Luk

16 Ọle da yẹ taman edibo nesọle yọle: “A da taman okpea ọkpa nọn fele ghe, ọguọmhandia nọnsọle bha ha re emhin nesọle khian nọnsẹn. 2 Bhiriọ, ọle da datie ọle yẹ taman ọlẹn yọle, ‘Be ọnan khin nin mẹn họn ghe uwẹ lu? Taman mẹn ebi uwẹ rẹ re emhin nesẹmhẹn khian yẹ, ranmhude uwẹ ida yẹ ha gbẹloghe uwa nọnsẹmhẹn.’ 3 Ọne ọguọmhandia da taman egbe ọle yọle, ‘Be imẹn ha lu yẹ nian, beji a miẹn ghe ebeanlẹn imẹn yọle imẹn ida yẹ ha gbẹloghe uwa nọnsọle? Imẹn imhọn ahu nan rẹ tọ otọ, sẹyẹ, ẹkhọle ida ji imẹn rẹ dọ ha bhii emhin. 4 Ẹnhẹn! Imẹn lẹn ebi mẹn ha lu yẹ, beji a da miẹn ghe a ha re imẹn sibhi ọne ihe nan re, ẹbho ki miẹn imẹn ọbhi egbe bhi uwa nọnsele.’ 5 Ọle da tie ẹbho ne mhọn ebeanlẹn ọlẹn osa. Ọle da nọọn ọne ọhẹnhẹn yọle, ‘Eka uwẹ mhọn ebeanlẹn imẹn le?’ 6 Ọnin da wanniẹn ọlẹn yọle, ‘Uko* iyisẹn* ọsi abhii oliv.’ Ọle da taman ọlẹn yọle, ‘Miẹn ebe nin mhan rẹ ko re obọ ọbhọ, dotua, uwẹ ha jẹje gbẹn igbe nyan egbọ eva* ọbhọ.’ 7 Ọle da ki taman ọbhebhe yọle, ‘Uwẹ yẹ, eka uwẹ mhọn mhan ele?’ Ọnin da yọle, ‘Okodo* iyisẹn* ọsi wit.’ Ọle da taman ọlẹn yọle, ‘Miẹn ebe nin mhan rẹ ko re obọ ọbhọ, uwẹ ha gbẹn egbọ enẹn* ọbhọ.’ 8 Ebeanlẹn ọsi ọne ọguọmhandia da wo gẹn ọlẹn. Ranmhude, arẹmiẹn emhin nọn bha gba ọle lu, ẹwanlẹn ọle rẹ lu emhin. Bhi ọsi ẹmhọanta, imọn ọsi ọne ore nan, ele wanlan nẹ imọn ọsi ẹfua bhi uwedẹ nin ele rẹ ne ẹbho ne ribhi ọne ore nan lu emhin.

9 “Iriọ sẹyẹ, mẹn taman ibha ghe, nin bha re ene ẹfe ne bha khia rẹ lu imọẹ, beji a ha da miẹn ghe, ene ẹfe ha fo, ene imọẹ ki miẹn bha ọbhi egbe bhi eji a da nyẹnlẹn bhi ighegheghe. 10 Ọria nọn re ọbhi emhin khere khian nọnsẹn, ọle ha yẹ re udede emhin khian nọnsẹn. Bhi obọ nọnkẹle, ọria nọn bha re ọbhi emhin khere khian nọnsẹn, ọle ida yẹ re emhin nọn kpọnọ khian nọnsẹn. 11 Bhiriọ, ahamiẹn ibha bha sabọ re ene ẹfe ne bha khia khian nọnsẹn, họla ha ki mun ẹfe ọsaje ibha bhi obọ? 12 Sẹyẹ, ahamiẹn ghe ibha bha sabọ re emhin ọsi ọria ebhebhe khian nọnsẹn, họla ha ki re emhin nin bha, nọn ha yi ọsẹbha? 13 Ọguọmhandia soso iribhọ nọn ha sabọ ga ebeanlẹn eva. Ọle dẹ he ọkpa yẹ hoẹmhọn ọnọnkẹle, ọle dẹ sun rẹkhan ọkpa, yẹ re ẹlo gbe ọnọnkẹle a. Ibha ida sabọ ha ga Osẹnobulua, yẹ ha ga ẹfe.”

14 Bhi ọne ẹghe nan, ibhokhan Farisi ne hoẹmhọn igho bii emhin ebhebhe, da ha ka ọle ehọ ẹghe nin ọle rẹ ha ta ene emhin nan. Ele da munhẹn ha nyọnghọn ọle ihue. 15 Bhiriọ, Jesu da taman ele yọle: “Bha ki wo ha lu emhin nọn ha re ẹbho ha riale eria ne khiale bha khin. Ọkpakinọn, Osẹnobulua lẹn ebe ri ibha bhi ọkhọle. Emhin nin ẹbho riale okpemhin nọn, ọle hi ebe sọnnọn Osẹnobulua.

