Kọrint Nin Ọhẹnhẹn

15 Ibhio, mẹn ho nin mẹn ye bha ọne ọta nọn mhẹn re, ọne ọta nin mẹn taman bha, nin bha miẹn ọbhi egbe yẹ mun udu nyan. 2 Bha dẹ miuhọnmhọn sade bha wo lu rẹkhan ọne ọta nọn mhẹn nin mẹn taman ibha. Ibha bha da lu iriọ, oga nọnsẹbha ki kiẹn ihoho.

3 Ebi mẹn luẹle, ọle yẹ emhin ọhẹnhẹn nin mẹn man bha le, ghe, beji Ebenọnkhiale tale, Kristi da yu ọbhi olukhọ nọnsẹmhan. 4 Sẹyẹ, a da re ọle tọ, yẹ re ọle kpanọ bhi ukpẹdẹ nin ọzea, beji Ebenọnkhiale tale. 5 Ọle da re egbe man Sifas, ọle da yẹ re egbe man ene etuegbe igbeva. 6 Ọle da yẹ re egbe man edibo ne bun gbera iyisẹn isẹn* bhi ẹghe ọkpa. Eso bhi ẹwẹ ele yuno, sokpan ene bunbun sẹyẹ ribhi ẹwẹ mhan. 7 Ọnin ki gbera, ọle da re egbe man Jemis, ọle da yẹ re egbe man ene etuegbe rebhe. 8 Bhi ọkike ọle, ọle da re egbe man mẹn, bọsi ọmọn nọn bha sẹ uki a kuẹ biẹ ọle.

9 Imẹn hi ọnọn khere nẹ bhi ene etuegbe rebhe. Mẹn bha sẹ ọria nan ha ka ba ene etuegbe, ranmhude, mẹn wo kpokpo agbotu nọnsi Osẹnobulua. 10 Ọkpakinọn, ifuẹkẹ nọn khua nin Osẹnobulua mhọn da mẹn, ọle zẹle nin mẹn da yi ebi mẹn khin ẹlẹnan. Ifuẹkẹ nin ọle mhọn da mẹn iyi ihoho, ranmhude, imẹn manman wẹnna nẹ enekẹle. Ọrẹyiriọ, ọ iyi ahu nọnsẹmhẹn mẹn rẹ lu ọle, ifuẹkẹ nọn khua nin Osẹnobulua mhọn da mẹn, ọle rẹkpa mẹn. 11 Aharẹmiẹn imẹn man bha emhin la enekẹle nọn, ọnan hi ọne uhọnmhunje nin mhan wewe, nin bha yẹ rẹọ.

12 Ọne uhọnmhunje nin mhan wewe, ọle hi ghe, a riọ Kristi kpanọ bhi uu. Be ki zẹ nin eso bhi ẹwẹ bha da ha yọle ghe, ariọkpanọ bhi uu iribhọ? 13 Ahamiẹn ghe, ariọkpanọ bhi uu iribhọ, ọnin hi ghe a bha riọ Kristi kpanọ bhi uu. 14 A ha gene miẹn ghe a bha riọ Kristi kpanọ bhi uu, iwẹnna itẹmhọn Osẹnobulua nin mhan lu ki kiẹn ihoho. Sẹyẹ, urẹọbhọ nọnsẹbha ki kiẹn ihoho. 15 Ahamiẹn Osẹnobulua bha riọ Kristi kpanọ bhi uu, sẹyẹ, ghe, ariọkpanọ iribhọ, mhan ki kiẹn esali ohoghe, ranmhude, mhan sọsali ohoghe da Osẹnobulua nin mhan rẹ yọle ghe ọle riọ Kristi kpanọ bhi uu. 16 Ahamiẹn ghe, a ida riọ ene yu kpanọ, ọnin hi ghe a bha riọ Kristi kpanọ bhi uu. 17 Bhi obọ nọnkẹle, ahamiẹn ghe Kristi bha riọkpanọ, urẹọbhọ nọnsẹbha ki ha yi ihoho, sẹyẹ, bha ki ha ribhi olukhọ nọnsẹbha. 18 Rẹ deba ọnin, edibo nesi Jesu ne yu ida ha mhọn ikhuaẹloghe, ọsi ele ki wo fo sẹsẹsẹ. 19 Ahamiẹn ghe, iẹnlẹn nin mhan nyẹnlẹn nian, ọle ọkpa elele nin mhan ha miẹn nin mhan rẹ rẹọ bhi Kristi, ọ wo khẹke nan tohan mhan gbera ẹbho nekẹle.

