeddeng a mangiparparit iti panagdayaw dagiti Saksi ni Jehova. Pagregreggetan dagiti kakabsat a paneknekan kadagiti autoridad a managayat iti talna dagiti Saksi ni Jehova ken saanda a pangta iti urnos ti publiko.

Uzbekistan

Umir-irteng ti kasasaad dagiti Saksi ni Jehova idiay Uzbekistan. Idi rugrugi ti 2008, maysa kadagiti Saksi ni Jehova ti nasentensiaan a maibalud iti uppat a tawen iti kampo ti inkapilitan a panagtrabaho kas resulta ti panangalagadna iti pammatina. Dadduma ti naarestar, naibalud, nasentensiaan, ken namulta gapu iti panaglabsing kadagiti linteg ti gobierno mainaig kadagiti narelihiosuan nga organisasion ken kadagiti regulasion mainaig iti panangisuro iti narelihiosuan a patpatien. Dagiti autoridad rinautda dagiti panaggigimong, sinukimatda dagiti pribado a balay, kinumpiskarda dagiti literatura, ken imbaludda dagiti agibumbunannag. Adu kadagiti kakabsattayo ti binugbugkawan ken rinanggasan dagiti polis.

Impalgak ti adu nga opisial iti daytoy a rehion a ti lokal a klero ti nangisungsong kadagita a kinadakes. Itultuloytayo nga ikararag a di agbayag maamiristo dagiti autoridad dagiti di nasayaat a tignayda ket palubosanda dagiti kakabsat nga ‘agbiag a natalinaay ken naulimek buyogen ti naan-anay a nadiosan a debosion ken kinaserioso.’​—1 Tim. 2:1, 2.

Grecia

Dua a paborable a desision ti impaulog ti nangato a pangukoman idiay Grecia mainaig iti kalintegan dagiti indibidual nga agkedked nga agsoldado maibatay iti konsiensiada wenno iti narelihiosuan a patpatienda. Ni Konstantinos Kotidis ket nagserbi idi iti puersa militar iti Soviet Union sumagmamano a tawen sakbay nga immakar idiay Grecia ken nagbalin a maysa kadagiti Saksi ni Jehova. Idi a dagiti autoridad inayabanda ni Kabsat Kotidis tapno agserbi manen iti militar, kiniddawna nga ikkanda laengen iti alternatibo a trabaho kas sibilian ngem dida pinatgan. Impettengda a gapu ta nakapagserbi idin iti militar, dinan mabalin ti agkedked maibatay iti konsiensiana. Ngem impaulog ti Council of State a ti maysa nga umili a nagserbi idi iti militar ngem agkedked itan ta saanen nga ipalubos ti konsiensiana gapu iti narelihiosuan a patpatienna ket mapalubosan a mangaramid iti sabali a trabaho kas maysa a sibilian.

Iti sabali a kaso, ni Stylianos Ioannidis ket saan a naawat iti trabaho iti maysa a publiko nga institusion agsipud ta naibalud gapu iti panagkedkedna idi nga agsoldado maibatay iti konsiensiana ket saanna a naitungpal amin dagiti obligasionna iti militar. Ngem inkeddeng ti Council of State a no ti maysa a nagkedked nga agsoldado maibatay iti konsiensiana ket naikaronan ti sentensia a pannakaibalud, addaanen iti pagibatayan tapno mailaksid iti serbisio militar. Kinuna pay ti pangukoman a permanente metten a narisut ti obligasionna iti militar ket ngarud awanen ti makagapu tapno saan a maawat iti trabaho a maipaay iti publiko. Daytoy ti damo a gundaway a nangngeddeng ti Council of State ti Grecia maibatay iti wayawaya ti relihion a kapadpada ti nangibatayan ti European Court of Human Rights idi tinamingna ti kaso ti maysa a Saksi ni Jehova a saan a naawat iti trabaho gapu iti panagkedkedna nga agsoldado maibatay iti konsiensiana.

Eritrea

Agtultuloy ti naulpit ken di nainkalintegan a panangtrato kadagiti kakabsattayo idiay Eritrea. Adu a Saksi ni Jehova ti imbalud dagiti autoridad kadagiti kampo, ket nakaay-ay-ay ti kasasaad ti dadduma kadakuada. Idi Hulio 2008, adda manen inarestarda nga innem a kakabsat, agraman ti sumagmamano a panglakayen a mangiwanwanwan kadagiti kakabsat iti daytoy a pagilian. Iti laksid ti adu a panagregget ken sangalubongan a panagapela, nagtultuloy a determinado ti gobierno a mangbusor iti panagdayaw ti ili ni Jehova.

South Korea

Adda positibo a panagbalbaliw idiay South Korea, a ti gobiernona saanna a kayat a bigbigen ti napateg a kalintegan ti tao nga agkedked nga agsoldado maibatay iti konsiensia. Nasurok a 13,000 kadagiti kakabsattayo ti naibalud iti naglabas a 50 a tawen, ken mapattapatta a 500 pay ti nakabalud. Ti determinasion ken Nakristianuan a kababalinda ket nakaipaay iti nagsayaat a pammaneknek kadagiti autoridad iti pagbaludan ken iti gobierno, a nangyeg iti pakaay-aywan ni Jehova a Dios. (1 Ped. 2:20) Ita, 488 nga apela ti naisumite iti Human Rights Committee ti United Nations, a paborable a nangngeddeng iti dua nga apela idi 2006. Kabayatanna, mangnamnama dagiti kakabsattayo nga itultuloy ti gobierno ti panggepna a mangpanday iti linteg a mangipalubos a maikkan iti sabali a trabaho dagiti agkedked nga agsoldado.

Rwanda

Amin a mannursuro idiay Rwanda, agraman ti adu a Saksi ni Jehova, nakalikagumanda a tumabuno iti maysa a seminar mainaig iti panangisuro idi Abril 2008. Awan ti naipaay a konsiderasion iti siasinoman a di makipaset kadagiti aktibidad a maisalungasing iti sinanay-Biblia a konsiensiada. Kas resultana, agarup 215 a Saksi ti naikkat iti trabahoda gapu ta dida timmabuno, ken dua a kabsat a babbai ti naibalud iti sumagmamano a lawas. Nairaman iti seminar dagiti napolitikaan ken namilitariaan a bambanag, ket dagiti timmabuno nabilinda a makipaset kadagiti napolitikaan nga aktibidad ken nasionalistiko a seremonia. Linapdan dagiti soldado ti siasinoman a nangpadas a mangpanaw iti seminar. Sipud idin, 90 nga annak dagiti Saksi ni Jehova ti naikkat iti eskuelaan gapu ta dida nakipaset iti kanta ti pagilian wenno panagsaludo iti bandera. Mangnamnamatayo a pabilgen ni Jehova dagiti kakabsattayo ken dagiti annakda tapno mataginayonda ti kinatarnawda iti laksid daytoy nabiit pay a panangidadanes.

Espania

Ti gobierno ti Espania inaprobaranna ti maysa a pammilin ti palasio mainaig kadagiti Saksi ni Jehova nga adda iti espesial nga amin-tiempo a serbisio, kas kadagiti kameng ti pamilia ti Bethel ken dagiti agdaldaliasat a manangaywan. Iti opisial a pakaammo, nabigbig dagiti espesial nga amin-tiempo nga adipen kas “ordinado a ministro . . . a nangidedikar iti bagbagida maipaay laeng iti panagmisionero wenno panagipastor, iti narelihiosuan a panangisuro, wenno iti dadduma a nasken nga aktibidad a nairanta a mangsuporta kadagiti panggep ti relihionda.” Naipaulog daytoy a pammilin iti tiempo a dagiti autoridad iti dadduma a pagilian kueskuestionaranda no dagiti met laeng espesial nga amin-tiempo nga adipen a Saksi ni Jehova ket pudnoda a ministro a maikari kadagiti benepisio a maipapaay iti dadduma a narelihiosuan a grupo.

