Matiu

15 Ibhokhan Farisi eso, bi ikpea eso ne man uhi da na bhi Jerusalẹm bu Jesu re. Ele da yọle: 2 “Bezẹle nin edibo nesẹ ida lu rẹkhan akerebhotọ ọsi aba mhan nin ẹdẹlẹ? Bhi ọsi ijiẹmhin, ele ikpe obọ* sade ele ho nin ele le ebale.”

3 Ọle da wanniẹn ele yọle: “Bezẹle nin ibha da gbobọra uhi nọnsi Osẹnobulua ranmhude akerebhotọ nọnsẹbha? 4 Bhi ọsi ijiẹmhin, Osẹnobulua yọle ghe, ‘Mun ekpẹn nin aba ẹ bi inẹn ẹn.’ Sẹyẹ, ‘Ọria nọn hi ki rẹ khin nọn re unun ji* aba ọle bi inẹn ọlẹn, bha gbe ọle a.’ 5 Ọkpakinọn, ibha yọle, ‘Ọria nọn hi ki rẹ khin nọn taman aba ọle la inẹn ọlẹn ghe, “Emhin nin mẹn rẹ ha mhọnlẹn nin mẹn ha rẹ rẹkpa bha, imẹn re ọle guẹ nin Osẹnobulua,” 6 ọ bha khẹke nin ọle mun ekpẹn nin aba ọle hiehie.’ Iriọ ibha rẹ re ọta nọnsi Osẹnobulua kiẹn ihoho, ranmhude akerebhotọ nọnsẹbha. 7 Ibha ne re ikpunun ga, Ẹzaya ka kha akhasẹ rẹji ibha, ẹghe nin ọle rẹ yọle: 8 ‘Ikpunun ene ẹbho nan rẹ gẹn imẹn. Ọkhọle nọnsele izẹwẹ ribhi eji imẹn ye. 9 Ẹghe ele gheghe riia nin ele rẹ ha ga imẹn, ranmhude uhi ọsi eria, ọle ele man.’” 10 Bhiriọ, Jesu da datie ene usun ẹbho sikẹ egbe, yẹ taman ele yọle: “Ibha kaehọ beji ibha ha da lẹn otọ ene ọta nan: 11 Ọ iyi ebi ọria le faa ọle a, ebe si ọle unun re, ọle faa ọle a.”

12 Edibo nesọle da bu ọle re yẹ taman ọlẹn yọle: “Uwẹ be lẹn ghe, ebi uwẹ tale re ẹkẹ ha khọ ibhokhan Farisi?” 13 Ọle da wanniẹn ele yọle: “Eran nọn hi ki rẹ khin nin Aba imẹn nọn ribhi okhun bha kọ, a dẹ vu ọle sibhi otọ re. 14 Fi ele ehọ a, eman-odẹ ne idaghe ele khin. Ọruẹlo ha dia ọruẹlo, ele veva ki de ọbhi ẹkẹ uhio.” 15 Pita da yọle: “Gbotọ ọne arẹkhọkhọ nan fanọn an man mhan.” 16 Bhiriọ, Jesu da yọle: “Ibha bha yẹ lẹn ebi a tẹmhọn ọlẹn? 17 Ibha bha be lẹn ghe, emhin nọn hi ki rẹ khin nin ọria le, ẹkẹle ọ na i, sẹyẹ, ọle ki nẹn ọlẹn kua? 18 Sokpan, emhin nọn hi ki rẹ khin nọn si ọria bhi unun re, ọkhọle ọ na dagbare. Ene emhin nan faa ọria a. 19 Bhi ọsi ijiẹmhin, ẹkẹ ọkhọle, ọle iria-eria ne imhẹn na vae. Ene iria-eria nan re ẹbho gbugbele, gboghẹ,* lu ilọnmhọn oghẹ kẹkẹ, ra, sọsali ohoghe, yẹ re unun ji Osẹnobulua. 20 Enan hi ene emhin ne faa ọria a, ọ iyi nan rẹ re obọ nan bha kpe* rẹ le ebale.”

