Jehóva verndar Jósafat

Jósafat, konungur í Júda, eyðilagði ölturu og skurðgoð Baals í landinu. Hann vildi að fólkið þekkti lög Jehóva. Hann sendi þess vegna höfðingja og Levíta út um allt Júdaland til að kenna fólkinu lög Jehóva.

Þjóðirnar í kring þorðu ekki að gera árás á Júda af því að þær vissu að Jehóva verndaði þjóðina sína. Þær gáfu Jósafat konungi meira að segja gjafir. En síðan komu Móabítar, Ammónítar og menn frá Seírfjöllum til að berjast við Júda. Jósafat vissi að hann þurfti að fá hjálp frá Jehóva. Hann lét alla karlana, konurnar og börnin safnast saman í Jerúsalem. Hann stóð fyrir framan allt fólkið og bað: ‚Jehóva, við getum ekki unnið nema þú hjálpir okkur. Segðu okkur hvað við eigum að gera.‘

Jehóva svaraði bæninni: ‚Ekki vera hræddir. Ég hjálpa ykkur. Takið ykkur stöðu, standið kyrrir og sjáið hvernig ég bjarga ykkur.‘ Hvernig bjargaði Jehóva þeim?

Næsta morgun safnaði Jósafat saman söngvurum og sagði þeim að ganga á undan hernum. Þeir gengu á undan hernum frá Jerúsalem til staðar sem heitir Tekóa.

Jehóva barðist fyrir fólk sitt á meðan söngvararnir sungu hátt og af gleði fyrir hann. Hann lét Ammónítana og Móabítana verða svo ruglaða að þeir fóru að berjast hver við annan. Enginn þeirra lifði af. En Jehóva verndaði Júdamenn, bæði hermennina og prestana. Allir í löndunum í kring fréttu hvað Jehóva hafði gert. Og þeir vissu að Jehóva væri enn þá að vernda þjóðina sína. Hvernig bjargar Jehóva fólki sínu? Hann notar margar leiðir til þess og þarf ekki hjálp frá mönnum.