Luk

17 Ọle da ki taman edibo nesọle yọle: “A ida miẹn ghe emhin ne ha re ẹbho dua oẹ bha zegbere, ọkpakinọn, ọkhọbhegbe hi ọsi ọne ọria nọn re ẹbho dua oẹ. 2 Nan rẹ diẹn udo nan rẹ nọ emhin ọle bhi urulu, yẹ sua ọle fiọbhi ẹkẹ okpẹdẹ, ọle ha mhẹn ọlẹn bhi egbe gbera nin ọle rẹ dua ọkpa bhi ene ibhokhan nan oẹ. 3 Ibha mhọn ẹwanlẹn. Ahamiẹn obhio ẹ lu emhin ebe, re adia nanlẹn. Ahamiẹn ọle fidenọ, rẹhunmhan ọlẹn. 4 Aharẹmiẹn igba ihinlọn ọle rahiẹ uwẹ bhi ukpẹdẹ, nin ọle da yẹ fikie bu uwẹ re igba ihinlọn yẹ dọ yọle, ‘Rẹhunmhan imẹn,’* ọkhẹke nin uwẹ rẹhunmhan ọlẹn.”

5 Ene etuegbe da taman Jesu nin Ebeanlẹn ele yọle: “Rẹkpa mhan rẹ manman ha mhọn urẹọbhọ.” 6 Jesu da ki yọle: “Ahamiẹn bha mhọn ureọbhọ nọn kpọnọ sẹ bii ikpẹ mọstad, bha dẹ sabọ taman ọne oran mọbẹri nan nọn bhihi yọle, ‘Vu sibhi enan re dọ debhi ