Luk

9 Ọle da ki datie etuegbe igbeva nesọle. Ọle da re ahu nin ele rẹ ha khu ẹlinmhin-ebe si ẹbho bhi egbe re, bi nin ele rẹ re egbe daan ẹbho. 2 Sẹyẹ, ọle da je ele dagbare nin ele dọ tẹmhọn Agbejele nọnsi Osẹnobulua, yẹ ha re egbe daan ẹbho. 3 Ọle da taman ele yọle: “Ibha hẹi mun emhin soso rẹkhan egbe. Ibha hẹi re ukpokpo mhọnlẹn, la ẹkpa ebale, la ibrẹd, la igho.* Ibha hẹi ne ukpọn eva mhọnlẹn.* 4 Uwa nọn hi ki rẹ khin nin bha na i, bha debhi enin an ọkuẹsẹ ibha kpanọ. 5 Agbaẹbho nọn hi ki rẹ khin nin ẹbho bha da miẹn ibha ọbhi egbe, bha bọnmhẹn ekẹn sibhi oẹ nọnsẹbha re sade ibha sibhi ọne agbaẹbho re, beji ọ ha da ha yi ọsali rẹji ele.” 6 Ele da munhẹn ha na bhi idunmhun kẹkẹ ne ribhi ọne agbaẹbho khian. Ele da ha wewe ọne ọta nọn mhẹn, yẹ re egbe daan ẹbho bhi ijerebhe.

7 Hẹrọd* nin ojie da họn emhin rebhe ne ha sunu. Ọ da wo manman han ọle ilo, ranmhude ẹbho eso da ha yọle ghe, a riọ Jọni kpanọ bhi uu. 8 Ọkpakinọn, eso da ha yọle Ẹlaija nọn. Sẹyẹ, eso da yọle ghe ọkpa bhi ene akhasẹ ne nyẹnlẹn bhi ẹghe ẹdẹlẹ ọle riọ kpanọ. 9 Hẹrọd da yọle: “Imẹn gbe Jọni an. Họla ki khọnan nin ẹbho tẹmhọnlẹn?” Bhiriọ, ọle da ha guanọ nin ọle miẹn ọlẹn.

10 Ene etuegbe ki fikiere ele da taman Jesu emhin rebhe nin ele lu. Bhiriọ, ọle da ne ele ọkpa ha khian agbaẹbho natiọle Bẹtseada. 11 Ọkpakinọn, ene usun ẹbho ki lẹn ọnan, ele da rẹkhan ọlẹn. Ọle da miẹn ele ọbhi egbe, yẹ munhẹn ha tẹmhọn Agbejele nọnsi Osẹnobulua man ele. Ọle da yẹ re egbe daan ẹbho ne khọnmhọn. 12 Ejayenan nian, ebi ki fẹkẹ ha lo. Bhiriọ, ene etuegbe igbeva da bu Jesu re yẹ taman ọlẹn yọle: “Je ene usun ẹbho kpanọ beji ele ha da diọbhi idunmhun ne nẹga enan dọ guanọ ebale, bi eji ele ha dia i, ranmhude, eji mhan ye nan wo fi ahiẹ a.” 13 Ọkpakinọn, ọle da taman ele yọle: “Bha guanọ ebale nin ele le.” Ele da yọle: “Gbera ibrẹd isẹn bi ehẹnlẹn eva, mhan imhọn emhin soso. La nin mhan be dọ dẹ ebale ji ene ẹbho nan rebhe?” 14 Ikpea ne bun sẹbhi uli isẹn,* ele ha ribhi enin. Ọkpakinọn, ọle da taman edibo nesọle yọle: “Ibha taman ele nin ele re usun dotua, ebe sẹ itue igbe nyan egbọ eva* bhi usun ọkpa.” 15 Ele da lu iriọ. Ene ẹbho rebhe da dotua. 16 Ọle ki da ne ene ibrẹd isẹn bi ene ehẹn eva, ọle da khua ẹlo okhun, yẹ nan erọnmhọn ọbhọ. Ọle da khuẹnẹn ọlẹn an yẹ ne nin edibo nesọle, nin ele ne nin ene usun ẹbho. 17 Ene ẹbho rebhe da le sẹbhi ọkhọnlẹn. Ene edibo da koko ebale nọn kẹre kugbe. Ọ da vuọn okhuale igbeva.

