Hibru

13 Bha sẹyẹ wo hoẹmhọn egbe bọsi ibhio. 2 Bha wo ha miẹn ẹbho* ọbhi egbe. Ẹbho eso sẹ ka re inian miẹn ẹbho ọbhi egbe khẹ, ele bha lẹn ghe ẹhi nọn. 3 Bha ji ẹmhọn ibhio bha ne ribhi ighan ha ri bha bhi ọkhọle ẹghe rebhe, bọsi ghe, ibha bi ele ko ribhi ighan. Bha yẹ ha ye ẹmhọn ene a lu khọlọ re, ranmhude ọkpa bha rebhe ko khin.* 4 Bha ha re ẹlo nọn ghanlẹn rẹ ghe ibọdọ bi ireokhuo. Ọdọ la amhẹn hẹi faa ibọdọ bi ireokhuo nọnsele a, ranmhude, Osẹnobulua dẹ bhuohiẹn ọdọ la amhẹn nọn dọ ne ọria ọbhebhe nowẹ. Ọle dẹ yẹ bhuohiẹn ẹbho rebhe ne gboghẹ.* 5 Bha hẹi hoẹmhọn igho. Bha ji emhin nin bha mhọn khọn bha, ranmhude, Osẹnobulua yọle: “Mẹn ida zẹ ibha obọ ghẹdẹ, sẹyẹ, a bha miẹn ebe ha re imẹn fikekegbe ibha.” 6 Bhiriọ, mhan dẹ sabọ gbe obọ bhi udu yọle: “Jehova* hi ọnọn rẹkpa mẹn, ofẹn ida mun mẹn. Be ọria ha kuẹ sabọ lu mẹn yẹ?”

7 Bha wo ha ria ẹmhọn ene rẹ bha khian, ne tẹmhọn Osẹnobulua man bha. Bha gbẹlokotọ bhi ebi iẹnlẹn nọnsele diayẹ, bha yẹ re egbe khọkhọ urẹọbhọ nọnsele.

8 Jesu Kristi ida fidenọ. Ọnọn ọle khin inodẹ, ọle ọ yẹ khin ẹlẹnan. Ọle ọ da yẹ ha khin rẹ sẹbhi ighegheghe.

9 Bha hẹi ji iman-emhin kẹkẹ nan bha lẹn ẹlo ọle hiẹ bha. Ẹmhọn ifuẹkẹ nọn khua nọnsi Osẹnobulua, ọle ha rẹkpa bha rẹ deziẹn, ọ iyi uhi kẹkẹ na gbe bhi ẹmhọn ebale. Ene uhi nan ida sabọ rẹkpa ene mun ọlẹn gba bhi uhọnmhọn.

10 Mhan mhọn ukhuo-izọese. Ene ohẹn ne ga bhi uwa oga ida sabọ le bhi emhin nan rẹ ze bhọ. 11 Ọne ojohẹn ha mun aranlẹn ọsi elanmhẹn nabhi eje khiale, nọn dọ re ọle zọese ọbhi olukhọ, a ki mun eku ọne elanmhẹn sibhi ẹkẹ ọne agọ re dọ tuẹ ọle a bhi olele. 12 Iriọ yẹ nọn. A mun Jesu dagbare diọbhi ikeke-ogbe ọsi ọne agbaẹbho, dọ gbe ọle a bhi enin, beji ọle ha da re aranlẹn nọnsọle rẹ kpe ene ẹbho khia. 13 Bhiriọ, bha ji mhan sibhi ọne agbaẹbho* re bu ọle bhi olele. Bha ji mhan yẹ re egbe hẹ oya nin ọle re egbe hẹ, 14 ranmhude, ọne agbaẹbho nan ida ha ribhọ rẹ ha khian. Ọne agbaẹbho nọn vade, ọle mhan khu ọi. 15 Bha ji mhan na obọ Jesu ha gẹn Osẹnobulua. Ọnan hi izọese nin mhan re unun nọnsẹmhan rẹ lu ji ọle. Bha ji mhan wo ha wewe elin nọnsọle. 16 Rẹ deba ọnin, bha hẹi yele a rẹ ha lu emhin esili nin ẹbho. Bha hẹi yele a rẹ ha rẹ bhi emhin nin bha mhọn nin ele. Izọese ne sẹ inian, ele ti Osẹnobulua bhọ.

17 Bha ha hẹnmhọn nin ene rẹ bha khian. Bha yẹ ha degbere nin ele. Ranmhude, ele hi ene gbẹloghe bha. Ele Osẹnobulua ha nọọn ebi ele rẹ re ibha khian yẹ. Ahamiẹn bha hẹnmhọn nin ele, ele ki sabọ re eghọnghọn rẹ ha lu iwẹnna nọnsele, ele ida re akhiẹ lu ọle, ranmhude ọnin ida ha mhẹn bha bhi egbe.

18 Bha wo ha nan erọnmhọn nin mhan, ranmhude, mhan lẹnmhin ghe mhan mhọn ọkhọle nọn khiale. Bhi emhin rebhe nin mhan lu, mhan ho nin mhan ha yi ọria ẹmhọanta. 19 Sokpan, mẹn guanọ nin bha manman ha nan erọnmhọn, nin mẹn sabọ kie bu bha re.

20 Osẹnobulua hi ọnọn riọ Jesu nin Ebeanlẹn mhan kpanọ bhi uu. Jesu hi ọsun-ohuan nọn khua. Obọ nọnsọle aranlẹn ọsi ọne akovẹn nọn da ha ribhọ rẹ sẹbhi ighegheghe ye. Ejayenan nian, mẹn bhii nin Osẹnobulua nin Osẹ ọsi ọfure 21 re emhin esili rebhe nin bha rẹ lu iho nọnsọle, ọle ha yẹ rẹkpa bha rẹ na obọ Jesu Kristi rẹ ha lu ebe ti ọle bhọ. Uyi hi ọsi Osẹnobulua rẹ sẹbhi ighegheghe. Isẹ.

22 Ibhio, bha huẹan, bha re ehọ bhi ọta izebhudu nin mẹn gbẹn ji bha. Ebi mẹn gbẹn ji ibha bha bun gbe. 23 Mẹn ho nin mẹn ji bha lẹn ghe, a fan Timoti nin obhio mhan fia bhi ighan. Ahamiẹn ọle kẹ bu mẹn re, imẹn bi ọle ki ko dọ miẹn ibha.

24 Bha ne imẹn tuẹ ene rẹ bha khian, bi ene khiale rebhe. Ibhio mhan ne ribhi Itali je otuẹ ibha.

25 Osẹnobulua dẹ manman mhọn ifuẹkẹ da bha rebhe.