20 Ọkpakinọn, mhan lẹnmhin ghe, a riọ Kristi kpanọ bhi uu. Ọle hi ọria ọhẹnhẹn nan riọ kpanọ bhi ẹwẹ eria rebhe ne sẹ yu, bọsi emekọnọn ọhẹnhẹn. 21 Beji a miẹn ghe, obọ okpea ọkpa, ọle uu na vae, obọ okpea ọkpa, ọle ariọkpanọ bhi uu ha yẹ na vae. 22 Beji ọrebhe rẹ ha yu ranmhude Adam, iriọ ọrebhe ha yẹ rẹ miẹn iẹnlẹn rẹ na obọ Kristi. 23 Ọkpakinọn, ọsegbe-ọsegbe ele ha rẹ riọ kpanọ: Kristi hi ọnọn ka riọkpanọ.* Ẹghe nin Kristi ha rẹ vae,* ene yi ọsọle ki riọkpanọ. 24 Bhi ọkike ọle, ọkpẹnlẹn ki vae. Ọle ki re ọkpẹnlẹn ọbhi ugbẹloghe rebhe bi ẹbho rebhe ne ribhi ahu. Ọle ha lu ọnan fo, ọle ki mun ọne Agbejele ọbhi obọ ọsi Osẹnobulua nọn yi Aba ọle. 25 Ọle dẹ gbẹloghe bọsi ojie, rẹ sẹbhi ẹghe nin Osẹnobulua ha rẹ gbe eghian nesọle rebhe khuelo. 26 Sẹyẹ, a ki gbe uu nin oghian mhan nọn kike khuelo sẹsẹsẹ. 27 Ebenọnkhiale da yọle: “Osẹnobulua da mun emhin rebhe ọle bhi obọ.” Ọkpakinọn, ọ wo khia bhi ẹlo ghe, ‘ẹghe nin Osẹnobulua rẹ mun emhin rebhe ọle bhi obọ,’ ọle nin Osẹnobulua nọn mun emhin rebhe ọle bhi obọ bha deba ebi ọle mun ọle bhi obọ. 28 Ọkpakinọn, Osẹnobulua ha ki mun emhin rebhe ọle bhi obọ fo, ọne Ọmọn ki degbere nin Osẹnobulua nọn mun emhin rebhe ọle bhi obọ. Bhiriọ, Osẹnobulua ki ha yi emhin rebhe rẹji ọrebhe.

29 Ahamiẹn ene yu ida riọkpanọ, be ha ki sunu ji ene mianmẹn beji ele ha da yu? Ahamiẹn ghe, a ida riọ ene yu kpanọ, bezẹle nin ele da miẹn imianmẹn nọn sẹ inian? 30 Be bhọ yẹ zẹ nin mhan da ha mun egbe mhan bhi okhẹnan ẹghe rebhe? 31 Ibhio, ukpẹdẹ-ukpẹdẹ mẹn rẹ kuẹlo da uu. Beji ọ rẹ yi ẹmhọanta ghe, mẹn manman re ibha hio, ranmhude ikolu nin bha bi Jesu Kristi nin Ebeanlẹn mhan ko mhọnlẹn, iriọ ebi mẹn tale rẹ yi ẹmhọanta. 32 Ahamiẹn bọsi ikpea nekẹle, mẹn ne elanmhẹn ne tuakọn khọnlẹn bhi Ẹfẹsọs,* elele nela mẹn ki miẹn? Ahamiẹn ghe, a ida riọ ene yu kpanọ, “bha ji mhan ha da yẹ le, ranmhude, mhan dẹ yu ewiẹ.” 33 Bha hẹi ji ọria hiẹ bha. Imọẹ ne imhẹn dẹ sabọ riia emhin esili nin bha guẹle a. 34 Bha ha mhọn ẹwanlẹn, bha yẹ ha lu emhin esili. Bha hẹi ha lu emhin ebe. Eso bhi ẹwẹ ibha bha lẹn Osẹnobulua. Beji ẹkhọle ha da lo bha, ọle zẹle nin mẹn da ta ọnan.

35 Ọkpakinọn, ọria sabọ rẹ nọọn yọle: “Be a ha rẹ riọ ene yulu kpanọ yẹ? Unan egbe nela ele ha rẹ fikiere?” 36 Ẹwanlẹn iribhi ene inọnta nan! Ọria ha kọ emhin, ọ ida jẹre sade ọne emhin bha ka yu fo. 37 Uwẹ ha kọ emhin, ọ iyi egbe nin ọne emhin ha rẹ wanre uwẹ kọle, ikpẹ khọnkhan uwẹ gheghe kọ. Ọ sabọ rẹ ha yi ikpẹ ọsi wit la ikpẹ ọsi emhin ọbhebhe. 38 Osẹnobulua, ọle hi ọnọn re unan egbe kẹkẹ nin eran bi iri kẹkẹ beji ọ rẹ ghọn ọlẹn. Ehe, ọle ki re unan egbe kẹkẹ nin ikpẹ kẹkẹ. 39 Ọ iyi efun ọkpa emhin rebhe ne nyẹnlẹn mhọnlẹn, efun ọsi ọria dikẹ bhi ọsi ẹmena, ọsi ẹmena dikẹ bhi ọsi afianmhẹn, ọsi afianmhẹn dikẹ bhi ọsi ehẹn. 40 Sẹyẹ, ene ribhi okhun mhọn egbe ikẹ, ene ribhi otọ yẹ mhọn egbe ikẹ. Uyi ọsi ene ribhi okhun dikẹ bhi uyi ọsi ene ribhi otọ. 41 Ovuẹnlẹn, uki, bi ahiẹnhiẹn iyi ọkpa. Ose kẹkẹ ele mhọnlẹn. Bhi ọsi ẹmhọanta, ahiẹnhiẹn kẹkẹ mhọn ose nọnsọle.