TI EUROPEAN COURT OF HUMAN RIGHTS

Dagiti Saksi ni Jehova idiay Armenia, Austria, Azerbaijan, France, Georgia, Russia, Turkey, ken Ukraine addaanda iti pakadagupan a 24 nga apela iti European Court of Human Rights (ECHR) idiay Strasbourg, France. Dagiti apela ket mainaig kadagiti kangrunaan a kalintegan dagiti umili nga adda iti sidong ti European Convention on Human Rights, kas iti kalintegan nga agkedked nga agsoldado maigapu iti konsiensiada. Ti dadduma a darum ket nainaig iti panangidadanes ken diskriminasion gapu iti relihion, panangwaswas iti pannakairehistroda wenno di panangbigbig iti legal a korporasion nga us-usaren dagiti Saksi ni Jehova a mangorganisar iti trabaho, panangsinga ti gobierno iti kalintegan nga agtataripnong a sitatalna tapno agdayaw, ken ti kalintegan ti maysa nga ina a mangpadakkel iti anakna kas maysa kadagiti Saksi ni Jehova.

Austria

Maysa a paborable a desision ti impaulog ti ECHR idi Hulio 31, 2008, iti kaso a Jehovah’s Witnesses v. Austria. Kinuna ti korte a ti linteg ti Austria linabsingna ti kalintegan dagiti Saksi ni Jehova nga agdayaw a siwayawaya gapu iti panangan-annurotna iti manangidumduma a sistema, a namataud iti klase dagiti nababbaba a relihion, isu nga adda metten dagiti mamatmatan a nababbaba a klase nga umili. Naipaulog daytoy a desision kalpasan ti 30 a tawen a panagregget dagiti kakabsat a gumun-od iti legal a takder kas narelihiosuan a kagimongan iti Austria. Inkeddeng ti korte: “Saan a pulos a nainkalintegan [ti kasta a nakaun-unday a panaguray] iti biang dagiti relihion, a kas kadagiti Saksi ni Jehova, a nabayagen ti kaaddada iti intero a lubong ken nabayag metten a naipasdek iti daytoy a pagilian ket ngarud pagaammon dagiti autoridad.” Naikalikagum itan iti gobierno ti Austria a balbaliwanna dagiti paglinteganna tapno maipaay met kadagiti kakabsat dagiti kalintegan a tagtagiragsaken dagiti dadakkel a relihion iti Austria.

Azerbaijan

Idi Nobiembre 2007, maysa a darum ti naidatag iti ECHR maigapu iti pananglabsing ti polisia iti kalintegantayo nga agdayaw a siwayawaya. Nupay legal a nairehistro dagiti Saksi ni Jehova idiay Azerbaijan, makapadanag ti umad-adu a panangarestar ken panangmaltrato kadagiti kakabsattayo. Dadakkel a grupo dagiti armado a polis ti nangraut kadagiti natalna a panaggigimong dagiti Saksi ni Jehova, kinumpiskarda dagiti literatura ken pribado a sanikua, inarestar ken imbaludda dagiti nakigimong, ken binugbugkawan ken rinanggasanda dagiti kakabsat a lallaki ken babbai. Gapu ta agtultuloy ti iraraut dagiti polis, inkabilangan ti korte ti kinaganat ti situasion ket pinapartak daytoy ti panangrepasona iti kaso. Mangnamnamatayo a din agbayag, mapalubosanton dagiti kakabsattayo nga agtataripnong a sitatalna, nga awan ti pagbutbutnganda nga iraraut dagiti polis.

Francia

Idi Pebrero 2005, maysa a darum ti naidatag iti ECHR mainaig iti di nainkalintegan ken ilegal nga ar-aramiden ti gobierno ti Francia a panagsingir iti buis iti Asosasion dagiti Saksi ni Jehova idiay Francia. Ur-urayentayo pay no umanamong ti korte a mangikabilangan iti kaso. Kabayatan dayta, dagiti bumusbusor pinagbalinda a dakes ti patpatientayo isu a napasamak ti agarup 70 nga insidente ti ingagara a panangdadael kadagiti Kingdom Hall bayat ti naglabas a tawen. Nupay kasta, agtultuloy a mangnamnama dagiti kakabsat idiay Francia nga asidegen nga ikeddeng ti korte a ti gobierno ket nagbalin a manangidumduma, ket iti kasta, maipaayan dagiti Saksi ni Jehova iti kinatalged iti daytoy a pagilian.

