Mak

14 Ọ ki kẹ ikpẹdẹ eva a kuẹ lu iluemhin ọsi Anagbera bi Iluemhin Ọsi Ibrẹd Nọn Ihuẹ, ene ohẹn ne khua bi ene man uhi da ha guanọ uwedẹ nin ele ha rẹ re eku mun Jesu yẹ gbe ọle a. 2 Sokpan ele da yọle: “Mhan ida lu ọle bhi ẹghe iluemhin; nan hẹi dọ miẹn ghe, ene ẹbho zughu ijerebhe a.”

3 Bhi Bẹtani, ẹghe nin Jesu rẹ ha le ebale bhi uwa ọsi Saimọn nọn rẹ ha khọnmhọn emianmhẹn egbekẹn, okhuo ọkpa da re ọgọ alabasta re, nin abhili nọn manman vin-ohin ye. Nad* ọsaje a rẹ lu ọne abhili. Ọne abhili manman ghanlan. Ọle da tuje ọne ọgọ alabasta a, yẹ munhẹn ha biri ọne abhili Jesu bhi uhọnmhọn. 4 Ẹbho eso ki daghe ọnan, ẹkẹ da ha khọ ele. Ele da yọle: “Bezẹle nan da ha riia ọne abhili nan an? 5 A ha rẹ khiẹn ọne abhili nan gbera dinariọs* iyisẹn ea* yẹ re ọne igho nin ene ibhioguele!” Ele da wo manman ha khọẹkẹ ọne okhuo.* 6 Ọkpakinọn, Jesu da yọle: “Ibha zẹ ọle obọ. Bezẹle nin ibha da guanọ ọle ẹmhọn? Emhin esili ọle lu da imẹn. 7 Ibha bi ene ibhioguele dẹ ko ha ribhi enan. Ibha dẹ sabọ lu emhin esili nin ele bhi ẹghe nọn hi ki rẹ khin nọn ghọn ibha. Ọkpakinọn, imẹn ida ha ribhi ẹwẹ ibha rẹ ha khian. 8 Ebi ahu ọle gbele ọle lu. Ọle da biri ọne abhili nọn vin-ohin imẹn bhi egbe, rẹ mun imẹn egbe khẹ ẹghe nan ha rẹ re imẹn tọ. 9 Bhi ọsi ẹmhọanta, imẹn taman ibha ghe, bhi eji ọ hi ki rẹ khin nan da tẹmhọn ọne ọta nọn mhẹn bhi otọ agbọn nan rebhe, a dẹ yẹ tẹmhọn ebi ọne okhuo nan lu, nan rẹ ha ye ọle re.”

10 Judas Iskarọt nọn yi ọkpa bhi ene etuegbe igbeva, da bu ene ohẹn ne khua, nin ọle dọ khiẹn Jesu nin ele. 11 Ele ki họn ebe re ọle vae, ele da wo manman ha ghọnghọn. Ele da yọle ghe, ele dẹ ne igho isiliva nanlẹn. Bhiriọ, ọle da munhẹn ha guanọ isẹhoa nin ọle ha rẹ mun Jesu khiẹn.

12 Bhi ukpẹdẹ ọhẹnhẹn ọsi Iluemhin Ọsi Ibrẹd Nọn Ihuẹ, bhi ẹghe nan rẹ lu izọese ọsi Anagbera, edibo nesọle da nọọn ọlẹn yọle: “Ji uwẹ guanọ nin imhan hẹnhẹn ọbhi otọ, nin uwẹ da le ebale ọsi Anagbera?” 13 Ọle ki da je edibo eva nesọle, yẹ taman ele yọle: “Ibha ha khian ẹkẹ ọne agbaẹbho. Bha dẹ miẹn okpea ọkpa nọn mun uko amẹn mhọnlẹn. Bha rẹkhan ọlẹn. 14 Sẹyẹ, uwa nọn hi ki rẹ khin nin ọle na i, bha rẹkhan ọlẹn nabhọ, bha ha taman ọnọn nyan ọne uwa, ‘Ọne Ọman-emhin yọle: “Ejela ọne ugha ọsi erumhunyẹn ye, nin imẹn ha da deba edibo nesẹmhẹn lu Iluemhin Ọsi Anagbera?”’ 15 Ọle dẹ re udede ugha man ibha bhi okhun uwa. Emhin rebhe gba bhi ọne ugha. Ibha muegbe ọne iluemhin ọbhi otọ khẹ mhan.” 16 Bhiriọ, ene edibo da kpanọ ha khian ọne agbaẹbho. Emhin rebhe da wo sunu beji Jesu taman ele. Ele da muegbe ọne iluemhin ọsi Anagbera ọbhi otọ.

