Luk

18 Ọle da noo arẹkhọkhọ rẹ taman ele ebezẹle nọn da khẹke nin ele ha nan erọnmhọn ẹghe rebhe, bi nin ele hẹi ji egbe lọ ele. 2 Ọle da yọle: “Bhi agbaẹbho ọkpa, ọbhuohiẹn da ha ribhọ. Ọne ọbhuohiẹn nan imun ofẹn Osẹnobulua, sẹyẹ, ọle imun ofẹn ọria soso. 3 Okhuo ọkpa nọn iyẹ mhọn ọdọ da yẹ ha ribhi ọne agbaẹbho. Ẹghe rebhe ọne okhuo rẹ ha bu ọle re dọ ha taman ọlẹn yọle, ‘Huẹan, bhuohiẹn nọn gbale bhi ẹzọ nin mẹn bi ọria ko mhọnlẹn.’ 4 Bhi ọsi ọhẹnhẹn, ọle bha fi ehọ ọle bhọ. Ọkpakinọn, akizẹbue, ọle da taman egbe ọle yọle, ‘Ẹmhọanta nọn ghe, imẹn imun ofẹn Osẹnobulua, sẹyẹ, mẹn imun ekpẹn nin ọria soso, 5 ọkpakinọn, ranmhude uwedẹ nin ọne okhuo nan wo rẹ ha kpokpo imẹn, imẹn dẹ lu ọle nin ọle da miẹn ibhuohiẹn nọn gbale, beji a ha da miẹn ọle bha yẹ ha vae dọ ha re ebi ọle guanọ rẹ kpokpo imẹn.’” 6 Jesu da ki yọle: “Ahamiẹn ọbhuohiẹn nọn bha khia sabọ ta ọnan, 7 eka-eka ki hi Osẹnobulua. Ọle ida be lu ọle, nin ẹbho nesọle ne wo ha viẹ bu ọle asọn bi odanmhẹn da miẹn ibhuohiẹn nọn gbale, beji ọle sẹyẹ re iziẹngbe ne ele lu emhin? 8 Imẹn taman ibha ghe, Ọle dẹ wo lu ọle nin ele jẹje miẹn ibhuohiẹn nọn gbale. Ọkpakinọn, Ọmọn nọnsi okpea dẹ be miẹn urẹọbhọ nọn sẹ iriọ bhi ọne otọ nan bhi ẹghe nin ọle ha rẹ vae?”

9 Ọle da gbo noo arẹkhọkhọ ọbhebhe ranmhude eria ne riale ghe ele khia nẹ, ne iyẹ ghe ẹbho sẹ emhin soso. Ọle da yọle: 10 “Ikpea eva da ha khian uwa oga dọ nan erọnmhọn. Ọkpa bhọ da ha yi obhokhan Farisi, ọnọnkele da ha yi ọkpa bhi eria ne koko igho uhọnmhọn. 11 Ọne obhokhan Farisi da kpanọ mundia yẹ ha nan erọnmhọn bhi ẹkẹ ọkhọle nọnsọle yọle, ‘Osẹnobulua, imẹn khuẹnmhẹn uwẹ ghe, mẹn bha diabe ẹbho nekẹle ne yi oyi, eria ne bha khia, bi ene gboghẹ. Imẹn bhọ bha diabe ọne okpea nan nọn koko igho uhọnmhọn. 12 Igba eva imẹn fi azinmin bhi uzana. Imẹn yẹ zẹ ọkpa bhi igbe bhi emhin rebhe nin imẹn mhọnlẹn.’ 13 Ọkpakinọn, ọne okpea nọn koko igho uhọnmhọn, nọn mundia bhi eje bha ree gbe bhi eji ọne obhokhan Farisi ye, bha gbudu khua ẹlo okhun. Ọle da wo ha kiẹ-egbe,* yẹ yọle, ‘Eo Osẹnobulua, mhọn itohan da imẹn, imẹn nin ọria olukhọ.’ 14 Imẹn taman ibha ghe, ọne okpea nan, ọle khia nẹ bhi ẹlo nọnsi Osẹnobulua gbera ọne obhokhan Farisi. Ọria nọn tẹngbemun, a ki de ọle re. Sẹyẹ, ọria nọn degbere, a ki tuẹn ọlẹn okhun.”

15 Ẹbho da ha muno imọn nesele bu ọle, beji ọle ha da re obọ so ele. Edibo nesọle ki daghe ọnan, ele da ha ne ene ẹbho gui. 16 Ọkpakinọn, Jesu da tie ene ibhokhan sikẹ egbe yẹ yọle: “Ibha ji ene ibhokhan da bu imẹn re. Ibha hẹi yẹ de ele idobolo, ranmhude, eria ne diabe ene ibhokhan nan, ele nyan Agbejele nọnsi Osẹnobulua. 17 Bhi ọsi ẹmhọanta, imẹn taman ibha ghe, ọria nọn hi ki rẹ khin nọn bha miẹn Agbejele nọnsi Osẹnobulua ọbhi egbe bọsi obhokhan, ọle ida sabọ nabhọ.”

