Luk

24 Bhi ọsewewiẹ bhibhi bhi ukpẹdẹ ọhẹnhẹn ọsi ọne uzana,* ene ikhuo da vae bhi eji a da re Jesu tọ. Ele da ne emhin ne vin-ohin nin ele muegbe ọle ọbhi otọ rẹkhan egbe. 2 Ele da kere ghe, a sua udo nan rẹ gue unun ọsi ọne idin sibhọre. 3 Ele ki nabhi eji a da re Jesu tọ, ele bha yẹ ke ekuegbe nọnsọle re. 4 Ọnan da wo manman han ele ilo. Bhi ọne ẹghe nin, ikpea eva ne yọ ukpọn nọn fi wanlan-wanlan da bu ele re. 5 Ofẹn da manman ha mun ene ikhuo. Ele bha gbudu khua ẹlo okhun. Ene ikpea da ki taman ele yọle: “Bezẹle nin ibha da ha guanọ ọria nọn ribhi agbọn bhi ẹwẹ ene yulu? 6 Ọle iribhi enan, a riọ ọle kpanọ. Ibha bha be yere ebi ọle taman ibha ẹghe nin ọle rẹ ha ribhi Galili? 7 Ọle da yọle ghe, a dẹ mun Ọmọn nọnsi okpea nin eria olukhọ nin ele gbe ọle a bhi okhun oran, ọkpakinọn, bhi ukpẹdẹ nọnzi ea, a ki riọ ọle kpanọ.” 8 Ele da ki ye ene ẹmhọn nin Jesu tale re. 9 Ele da fikie ha khian uwa. Ele da dọ taman ene etuegbe ugbolọ bi edibo nekẹle emhin rebhe ne sunu. 10 Ene ikhuo ne ha ta ene ẹmhọn nan hi Meri Madalin, Joana, bi Meri nin inẹn Jemis. Ikhuo nekẹle ne rẹkhan ele da yẹ ha ta ene ẹmhọn nan man ene etuegbe. 11 Ọkpakinọn, ebi ene ikhuo nan ha ta, da diabe ọta uuki bhi ehọ nọnsele. Ele bha rẹọbhọ.

12 Pita da ki jẹje runẹ ha khian ọne idin. Ọle ki sẹbhi enin, ọle da niẹn urulu ghe ẹkẹ ọne idin. Ikpọn nan rẹ gbanọ ekuegbe nọnsi Jesu ọkpa ọle ki daghe. Ọle da sibhi enin re dọ ha ria ẹmhọn ebe sunu.

13 Bhi ọne ukpẹdẹ nin, eva bhi edibo nesi Jesu da ha khian idunmhun natiọle Ẹmeyọs. Rẹ nabhi Jerusalẹm rẹ sẹbhi Ẹmeyọs, ree sẹbhi imaili ihinlọn.* 14 Ele veva da ha tẹmhọn ene emhin nan ne sunu.

15 Bhi ẹghe nin ele rẹ ha zilo ene ẹmhọn nan, Jesu da bu ele re, yẹ deba ele ha khian. 16 Ọkpakinọn, ele bha sabọ lẹn ghe Jesu nọn. 17 Ọle da nọọn ele yọle: “Be bhọ hi ọne ẹmhọn nin bha zilo ọle khian?” Ele da mundia yẹ lu ẹlo fẹyẹ bhi uhọnmhọn. 18 Ọkpa bhi ẹwẹ ele natiọle Kliopas da wanniẹn ọlẹn yọle: “Be uwẹ nọn nyẹnlẹn bhi Jerusalẹm ha rẹ yọle ghe uwẹ bha lẹn ebe sunu bhi enin, la ọriọbhe uwẹ be khin?” 19 Ọle da nọọn ele yọle: “Emhin nela?” Ele da yọle: “Emhin ne sunu ji Jesu nin obhi Nazarẹt. Akhasẹ nọn manman mhọn ahu ọle ha khin bhi ẹlo nọnsi Osẹnobulua bi ọsi eria. Ọle da wo re ọnan man bhi emhin nin ọle ha lu, bi ọta nin ọle ha ta; 20 ọkpakinọn, ene ohẹn ne khua bi ene gbẹloghe da mun ọlẹn nin Pailet nọn gbe ọle a. Ele da ki khan ọlẹn ọbhi oran. 21 Imhan da rẹ ha riale ghe, ọne okpea nan, ọle ha miẹn ibhokhan Izrẹl fan. Rẹ gbera ọnan, ikpẹdẹ ea ki nọn nian nin ene emhin nan sunu. 22 Sẹyẹ, ikhuo eso bhi ẹwẹ mhan da ta ẹmhọn ne han mhan ilo man mhan. Bhi ọsewewiẹ nan, ele da kpanọ ha khian ọne idin. 23 Ele ki sẹbhi enin, ele bha miẹn ekuegbe nọnsọle. Ele da fikiere dọ taman imhan ghe, ele miẹn ẹhi ne taman ele ghe Jesu riọkpanọ. 24 Bhiriọ, eso bhi ẹwẹ imhan da ha khian ọne idin. Ele ki sẹbhi enin, ele da kere ghe, Jesu iyẹ ribhi ẹkẹ ọne idin beji ene ikhuo tale. Sokpan, ele bha miẹn ọlẹn.”

25 Ọle da taman ele yọle: “Ibha ne imhọn ẹwanlẹn, ne iyẹ kẹ rẹọ ọbhi emhin! Bezẹle nin ibha bha da rẹọ ọbhi emhin nin ene akhasẹ tale? 26 Ọ bha be khẹke nin Kristi rẹ loya ene emhin nan, beji ọle ha da miẹn uyi nọnsọle?” 27 Ọle da noo emhin nin Mozis gbẹn bi emhin nin ene akhasẹ rebhe gbẹn rẹ re otọ emhin ne rẹtẹ Jesu man ele bhi Ebenọnkhiale.