17 Ọsemuan ki re, ọle bi etuegbe igbeva nesọle da vae bhi enin. 18 Ẹghe nin ele ki rẹ dotua nẹga itebu ha le ebale, Jesu da yọle: “Bhi ọsi ẹmhọanta, imẹn taman ibha ghe, ọkpa bhi ẹwẹ ibha ne deba imẹn ha le ebale dẹ mun imẹn khiẹn.” 19 Ọnan da wo manman ba ele bhi egbe, bhiriọ, ọdeọde bhi ẹwẹ ele da ha nọọn ọlẹn yọle: “Imẹn be nọn?” 20 Ọle da taman ele yọle: “Ọkpa bhi ẹwẹ ibha nọn, ọnọn deba imẹn ha le ebale bhi ukpamanku ọkpa. 21 Ọmọn nọnsi okpea dẹ fi ibha ya, beji a rẹ gbẹn ọlẹn ọbhi otọ rẹji ọle. Ọkpakinọn, ọkhọbhegbe hi ọsi ọne ọria nọn ha mun Ọmọn nọnsi okpea khiẹn! Ọ ha rẹ mhẹn nẹ nanlẹn sade a bha biẹ ọle hiehie.”

22 Beji ele sẹyẹ ha le ebale, ọle da re ibrẹd, nan erọnmhọn ọbhọ, yẹ khuẹnẹn ọlẹn an ne nin ele. Ọle da taman ele yọle: “Ibha miẹn; egbe nọnsẹmhẹn ọnan mundia nan.” 23 Sẹyẹ, ọle da mun ukpu anyọn. Ọle da nan erọnmhọn bhọ yẹ mun nin ele. Ele rebhe da wọn bhi ọne anyọn. 24 Ọle da taman ele yọle: “Ọnan mundia nin aranlẹn nọnsẹmhẹn, nọn yi ‘aranlẹn ọsi ọne akovẹn’ nan ha gbekua nin ẹbho ne bunbun. 25 Bhi ọsi ẹmhọanta, imẹn taman ibha ghe, imẹn iyẹ da wọn anyọn nan re ikperan ivain lu, rẹ sẹbhi ukpẹdẹ nin imẹn ha wọn anyọn ọsọgbọn bhi Agbejele nọnsi Osẹnobulua.” 26 Ele ki so illo* fo, ele da kpanọ ha khian Oke ọsi Oliv.

27 Jesu da taman ele yọle: “Urẹọbhọ nọnsẹbha rebhe dẹ wẹghẹ a,* ranmhude, a gbẹn ọlẹn yọle: ‘Imẹn dẹ gbehẹ ọne ọsun-ohuan, ene ihuan rebhe ki zagha a.’ 28 Ọkpakinọn, a ha riọ mẹn kpanọ bhi uu fo, imẹn ki kalo nin bha ha khian Galili.” 29 Ọkpakinọn, Pita da taman ọlẹn yọle: “Aharẹmiẹn urẹọbhọ ọsi enekẹle rebhe wẹghẹ a, ọsẹmhẹn ida wẹghẹ a.” 30 Jesu ki da taman ọlẹn yọle: “Bhi ọsi ẹmhọanta, imẹn taman uwẹ ghe, ẹlẹnan, ehe, bhi ọne ukpasọn nan, ọkuẹsẹ ọkpa viẹ bhi ọsi ugbazeva, igba ea uwẹ ha yọle ghe uwẹ bha lẹn imẹn.” 31 Ọkpakinọn, ọle da wọ yẹ ha yọle: “Aharẹmiẹn imẹn dẹ yu rẹkhan ẹn, imẹn ida tale ghe imẹn bha lẹn uwẹ.” Enekẹle rebhe da yẹ wo ha ta iriọ.

