Kornelíus fær heilagan anda

Í Sesareu var valdamikill rómverskur liðsforingi sem hét Kornelíus. Hann var ekki Gyðingur, en Gyðingarnir báru virðingu fyrir honum. Hann var gjafmildur við fátæka og þá sem þurftu hjálp. Kornelíus trúði á Jehóva og bað oft til hans. Einn daginn sá Kornelíus engil sem sagði: ‚Guð heyrði bænir þínar. Sendu menn til borgarinnar Joppe, þar sem Pétur er, og biddu hann að koma til þín.‘ Kornelíus sendi strax þrjá menn til Joppe, sem var um 50 kílómetra í suður.

Á meðan þeir voru á leiðinni sá Pétur sýn. Hann sá dýr sem Gyðingar máttu ekki borða og heyrði rödd sem sagði honum að borða. Pétur vildi það ekki og sagði: ‚Ég hef aldrei á ævinni borðað óhrein dýr.‘ Þá sagði röddin við hann: ‚Ekki segja að þessi dýr séu óhrein. Guð er búinn að gera þau hrein.‘ Pétri var líka sagt að það væru þrír menn við dyrnar hjá honum og að hann ætti að fara með þeim. Pétur fór til dyra og spurði mennina af hverju þeir væru komnir. Þeir svöruðu: ‚Kornelíus sendi okkur. Hann er rómverskur liðsforingi. Þú átt að koma heim til hans í Sesareu.‘ Pétur bauð þeim að gista hjá sér um nóttina. Daginn eftir fór hann með þeim til Sesareu og nokkrir bræður frá Joppe fóru með.

Kornelíus kraup fyrir Pétri þegar hann hitti hann loksins. En Pétur sagði: ‚Stattu upp. Ég er bara maður eins og þú. Guð sagði mér að koma heim til þín þó að Gyðingar fari ekki heim til heiðingja. Segðu mér nú af hverju þú lést sækja mig.‘

Kornelíus sagði við Pétur: ‚Ég var að biðja til Guðs fyrir fjórum dögum og engill sagði mér að láta sækja þig. Viltu kenna okkur orð Jehóva?‘ Pétur sagði: ‚Ég hef lært að Guð hugsar eins um alla. Allir sem vilja þjóna honum geta orðið vinir hans.‘ Pétur sagði þeim margt um Jesú. Það kom heilagur andi yfir Kornelíus og þá sem voru með honum og þeir létu allir skírast.