18 Okpea ọkpa nọn gbẹloghe da taman ọlẹn yọle: “Ọman-emhin Nọn Mhẹn, be imẹn ha lu nin imẹn da miẹn iẹnlẹn ọsi ighegheghe?” 19 Jesu da ki taman ọlẹn yọle: “Bezẹle nin uwẹ da tie imẹn ọnọn mhẹn? Gbera Osẹnobulua, ọria soso iribhọ nọn mhẹn. 20 Uwẹ lẹn ene uhi: ‘Hẹi gboghẹ, hẹi gbugbele, hẹi ra, hẹi sọsali ohoghe, mun ekpẹn nin aba ẹ bi inẹn ẹn.’” 21 Ọle da ki yọle: “Imẹn wo ha re obọ rẹkhan ene emhin nan rebhe rẹ na egbe obhokhan ha vade.” 22 Jesu ki họn ọnan, ọle da taman ọlẹn yọle, “Emhin ọkpa sẹyẹ kẹ uwẹ re: Dọ khiẹn emhin rebhe nin uwẹ mhọnlẹn, uwẹ ha gha ọne igho nin ene ibhioguele. Ẹghenin, uwẹ ki ha mhọn emhin ne ghanlẹn bhi okhun. Sẹyẹ, uwẹ ha vae dọ ha rẹkhan mẹn.” 23 Ọne okpea ki họn ọnan, ọle da wo kiẹ-egbe kpanọ, ranmhude, ọle wo manman fe.

24 Jesu ki ghe ọle, ọle da yọle: “Ọ dẹ wo manman nọghọ nin ẹbho ne mhọn igho rẹ nabhi Agbejele nọnsi Osẹnobulua! 25 Bhi ọsi ẹmhọanta, nin kẹtẹkẹtẹ* rẹ na bhi uhio agbede* gbera, ọle ha lẹkhẹ nẹ nin ọria nọn fele rẹ nabhi Agbejele nọnsi Osẹnobulua.” 26 Ene họn ebi ọle tale da yọle: “Họ bhọ ha ki sabọ miuhọnmhọn?” 27 Ọle da yọle: “Emhin ne bha fo eria rẹ lu, Osẹnobulua dẹ sabọ lu ele.” 28 Ọkpakinọn, Pita da taman ọlẹn yọle: “Ghọle! Mhan zẹ emhin nesẹmhan rebhe obọ yẹ rẹkhan uwẹ.” 29 Ọle da taman ele yọle: “Bhi ọsi ẹmhọanta, imẹn taman ibha ghe, ọria soso iribhọ nọn zẹ uwa nọnsọle obọ, la okhuo ọle, la ibhio ọle nin ikpea, la ene biẹ ọle, la imọn nesọle ranmhude Agbejele nọnsi Osẹnobulua, 30 nọn ida miẹn ene emhin nan igba ne bunbun bhi ọne ore nan, yẹ miẹn iẹnlẹn ọsi ighegheghe bhi agbọn* nọn vade.”

31 Ọle ki da ne ituegbe igbeva nesọle diọbhi obọ ọkpa yẹ ha taman ele yọle: “Ghọle! Jerusalẹm mhan khian riọ. Bhi enin, ene emhin nin ene akhasẹ gbẹnlẹn rẹji Ọmọn nọnsi Okpea dẹ munsẹ. 32 Bhi ọsi ijiẹmhin, a dẹ mun ọlẹn ọbhi obọ ọsi ene ribhi ẹkẹ agbọn. Ele ki zuọzuọ ọle, re obọ oya mun ọlẹn, yẹ jiẹsẹn nyan ọlẹn. 33 Ele ha ki re asan gbe ọle fo, ele ki gbe ọle a. Sokpan, ukpẹdẹ nọnzi ea, ọle ki riọ kpanọ.” 34 Ọkpakinọn, ele bha lẹn otọ ebi ọle ha tẹmhọnlẹn, ranmhude, a re ene ẹmhọn nan he nin ele. Bhiriọ, ebi ọle tale bha mun ele ẹlo kore.

35 Ẹghe nin Jesu rẹ ha sikẹ Jẹriko, okpea ọkpa nọn ruẹlo da ha bhii emhin bhi egbuwedẹ. 36 Ọne okpea nan ki họn ghe usun ẹbho gbera, ọle da ha nọọn ebe sunu. 37 Ele da taman ọlẹn yọle: “Jesu nin obhi Nazarẹt, ọle gbera!” 38 Bhiriọ, ọle da reso yọle: “Jesu nin Ọmọn nọnsi Devid mhọn itohan da mẹn!” 39 Ẹbho ne ha ribhi odalo da ha nanlẹn gui. Ele da taman ọlẹn nin ọle koko unun. Ọkpakinọn, ọle da kie manman ha so yọle: “Ọmọn nọnsi Devid mhọn itohan da mẹn!” 40 Bhiriọ, Jesu da mundia yẹ yọle nan re ọne okpea re. Ọne okpea ki bu ọle re, ọle da nọọn ọlẹn yọle: 41 “Be uwẹ guanọ nin imẹn lu nin uwẹ?” Ọle da yọle: “Ebeanlẹn imẹn, taan mẹn ẹlo a nin imẹn ha daghe.” 42 Jesu da ki taman ọlẹn yọle: “Ha daghe. Urẹọbhọ nọnsẹ re egbe daan ẹn.” 43 Bhi ọne ẹghe nin tee, ọle da munhẹn ha daghe. Ọle da munhẹn ha rẹkhan Jesu, yẹ gẹn Osẹnobulua. Ẹbho nekẹle ki daghe ebe sunu, ele da yẹ ha re ogẹn ji Osẹnobulua.