32 Ele da ki sẹbhi eji a tiọle Gẹtsimani. Ọle da taman edibo nesọle yọle: “Ibha dotua bhi enan nin imẹn dọ nan erọnmhọn.” 33 Ọle da re Pita, Jemis, bi Jọni rẹkhan egbe. Ọle da wo manman ha lu akhiẹ, yẹ manman ha kpokpo egbe. 34 Ọle da taman ele yọle: “Ọbalọ nin imẹn ye khian gbe imẹn an. Ibha debhi enan an, ibha ha yẹ ha babegbe.” 35 Ọle ki khian re odalo khere, ọle da de ọbhi otọ, yẹ ha nan erọnmhọn. Ọle da ha bhii ghe, sade emhin nọn ha ji a lu nọn, nin ọne ẹghe nan gbera ọle. 36 Ọle da yọle: “Aba,* a imiẹn ebi uwẹ isabọ lu; miẹn mẹn ọne ukpu* nan. Ọkpakinọn, ọ iyi iho nọnsẹmhẹn ha munsẹ, ji iho nọnsẹ munsẹ.” 37 Ọle ki fikiere, ọle da kere ghe ele wẹ. Ọle da nọọn Pita yọle: “Saimọn, owe uwẹ ye? Uwẹ bha zẹwẹ miẹn ahu rẹ deba imẹn ganẹdẹ na bhi uriagogo ọkpa? 38 Ibha wo ha babegbe, ibha ha yẹ wo ha nan erọnmhọn ẹghe rebhe, beji a ha da miẹn ghe ibha bha de ọbhi edọnmhẹn. Ẹmhọanta nọn ghe, ibha wo rẹ muegbe nin bha rẹ lu emhin nọn mhẹn, ọkpakinọn, efun nọnsẹbha wẹghẹ a.” 39 Ọle da gbo kpanọ dọ nan erọnmhọn, ọle da sẹyẹ ta ebi ọle ka ta. 40 Ọle ki gbo vae, ọle da kere ghe ele wẹ, ranmhude owe wo manman ha sun ele. Bhiriọ, ele bha lẹn ebi ele ha taman ọlẹn. 41 Ọle ki fikie vae ọsi ugba-ọzea, ọle da taman ele yọle: “Ẹghe nọn sẹ inian ibha rẹ ha wẹ yẹ koahua? Ọ sẹ riọ! Ọne ẹghe sẹle! Ghọle! A ho nan mun Ọmọn nọnsi okpea ọbhi obọ eria ne imhẹn. 42 Bha kpanọ, bha ji mhan ha khian. Ghọle! Ọnọn ha mun imẹn khiẹn dẹ kẹ sẹ enan.”

43 Bhi ọne ẹghe nin tee, beji ọle sẹyẹ ha talọ, Judas nin ọkpa bhi ene etuegbe igbeva da vae. Usun ẹbho ne muno agbada bi ukpokpo mhọnlẹn da rẹkhan ọlẹn vae. Ene ohẹn ne khua, ene man uhi, bi ene ewanlẹn je ele re. 44 Ejayenan nian, Judas nọn mun ọlẹn khiẹn ki ka taman ele yọle: “Ọria nọn hi ki rẹ khin nin imẹn ha re unun fiofio, ọle nọn; ibha mun ọlẹn, ibha ha re egbanegbe re ọle kpanọ.” 45 Ọle da wo khian bu Jesu re, yẹ yọle, “Rabai!” sẹyẹ, ọle da re unun fiofio ọle. 46 Bhiriọ, ele da mun ọlẹn yẹ re ọle kpanọ. 47 Ọkpakinọn, ọkpa bhi eria ne ha ribhi enin, da yo agbada nọnsọle a rẹ hian ehọ ọsi ọguọmhandia ọsi ojohẹn fia. 48 Jesu da nọọn ele yọle: “Imẹn ibha muno agbada bi ukpokpo rẹkhan egbe dọ mun bọsi oyi? 49 Ukpẹdẹ-ukpẹdẹ imẹn rẹ ha man emhin bhi uwa oga bhi eji ibha ye. Ibha bha mun mẹn ẹghenin. Sokpan, beji ẹmhọn nọn ribhi Ebenọnkhiale ha da munsẹ, ọle zẹle nin emhin da re inian sunu.”

50 Edibo nesọle rebhe da nẹgbe zẹ ọle obọ. 51 Ọkpakinọn, usẹn obhokhan ọkpa nọn re ukpọn linẹn ọsaje yọ rẹ gue eban nọnsọle, da fẹkẹ ha rẹkhan ọlẹn. Ele da rẹ ha guanọ nin ele mun ọlẹn. 52 Ọkpakinọn, ọle da zẹ ukpọn linẹn nọnsọle obọ nin ele, yẹ re eban-eban* nẹgbe.