42 Iriọ ọ ha yẹ dia rẹji eria nan ha riọkpanọ. Egbe nọn wea a rẹ re ele tọ. A ha riọ ele kpanọ, ele ki ha mhọn egbe nọn ida sabọ wea. 43 Egbe nan re ẹlo gbe a, a rẹ re ele tọ, ọkpakinọn, ẹghe nan ha rẹ riọ ele kpanọ, ele ki ha mhọn uyi. Egbe nọn wẹghẹ, a rẹ re ele tọ, ọkpakinọn, ẹghe nan ha rẹ riọ ele kpanọ, ele ki ha mhọn ahu. 44 Egbe efun a rẹ re ele tọ, egbe ọsi ẹlinmhin a ha rẹ riọ ele kpanọ. Ahamiẹn ghe, egbe ọsi efun ribhọ, egbe ọsi ẹlinmhin dẹ yẹ ha ribhọ. 45 Ebenọnkhiale da yọle: “Okpea nin ọhẹnhẹn natiọle Adam da ha yi ọria nọn nyẹnlẹn.” Bhi obọ nọnkẹle, Adam nọn kike da ha yi ẹlinmhin nọn re iẹnlẹn nin ọria. 46 Ọkpakinọn, ọ iyi ọria nọn mhọn egbe ẹlinmhin ka vae. Ọria nọn mhọn egbe efun ka vae, ọkuẹsẹ ọria nọn mhọn egbe ẹlinmhin dọ vae. 47 Ọne otọ nan okpea nin ọhẹnhẹn na vae, sẹyẹ, ekẹn a rẹ man ọlẹn. Bhi obọ nọnkẹle, okhun okpea nọnzi eva na vae. 48 Ene a re ekẹn man, inian ele diabe okpea nin ọhẹnhẹn nan re ekẹn man. Bhi obọ nọnkẹle, ene ribhi okhun, inian ele diabe ọnọn na okhun vae. 49 Beji mhan rẹ diabe ọne a re ekẹn man nian, iriọ mhan ha yẹ rẹ diabe ọnọn na okhun vae.

50 Ibhio, mẹn taman ibha ghe aranlẹn bi efun ida sabọ nabhi Agbejele nọnsi Osẹnobulua. Sẹyẹ, egbe nọn wea ida sabọ le uku nọn iwea. 51 Ejayenan nian, bha ji mẹn taman ibha ọta ẹkhokho ọkpa: Imhan rebhe ida yu, ọkpakinọn, a dẹ fi mhan denọ. 52 Osukpa ọ ha rẹ wo sunu, bhi ọsi ẹjẹje. Ọnan dẹ sunu bhi ẹghe nan ha rẹ re akala nọn kike fi. Bhi ọne ẹghe nan, ene yulu ki re egbe nọn isabọ wea rẹ riọkpanọ. Bhi ọsi ẹmhọanta, a ki fi mhan denọ. 53 Egbe nọn sabọ wea ki kiẹn egbe nọn ida sabọ wea. Sẹyẹ, egbe nọn sabọ yu ki kiẹn egbe nọn ida sabọ yu. 54 Ẹghe nin egbe nọn sabọ wea ha rẹ kiẹn egbe nọn isabọ wea, sẹyẹ, egbe nọn sabọ yu kiẹn egbe nọn iyẹ yu, ọne ẹmhọn nan nọn ribhi Ebenọnkhiale ki munsẹ, nọn yọle: “A so uu lọlọ rẹ sẹbhi ẹdẹdẹmhẹndẹ.” 55 “Uu, be ki sunu ji ahu nọnsẹ? Uu, obi nọnsẹ bho?” 56 Olukhọ, ọle hi obi nọn si uu, sẹyẹ, Uhi hi ebe re ahu nin olukhọ. 57 Ekhuẹnmhẹn hi ọsi Osẹnobulua nin ọle rẹ rẹkpa mhan rẹ khọn miotọ, rẹ na obọ Jesu Kristi nin Ebeanlẹn mhan!

58 Bhiriọ, ibhio mẹn nin mẹn hoẹmhọnlẹn, bha deziẹn, bha hẹi beghe, bha ji ẹsọn ha bun bha bhi obọ bhi iwẹnna ọsi Ebeanlẹn mhan. Bha lẹn sẹbhọ ghe, ẹsọn nin bha miẹn nin Ebeanlẹn mhan, ibha bha miẹn ọlẹn kua.