28 Ele ki zẹ khian, ele da sikẹ idunmhun nin ele khian. Ọkpakinọn, ọle da man ha lu ghe ọle bha sẹ sẹbhi eji ọle khian. 29 Ele da ha taman ọlẹn nin ọle hẹi kpanọ. Ele da yọle: “Ne imhan dia, ranmhude emuan re fo.” Bhiriọ, ọle da rẹkhan ele nabhi uwa dọ ne ele dia. 30 Ele ki dotua nẹga itebu nin ele ha le ebale, ọle da re ibrẹd, nan erọnmhọn ọbhọ, yẹ khuẹnẹn ọlẹn an, sẹyẹ, ọle da munhẹn ha gha ọle nin ele. 31 Bhi ọne ẹghe nan nian, ẹlo nọnsele da gbanọn an. Ele ki da lẹn ọne ọle khin. Ọkpakinọn, ọle da horiẹ zẹ ele obọ. 32 Ele da ki ha taman egbe ele yọle: “Ohoo! Ọnan bhọ zẹle nan da miẹn ghe, uwedẹ nin ọle rẹ ha re otọ Ebenọnkhiale man mhan beji imhan ha vade bhi uwedẹ da wo ha hu mhan bhi udu.” 33 Bhi ọne ẹghe nin tee, ele da fikie ha khian Jerusalẹm. Ele ki sẹbhi enin, ele da miẹn ene etuegbe ugbolọ, bi ẹbho nekẹle ne deba ele sikoko. 34 Ene ẹbho da taman ele yọle: “Bhi ọsi ẹmhọanta, Ebeanlẹn imhan riọkpanọ. Ọle re egbe man Saimọn!” 35 Ele da ki taman ene ẹbho emhin nọn sunu bhi uwedẹ, bi ebi ele rẹ lẹn yẹ ghe Jesu re egbe man ele ẹghe nin ọle rẹ ha khuẹnẹn ibrẹd a.

36 Ẹghe nin ele rẹ ha ta ene ẹmhọn nan, Jesu da vae bhi ẹwẹ ele, yẹ tuẹ ele. Ọle da yọle: “Ọfure ne ibha dia.” 37 Ọkpakinọn, ranmhude ofẹn nọn ha mun ele, ele da ha riale ghe ẹlinmhin ele daghe. 38 Ọle da ki nọọn ele yọle: “Bezẹle nin ofẹn da ha mun ibha? Sẹyẹ, bezẹle nin ibha da ha mhọn edandan? 39 Bha fẹ mẹn obọ bi oẹ ghe, nin ibha da lẹn ghe imẹn nọn. Ibha ha re obọ so mẹn, bha ki lẹn ghe, mẹn iyi ẹlinmhin, ranmhude, ẹlinmhin imhọn uguẹ bi efun beji imẹn rẹ mhọnlẹn.” 40 Beji ọle ha ta ọnan, ọle da re obọ bi oẹ nesọle man ele. 41 Ranmhude eghọnghọn nọn gbe ele udu a, bi uwedẹ nin ọne emhin rẹ han ele ilo, ele bha sẹyẹ rẹọ ọle bhọ. Bhiriọ, ọle da taman ele yọle: “Ibha be mhọn ebale bhi enin?” 42 Ele da ki re ehẹn nan kale nanlẹn. 43 Ọle da miẹn ele le, yẹ sira ele le ọle.

44 Ọle da ki taman ele yọle: “Ẹghe nin imẹn rẹ ha ribhi ẹwẹ ibha, imẹn da taman ibha ghe, ene emhin rebhe nan tale rẹji imẹn bhi ebe Uhi nọnsi Mozis, bhi ebe ọsi ene Akhasẹ, bi ebe Illo Ogẹn dẹ munsẹ.” 45 Bhiriọ, ọle da rẹkpa ele rẹ manman lẹn otọ ebi a re ẹmhọn ne ribhi Ebenọnkhiale ta. 46 Sẹyẹ, ọle da taman ele yọle: “Ọnan hi ebi a gbẹn ọbhi Ebenọnkhiale: ghe Kristi dẹ loya. Bhi ukpẹdẹ nọnzi ea, ọle ki riọkpanọ bhi uu. 47 Sẹyẹ, a ki re elin nọnsọle wewe ọle nabhi otọ agbọn rebhe ghe, ọkhẹke nin ẹbho kiọya bhi olukhọ nọnsele beji a ha da rẹhunmhan ele. Jerusalẹm a ha da munhẹn. 48 Ibha dẹ sọsali ọbhi ene emhin nan. 49 Ghọle! Imẹn dẹ je ebi Aba imẹn ve nin ibha ji ibha. Bhi ọsẹbha, ibha debhi ọne agbaẹbho nan an rẹ sẹbhi ẹghe nan ha rẹ re ahu nọn na okhun vae nin ibha.”

50 Ọle da ki ne ele rẹkhan egbe ha khian Bẹtani. Ọle ki sẹbhi enin, ọle da ne obọ okhun, yẹ nan erọnmhọn nin ele. 51 Beji ọle ha nan erọnmhọn nin ele, a da re ọle kpanọ bhi ẹwẹ ele, yẹ re ọle ha khian okhun. 52 Ele da debhẹre nanlẹn, yẹ re eghọnghọn fikie ha khian Jerusalẹm. 53 Ẹghe rebhe ele rẹ ha ribhi uwa oga. Ele da ha gẹn Osẹnobulua bhi enin.