53 Ele ki da mun Jesu ha khian isi ọne ojohẹn. Ene ohẹn ne khua rebhe, ene ewanlẹn bi ene man uhi da sikoko bhi enin. 54 Pita da fẹkẹ gban egbe kie yẹ rẹkhan Jesu bhi ikeke. Ọle da rẹkhan ọlẹn sẹbhi ẹgodo ọsi ọne ojohẹn. Ọle da deba eguọmhandia ne ribhi ọne uwa dotua ha gha eranlẹn. 55 Ejayenan nian, ene ohẹn ne khua, bi ọne ikotu Sanhẹdrin rebhe da ha guanọ ẹbho ne ha sọsali gbe Jesu, beji ele ha da gbe ọle a. Ọkpakinọn, ele bha miẹn emhin soso rẹ mun ọlẹn mhọnlẹn. 56 Ẹbho ne bunbun da gene dọ ha sọsali ohoghe gbe ọle, ọkpakinọn, ebi ele ha ta bha diẹn kugbe. 57 Sẹyẹ, ẹbho eso da kpanọ mundia ha sọsali ohoghe gbe ọle yọle: 58 “Imhan họn ghe ọle yọle, ‘Imẹn dẹ dunmhun ọne uwa oga nan nin eria re obọ bọn sotọ, imẹn ki re ikpẹdẹ ea bọn ọbhebhe nin eria bha re obọ bọn.’” 59 Arẹmiẹn ele ta ene emhin nan, ebi ele tale bha yẹ diẹn kugbe.

60 Bhiriọ, ọne ojohẹn da kpanọ mundia bhi ẹwẹ ele, yẹ ha nọọn Jesu yọle: “Uwẹ bha miẹn ebi uwẹ ha ta ọbhi ebi ele tale? Uwẹ bha be họn ebi ene ikpea nan ha ta uwẹ bhi egbe?” 61 Ọkpakinọn, ọle da huẹan. Ọle bha ta emhin soso. Ọne ojohẹn da gbo munhẹn ha nọọn ọlẹn ọta. Ọle da yọle: “Uwẹ be hi Kristi nin Ọmọn nọnsi Osẹnobulua nọn khiale?” 62 Jesu da wanniẹn ọlẹn yọle: “Ehe; Ibha dẹ daghe Ọmọn nọnsi okpea dotua bhi obera ọsi ọnọn mhọn ahu. Bha dẹ yẹ daghe ọle ghe ọle vade, ọle ki ha ribhi ẹkẹ adudu amẹn.” 63 Ọne ojohẹn ki họn ọnan, ọle da nyanghan ukpọn nọnsọle a, yẹ yọle: “Be imhan ki gbo ha guanọ ọsali ba? 64 Bha re ehọ nọnsẹbha họn ebi ọle rẹ re unun ji Osẹnobulua yẹ. Be a ha khian ọlẹn yẹ?” Ele rebhe da yọle ọ khẹke nan gbe ọle a. 65 Eso da munhẹn ha jiẹsẹn nyan ọlẹn. Ele ha gue ọle ẹlo, ele ki fi ọlẹn etin, yẹ taman ọlẹn yọle: “Taman imhan, họla fi uwẹ emhin!” Ene unakpa ne gbẹloghe ikotu ki fino ọle ubi fo, ele da mun ọlẹn kpanọ.

66 Ẹghe nin Pita rẹ ha ribhi ọne ẹgodo, ọmanmhẹn ọkpa nọn yi ọguọmhandia ọsi ọne ojohẹn da vae bhi enin. 67 Ọle ki daghe Pita bhi eji Pita da ha gha eranlẹn, ọle da ghe ọle ẹlo, yẹ taman ọlẹn yọle: “Ọkpa bhi ene rẹkhan Jesu nin obhi Nazarẹt uwẹ khin.” 68 Ọkpakinọn, ọle da sin. Ọle da yọle: “Imẹn bha lẹn ọlẹn, imẹn bha yẹ lẹn ebi uwẹ tẹmhọn ọlẹn.” Sẹyẹ, ọle da kpanọ ha khian obọ ọsi igeti. 69 Bhi enin, ọne ọmanmhẹn da gbo daghe ọle, yẹ munhẹn ha taman ẹbho ne ribhi enin yọle: “Ọkpa bhi edibo nesọle khọnan.” 70 Ọle da gbo ha sin. Obhi ẹghe khere ki gbera, ene ha ribhi enin da munhẹn ha taman Pita yọle: “Ọkpa bhi edibo nesọle uwẹ gene khin, ranmhude, obhi Galili uwẹ khin.” 71 Ọkpakinọn, ọle da munhẹn ha ve ihẹn yọle: “Imẹn bha lẹn ọne okpea nan nin bha tẹmhọn ọlẹn!” 72 Bhi ọne ẹghe nin tee, ọkpa da viẹ ọsi ugba-ọzeva. Pita da yere ebi Jesu taman ọlẹn, ẹghe nọn rẹ yọle: “Ọkuẹsẹ ọkpa viẹ bhi ọsi ugba-ọzeva, igba ea uwẹ ha yọle ghe uwẹ bha lẹn imẹn.” Bhiriọ, ọle da gbe eviẹ a.