18 Akizẹbue, bhi eji ọle ọkpa da ha nan erọnmhọn, edibo nesọle da bu ọle re. Ọle da nọọn ele yọle: “Họla ene ẹbho yọle ghe mẹn khin?” 19 Ele da wanniẹn ọlẹn yọle: “Jọni nọn re amẹn nin ẹbho. Ọkpakinọn, eso yọle Ẹlaija, ẹso yẹ yọle ọkpa bhi ene akhasẹ ne nyẹnlẹn bhi ẹghe ẹdẹlẹ ọle riọ kpanọ.” 20 Ọle ki da nọọn ele yọle: “Ibha kii, họla bha yọle imẹn khin?” Pita da wanniẹn ọlẹn yọle: “Ọne Kristi nin Osẹnobulua jere.” 21 Ọle da manman sekha nin ele. Ọle da taman ele nin ele hẹi ta ọnan man ọria soso. 22 Ọle da yọle: “Ọmọn nọnsi okpea dẹ manman loya. Ene ewanlẹn, ene ohẹn ne khua, bi ene man uhi dẹ he ọle. A ki yẹ gbe ọle a. Ọkpakinọn, ukpẹdẹ nọnzi ea, a ki riọ ọle kpanọ.”

23 Ọle da ki taman ọrebhe yọle: “Ọria nọn hi ki rẹ khin nọn ho nọn rẹkhan imẹn, ọle dẹ he egbe nọnsọle, yẹ tọn oran-iloya* nọnsọle mun ha rẹkhan imẹn ukpẹdẹ-ukpẹdẹ. 24 Ọria nọn hi ki rẹ khin nọn ho nọn hinmhin uhọnmhọn nọnsọle dẹ re uhọnmhọn nọnsọle fia. Ọkpakinọn ọnọn hi ki rẹ khin nọn re iẹnlẹn nọnsọle fia ranmhude imẹn dẹ miẹn ọlẹn. 25 Elele nela ọria ha gene miẹn bhọ sade ọle re ọne agbọn nan rebhe kiẹn ọsọle, ọkpakinọn, ọle re iẹnlẹn nọnsọle fia, la ọle kuan egbe ọle? 26 Ọria nọn hi ki rẹ khin nin ẹkhọ mẹn bi ọta nọnsẹmhẹn lo, ẹkhọ ọne ọria dẹ yẹ ha lo Ọmọn nọnsi okpea bhi ẹghe nin ọle ha rẹ re uyi nọnsọle, uyi nọnsi Aba ọle, bi uyi ọsi ene ẹhi ne khiale vae. 27 Bhi ọsi ẹmhọanta, imẹn taman ibha ghe, eria eso ribhi ẹwẹ bha bhi enan, ne ida yu hiehie, sade ele bha ka daghe Agbejele nọnsi Osẹnobulua fo.”