16 “Ọne Uhi bi ene Akhasẹ wo ha ribhọ rẹ sẹbhi ẹghe ọsi Jọni. Rẹ na bhi ọne ẹghenin ha vade, Agbejele nọnsi Osẹnobulua hi ọta esili nan wo ha wewe. Sẹyẹ, unan ẹbho rebhe wo ha khu ọbhọ. 17 Nin otọ bi okhun rẹ gbera kie, ọle ha lẹkhẹ gbera nan rẹ miẹn ghe, ọkpa bhi ikpebe ọsi ọne Uhi bha munsẹ.

18 “Ọria nọn hi ki rẹ khin nọn khu okhuo ọle fia yẹ re okhuo ọbhebhe, oghẹ ọle gbele. Sẹyẹ, ọria nọn hi ki rẹ khin nọn re okhuo nan khu fia bhi isi ọdọ, oghẹ ọle gbele.

19 “Okpea ọkpa nọn fele da ha ribhọ nọn wo ha yọ ukpọn ne ghanlẹn.* Ọle da wo ha re ẹfe nọnsọle rẹ sọnyẹnmhẹn ukpẹdẹ-ukpẹdẹ. 20 Okpea ọbhebhe da ha ribhọ nọn bhii emhin. Ẹbho ki ha mun ọlẹn vae bhi odalo igeti ọsi ọne okpea nọn fele. Lazarọs a tiọle. Itẹ-itẹ vuọn ọle egbe. 21 Ọle da ha guanọ nin ọle ha le ebale nọn ha denọ kua bhi uke itebu ọsi ọne okpea nọn fele. Rẹ deba ọnin, ene awa ki vae dọ ha nanọ ọle itẹ. 22 Ẹghe eso ki gbera, ọne okpea nọn bhii emhin da yu. Ene ẹhi da mun ọlẹn kpanọ bu Ebraham.*

“Ọne okpea nọn fele da yẹ yu. A da re ọle tọ. 23 Bhi eji ọle da ha re oya le bhi ẹkẹ Idin,* ọle da khua ẹlo okhun. Ọle da daghe Ebraham bhi okhun vuun. Lazarọs da sikẹ ọle.* 24 Ọle da ki so dagbare yọle, ‘Ebraham nin Aba, mhọn itohan da mẹn, uwẹ ha je Lazarọs, nin ọle dọ di ikpẹn-obọ nọnsọle bhi amẹn yẹ nọnọn ọlẹn imẹn bhi olanmhẹn, ranmhude, imẹn wo ha re oya le bhi ẹkẹ ọne eranlẹn nan nọn manman to.’ 25 Ọkpakinọn, Ebraham da yọle, ‘Ọmọn, yere ghe uwẹ wo manman sọnyẹnmhẹn ẹghe nin uwẹ rẹ ha ribhi agbọn. Bhi obọ nọnkẹle, Lazarọs da wo miẹn oya bhi egbe. Bhi ejayenan nian, a fẹkẹ gbẹloghe ọle, ọkpakinọn, uwẹ re oya le. 26 Rẹ gbera ene emhin nan, udede uhio ribhi adesẹ imhan bi ibha, beji a ha da miẹn ghe, ene ribhi enan ida sabọ sẹbhi obọ nin. Sẹyẹ, ẹbho ne ribhi obọ nin ida sabọ vae bhi obọ nan.’ 27 Ọle da ki yọle, ‘Beji a miẹn iriọ nọn aba, imẹn bhii uwẹ nin uwẹ je ọle ha khian uwa nọnsi aba imẹn, 28 nin ọle dọ sọsali man ibhio mẹn isẹn nin ikpea, beji a ha da miẹn ghe ele bha yẹ gbo vae bhi enan dọ ha le oya. 29 Ọkpakinọn, Ebraham da yọle, ‘Ele bi Mozis bi ene akhasẹ ko ribhi enin, ji ele ka ele ehọ.’ 30 Ọle da ki yọle, ‘Heye, Ebraham nin Aba. Ọria nọn yulu ha riọ kpanọ bu ele, ọle ele ha da fidenọ.’ 31 Ọkpakinọn, ọle da taman ọlẹn yọle, ‘Ahamiẹn ele bha ka Mozis bi ene akhasẹ ehọ, ele ida yẹ kaehọ, aharẹmiẹn ọria riọkpanọ bhi uu bu ele.’”