Russia

Idi Disiembre 2001, dagiti Saksi ni Jehova idiay Russia nangidatagda iti reklamo iti ECHR maipapan iti maulit-ulit a kriminal ken sibil a pannakaidarum dagiti Saksi ni Jehova. Idi Hunio 2004, ti Moscow City Court sinuportaranna ti desision ti nababbaba a pangukoman a mangiparit iti aktibidad dagiti Saksi ni Jehova idiay Moscow ken maikkat ti legal a korporasionda. Iti kaaduan a paset ti Moscow, makapagtataripnong pay met latta dagiti kakabsat tapno aggigimong ken makiraman iti panangikasaba iti naimbag a damag ti Pagarian. Ngem iti Moscow ken iti dadduma a paset ti Russia, adu latta ti aramid dagiti autoridad a panangsinga kadagiti gimong ken asamblea agraman ti dadduma a di nainkalintegan a panangtrato kadagiti kakabsattayo. Kas pagarigan, idi Hulio, iti ili ti Chekhov, agarup 60 a kilometro iti abagatan ti Moscow, inggagara a pinuoranda ti Kingdom Hall dagiti Saksi ni Jehova. Nupay dagus a naawagan ti estasion dagiti bombero, impakaammo dagiti nakasaksi a saan a nagtignay dagiti bombero tapno masebseban ti apuy, ken nagkedked ti polisia a mangimbestigar a dagus iti napasamak. Iti laksid dagiti rigat ken ibubusor, nagtalinaed a matalek dagiti kakabsattayo idiay Russia ken nagpannurayda iti tulong ni Jehova.

Inkari ni Jehova a saan nga agballigi ti aniaman nga igam a mapataud maibusor kadagiti adipenna. (Isa. 54:17) Uray dagiti kadadaksan a pasamak mabalin nga agresulta iti “pannakaisaknap ti naimbag a damag.” Gapuna, determinado dagiti adipen ti Dios nga agtultuloy nga ‘agtakder a sititibker iti maymaysa nga espiritu, agraman iti maymaysa a kararua nga umag-agawa nga agdadanggay a maipaay iti pammati iti naimbag a damag, ket iti aniaman a pamay-an saan a mabutbuteng kadagiti kabusorda.’ (Fil. 1:12, 16, 18, 27, 28) Pangngaasiyo ta ‘itultuloyyo nga ikararagan’ dagiti kakabsattayo iti intero a lubong bayat nga agtaltalekda ken Jehova kas ‘salindeg ken Manangilisi kadakuada.’​—2 Tes. 3:1; Sal. 18:2.

PANANGIDEDIKAR KADAGITI SANGA NGA OPISINA

Kasta unay ti rag-o iti sanga nga opisina ti South Africa idi Sabado, Nobiembre 10, 2007, idi agarup 4,000 a kakabsat ti naguummong para iti dedikasion ti napadakkel a pagimprentaan, panganan, ken pagnaedan.

Naragsakan dagiti sangaili a nakakita iti MAN Roland Lithoman iti napalawa a pagimprentaan bayat ti nagpartak a panangpataudna iti pinullo ribu a kopia ti Biblia ken dagiti naibatay-Biblia a literatura. Ti baro a bookbindery ket nakapatauden iti nasurok a maysa a milion a kopia ti Baro a Lubong a Patarus iti 16 a lenguahe ti Africa. Naipakita kadagiti sangaili dagiti napalawa a pasilidad ti shipping department a pakaipempenan dagiti naibatay-Biblia a literatura nga us-usaren ti nasurok a 8,000 a kongregasion iti sangapulo a pagilian iti makin-abagatan nga Africa.