28 Ọ ki bu ikpẹdẹ elẹnlẹn nin Jesu ta ene ẹmhọn nan, ọle da re Pita, Jọni, bi Jemis rẹkhan egbe ha khian uke oke dọ nan erọnmhọn. 29 Beji ọle ha nan erọnmhọn, ẹlo nọnsọle da fidenọ, sẹyẹ, ukpọn nin ọle ne yọ da manman ha fua. 30 Ghọle! ikpea eva da dọ nanlẹn ha zilo. Ele hi Mozis bi Ẹlaija. 31 Ele da ha fi wanlan-wanlan. Ele da munhẹn ha zilo ebi ọle ha rẹ kpanọ yẹ, nọn da kẹ sunu bhi Jerusalẹm. 32 Bhi ọne ẹghe nan, owe da re Pita bi edibo eva nekẹle. Ọkpakinọn, ẹghe nin owe ki rẹ gbanọ si ele ẹlo re, ele da daghe uyi nọnsi Jesu. Ele da yẹ daghe ikpea eva nin ele bi ọle ko mundia. 33 Ene ikpea nan ki ha kpanọ, Pita da taman Jesu yọle: “Ọman-emhin, ọ wo mhẹn ghe imhan ribhi enan. Bhiriọ, ji mhan bọn ibọkpọ ea, ọkpa ki ha yi ọsi uwẹ, ọkpa ki ha yi ọsi Mozis, ọkpa ki yẹ ha yi ọsi Ẹlaija.” Ọle bha lẹn ebi ọle ha ta. 34 Ọkpakinọn, beji ọle ha ta ene emhin nan, adudu amẹn da zegbere yẹ ha degue ele. Ele ki nabhi ẹkẹ ọne adudu amẹn, ofẹn da ha mun ele. 35 Ukpuru da ki na bhi ẹkẹ ọne adudu amẹn yọle: “Ọmọn nọnsẹmhẹn khọnan, ọne a zẹle. Bha ka ọle ehọ.” 36 Beji ele sẹ yẹ ha họn ọne ukpurulu, Jesu ọkpa ele ki ha daghe. Ele bha taman ọria soso bhi ọne ẹghe nin emhin nin ele miẹnlẹn. Ele da fẹkẹ huẹan.

37 Ele ki huẹnre bhi ọne oke beji ẹdẹ wele, usun ẹbho ne bunbun da bu ele re. 38 Ghọle! ọkpea ọkpa da so dagbare bhi ẹwẹ ene usun ẹbho ha yọle: “Ọman-emhin, huẹan rẹkpa ọmọn nọnsẹmhẹn,* ọle ọkpa mẹn mhọnlẹn. 39 Ẹlinmhin-ebe ha mun ọlẹn, ọle ki wo reso. Ọne ẹlinmhin ki re ilinlẹn mun ọlẹn. Ọle ki ha hu bhi unun. Ọne ẹlinmhin bha da kuan ọlẹn fo, ọ izẹ ọle obọ. 40 Imẹn da bhii edibo nesẹ nin ele khu ọne ẹlinmhin si ọle bhi egbe re, ọkpakinọn, ọ bha fo ele.” 41 Jesu da ki yọle: “Eo, ọne ore nan nọn tẹkhekhe, nọn imhọn urẹọbhọ, ji imẹn ha deba ibha lu ọnan sẹ? Sẹyẹ, eka ẹghe imẹn ha ziẹngbe ẹmhọn ibha sẹ? Re ọmọn nọnsẹ ji imẹn bhi enan.” 42 Ọne ọmọn ki ha bu Jesu vade, ọne ẹlinmhin-ebe da mun ọlẹn gbe ọbhi otọ, yẹ manman re ilinlẹn mun ọlẹn. Ọkpakinọn, Jesu da taman ọne ẹlinmhin-ebe nọn si ọle bhi egbe re. Ọle da re egbe daan ọne ọmọn yẹ re ọle nin aba ọle. 43 Okpahu nin Osẹnobulua mhọnlẹn da wo han ene ẹbho ilo.

Bhi ọne ẹghe nan nin ilo rẹ han ele ranmhude emhin nin Jesu ha lu, Jesu da taman edibo nesọle yọle: 44 “Bha gbehọkotọ nọnsẹn, bha ha ye ene ọta nan re: A dẹ mun Ọmọn nọnsi okpea khiẹn nin eria.” 45 Ọkpakinọn, ele bha lẹn ebi ọle ha tẹmhọnlẹn. Bhi ọsi ẹmhọanta, a re he nin ele beji a ha da miẹn ghe ele bha sabọ lẹn otọle. Sẹyẹ, ofẹn da ha mun ele nin ele rẹ nọọn ọlẹn ebi ọle ha tẹmhọnlẹn.

