Páll og Tímóteus

Tímóteus var ungur bróðir í söfnuðinum í Lýstru. Pabbi hans var grískur og mamma hans var Gyðingur. Evnike mamma Tímóteusar og Lóis amma hans sögðu honum frá Jehóva frá því að hann var lítill.

Þegar Páll kom til Lýstru í annarri boðunarferðinni sinni tók hann eftir að Tímóteus elskaði trúsystkinin og hafði mikinn áhuga á að hjálpa þeim. Páll bauð Tímóteusi að koma með sér í ferðina. Smátt og smátt þjálfaði Páll Tímóteus í að vera góður í að boða og kenna fagnaðarboðskapinn.

Heilagur andi leiddi Pál og Tímóteus hvert sem þeir fóru. Eina nóttina sá Páll sýn þar sem maður sagði honum að koma til Makedóníu og hjálpa þeim. Páll, Tímóteus, Sílas og Lúkas fóru þá þangað til að boða trúna og gera söfnuði.

Í borginni Þessaloníku í Makedóníu urðu margir karlar og konur kristin. En sumir Gyðingarnir voru öfundsjúkir út í Pál og vini hans. Þeir söfnuðu saman liði og drógu bræðurna til þeirra sem stjórnuðu í borginni og hrópuðu: ‚Þessir menn eru óvinir rómverska keisarans!‘ Páll og Tímóteus voru í lífshættu svo að þeir flúðu til Beroju um nóttina.

Fólkið í Beroju hafði mikinn áhuga á að læra um fagnaðarboðskapinn og bæði Grikkir og Gyðingar fóru að trúa. En Gyðingar frá Þessaloníku komu og æstu upp fólkið. Þá fór Páll til Aþenu. Tímóteus og Sílas voru áfram í Beroju til að styrkja söfnuðinn. Seinna sendi Páll Tímóteus aftur til Þessaloníku til að hjálpa söfnuðinum af því að þar voru svo miklar ofsóknir. Eftir það sendi Páll Tímóteus til margra annarra safnaða til að hvetja þá.

Páll sagði Tímóteusi: ‚Þeir sem vilja þjóna Jehóva verða ofsóttir.‘ Tímóteus var ofsóttur og settur í fangelsi fyrir trú sína. Hann var ánægður að fá tækifæri til að sanna að hann elskaði Jehóva.

Páll sagði við söfnuðinn í Filippí: ‚Ég sendi Tímóteus til ykkar. Hann ætlar að kenna ykkur hvað það þýðir að ganga í sannleikanum og hann mun þjálfa ykkur í boðuninni.‘ Páll vissi að hann gæti treyst á Tímóteus. Þeir voru góðir vinir og unnu saman í mörg ár.