21 Jesu ki sibhi enin re, ọle da ha khian agbaẹbho ọsi Taya bi Saidọn. 22 Sẹ ghẹ! okhuo ọkpa nọn na bhi Finishia vae, nọn nyẹnlẹn bhi ọne agbaẹbho nin, da viẹ bu ọle ha yọle: “Mhọn itohan da mẹn Ebeanlẹn imẹn nin Ọmọn nọnsi Devid. Ẹlinmhin-ebe wo manman ha kpokpo ọmokhuo nọnsẹmhẹn.” 23 Ọkpakinọn, Jesu bha zẹwẹ wanniẹn ọne okhuo. Bhiriọ, edibo nesọle da bu ọle re, yẹ taman ọlẹn yọle: “Je ọne okhuo kpanọ, ranmhude, ọle wo ha viẹ rẹkhan imhan.” 24 Ọle da yọle: “Ihuan ne yulua bhi uwa ọsi Izrẹl, ele a je imẹn bu, ọ iyi ọria ọbhebhe.” 25 Ọkpakinọn, ọne okhuo da bu ọle re dọ debhẹre nanlẹn, yẹ ha yọle: “Ebeanlẹn imẹn, rẹkpa imẹn!” 26 Jesu da wanniẹn ọlẹn yọle: “Ọ iyi emhin nọn gbale nan rẹ miẹn ibhokhan ebale nin ele ha le yẹ fino ọle nin ibhi awa.” 27 Ọne okhuo da yọle: “Ẹmhọanta nọn Ebeanlẹn imẹn. Sokpan, ene ibhi awa yẹ le ikuẹkuẹ ebale nọn na bhi itebu ọsi ọnọn nyan ele denọ kua.” 28 Bhiriọ, Jesu da wanniẹn ọne okhuo yọle: “Eo okhuo, uwẹ wo manman mhọn urẹọbhọ; ji ọ sunu ji uwẹ beji uwẹ rẹ guanọ ọle.” Rẹ na bhi ọne ẹghe nin, egbe da daan ọne ọmokhuo nọnsọle.

29 Jesu ki sibhi ene re, ọle da diọbhi egbegbe okpẹdẹ ọsi Galili. Ọle da hẹn uke oke, yẹ dotua bhi enin. 30 Usun ẹbho ne bunbun da bu ọle re. Ele da muno akhun, ene egbe bha gba nan, ene ruẹlo, ene odin, bi ẹbho ne bunbun ne ha khọnmhọn bu ọle. Ọle da re egbe daan ele rebhe. 31 Ọ da wo han ene usun ẹbho ilo ẹghe nin ele rẹ daghe ọle ghe, ene odin talọ, egbe gba nin ene egbe bha rẹ gba nan, ene akhun khian, ene ruẹlo daghe. Ele da yẹ ha re ogẹn ji Osẹnobulua ọsi Izrẹl.

32 Jesu da tie edibo nesọle, yẹ taman ele yọle: “Ohan ene ẹbho nan wo ha to mẹn, ranmhude, ikpẹdẹ ea ki nọn nian nin ele ne imẹn dia, sẹyẹ, ele bha sẹ le ebale. Imẹn bha guanọ nin ele re ẹkẹ ohanmhẹn kpanọ, nin ele hẹi dọ de si ẹlo ru bhi uwedẹ.” 33 Ọkpakinọn, edibo nesọle da taman ọlẹn yọle: “Ji mhan ha da miẹn ibrẹd dẹ bhi eje fi ahiẹ a nan, nọn ha sẹ ene usun ẹbho nan le?” 34 Bhiriọ, Jesu da nọọn ele yọle: “Eka ibrẹd ibha mhọn?” Ele da yọle: “Ikpọle ihinlọn bi ikuẹkuẹ ehẹn eso.” 35 Ọle ki taman ene usun ẹbho nin ele dotua bhi otọ fo, 36 ọle da ne ene ibrẹd ihinlọn bi ene ehẹn. Ọle ki nan erọnmhọn fo, ọle da khuẹnẹn ele a, yẹ ha ne nin edibo nesọle. Edibo nesọle da gha ọle nin ene usun ẹbho. 37 Ele rebhe da le sẹbhi ọkhọnlẹn. Ene edibo da koko ebale nọn kẹre kugbe. Ọ da vuọn udede okhuale ihinlọn. 38 Ikpea ne bun sẹbhi uli enẹn,* ele le ọne ebale, rẹ deba ikhuo bi ibhokhan nan bha ka. 39 Ọle ki je ene usun ẹbho kpanọ fo, ọle da nabhi okọ ha khian agbaẹbho ọsi Magadan.