46 Ele da munhẹn ha gbugan ẹmhọn ọnọn lu okpọria nẹ bhi ẹwẹ ele. 47 Ranmhude Jesu lẹn ebe ha ri ele bhi ọkhọle, ọle da tie obhokhan ọkpa re, yẹ re ọle mundia sikẹ egbe. 48 Ọle da taman ele yọle: “Ọria nọn hi ki rẹ khin nọn miẹn ọne obhokhan nan ọbhi egbe ranmhude elin nọnsẹmhẹn, imẹn ọle yẹ miẹn ọbhi egbe; sẹyẹ, ọria nọn hi ki rẹ khin nọn miẹn imẹn ọbhi egbe, ọnọn je imẹn re ọle yẹ miẹn ọbhi egbe. Ọria nọn re egbe ọle kiẹn ọnọn khere nẹ bhi ẹwẹ ibha, ọle hi ọnọn lu okpọria nẹ.”

49 Jọni da ki taman ọlẹn yọle: “Ọman-emhin, imhan da miẹn ọria nọn ha re elin nọnsẹ rẹ khu ẹlinmhin-ebe si ẹbho bhi egbe re. Ranmhude ọle iribhi usun nọnsẹmhan, mhan da rẹ ha taman ọlẹn nin ọle hẹi yẹ lu iriọ.” 50 Ọkpakinọn, Jesu da taman ọlẹn yọle: “Ibha hẹi yẹ de ọle idobolo. Ọria nọn hi ki rẹ khin nọn bha ne ibha suan, ibo nọnsẹbha ọle ye.”

51 Ọne ẹghe ki ha sire nan ha rẹ re Jesu ha khian okhun, ọle da wo muegbe nin ọle rẹ ha khian Jerusalẹm. 52 Bhiriọ, ọle da je ẹbho kalo. Ene ẹbho da nabhi idunmhun ọkpa ọsi ibhokhan Sameria nin ele dọ hẹnhẹn emhin ọbhi otọ khẹ ọle. 53 Ọkpakinọn, ene ibhokhan Sameria bha miẹn ọlẹn ọbhi egbe, ranmhude, ọle wo muegbe nin ọle rẹ ha khian* Jerusalẹm. 54 Jemis bi Jọni nin edibo nesọle ki daghe ọnan, ele da yọle: “Ebeanlẹn mhan, nin mhan be na bhi okhun tie eranlẹn re nan rẹ fuẹn ele a?” 55 Ọle da denọ ẹlo da ele yẹ ne ele gui. 56 Ele da ki kpanọ ha khian idunmhun ọbhebhe.

57 Beji ele ki ha khian bhi uwedẹ, okpea ọkpa da taman ọlẹn yọle: “Mẹn dẹ rẹkhan uwẹ ha khian eji ọ hi ki rẹ khin nin uwẹ khian.” 58 Jesu da ki taman ọlẹn yọle: “Alabe* mhọn uhio nin ele dia i, afianmhẹn ne tin bhi okhun yẹ mhọn akolo. Ọkpakinọn, Ọmọn nọnsi okpea imhọn eji ọle da nowẹ.” 59 Ọle da ki taman okpea ọbhebhe yọle: “Dọ ha rẹkhan imẹn.” Ọne okpea da yọle: “Ebeanlẹn imẹn, ji imẹn ka dọ re aba imẹn tọ.” 60 Sokpan, ọle da taman ọlẹn yọle: “Ji ene yu da re ene yu tọ. Ha khian, dọ ha wewe ẹmhọn Agbejele nọnsi Osẹnobulua.” 61 Ọria ọbhebhe da yẹ taman ọlẹn yọle: “Mẹn dẹ rẹkhan uwẹ Ebeanlẹn imẹn, ọkpakinọn, ji mẹn ka dọ gbe ọkinbue nin ene ribhi azagba-uwa nọnsẹmhẹn.” 62 Jesu da taman ọlẹn yọle: “Ọria nọn hi ki rẹ khin nọn gua egua, nọn yẹ ha ghe ikeke, bha sẹ ọnọn ha nabhi Agbejele nọnsi Osẹnobulua.”