Idi Hunio 7, 2008, ti kanayonan a pasilidad ti sanga nga opisina idiay Nigeria ket naidedikar idiay Lagos, a 360 a kilometro iti abagatan a laud ti Bethel idiay Igieduma. Ti opisina idiay Lagos ket buklen ti maysa a pagnaedan a pasdek nga addaan iti 24 a siled, maysa a bodega, ken maysa a pagopisinaan a pasdek. Adu a trabaho iti sanga nga opisina ti maas-asikaso idiay Lagos, ti kabesera ti pagilian iti tay-ak ti ekonomia. Kadagita a baro a pasilidad, adda nairanta a pagnaedan dagiti Bethelite a parakolekta kadagiti kargamento iti puerto ken paragatang ka-dagiti suplay ti sanga nga opisina, ken adda met pagdagusan dagiti dadduma a sumangpet ken pumanaw manipud iti eropuerto. Maus-usar met ti opisina iti Lagos kas temporario a pakaangayan ti Ministerial Training School agingga a saan pay a nalpas ti panangpalawa iti opisina iti Igieduma. Talaga a nabatad ti panangbendision ni Jehova iti trabaho a panangasaba idiay Africa, kas met laeng iti intero a lubong.

NAKABALAN A MANGARAMID ITI PAGAYATAN TI DIOS

Anian a yamantayo ken Jehova ta impaayannatayo ‘iti tunggal naimbag a banag tapno aramidentayo ti pagayatanna, nga aramidenna kadatayo babaen ken Jesu-Kristo daydiay makaay-ayo unay iti imatangna.’ (Heb. 13:21) Gapu ta pinaneknekan ni Jehova nga isu daydiay makabael a “mangaramid a nawadwadwad unay a lab-awanna ti amin a bambanag a dawaten wenno panunotentayo,” naimpusuan nga ibunannagtayo: “Maadda koma kenkuana ti dayag babaen iti kongregasion ken babaen ken Kristo Jesus kadagiti amin a kaputotan iti agnanayon ken awan inggana.”​—Efe. 3:20, 21.

[Kahon iti panid 25]

Panangirehistro iti Relihion​—Apay ken Kasano?

Depende iti pagilian, agduduma ti wagas ti pannakairehistro ti relihion. Iti dadduma a pagilian, a kas iti Armenia ken Azerbaijan, adda dagiti espesipiko a linteg a mangipalubos iti narelihiosuan nga organisasion nga agaplikar para iti legal a pannakairehistro ken pannakabigbig. No mapatgan ti aplikasion, mabigbig ti narelihiosuan nga organisasion kas opisial a relihion iti dayta a pagilian. Iti dadduma a pagilian, adda dua a kita ti pannakairehistro. Ti umuna ket para kadagiti kangrunaan a relihion. Adu ti pagimbagan daytoy a pannakairehistro, agraman ti pannakailaksid iti buis. Ti maikadua a kita ket gagangay a nairanta kadagiti babbabassit ken kabbaro a relihioso a grupo.

Iti dadduma a pagilian, kas iti Georgia ken iti Estados Unidos ti America, awan ti espesipiko a linteg para iti pannakairehistro dagiti relihion. Kadagita a kaso, adda ipaay ti konstitusion a wayawaya para iti amin a relihion. Nupay awan ti pormal a pannakabigbig dagiti indibidual a narelihiosuan a grupo, mabalin nga agaplikar ti maysa a grupo tapno makairehistro iti legal a korporasion. No agballigida a mangirehistro, mausarda dayta a legal a korporasion a mangipatungpal kadagiti aktibidadda, a pakaibilangan ti panagimprenta ken panagipablaak agraman ti kalintegan a gumun-od iti sanikua.

[Mapa iti panid 21]

(Para iti aktual a pannakaurnosna, kitaem ti publikasion)

AUSTRIA

FRANCE

SPAIN

GREECE

ERITREA

RWANDA

ARMENIA

AZERBAIJAN

RUSSIA

KAZAKHSTAN

UZBEKISTAN

TAJIKISTAN

SOUTH KOREA

[Ladawan iti panid 11]

Ti Kongregasion iti Siaya nga agus-usar iti lenguahe a Luo

[Ladawan iti panid 13]

Mabalinen a magun-odan ti kompleto wenno dadduma a paset ti “Baro a Lubong a Patarus” iti nasurok 70 a lenguahe

[Ladawan iti panid 22]

Ni Konstantinos Kotidis

[Ladawan iti panid 22]

Ni Stylianos Ioannidis

[Ladawan iti panid 29]

Ti baro a pagtaengan idiay Lagos, Nigeria

[Ladawan iti panid 29]

Pagimprentaan iti sanga nga opisina idiay South Africa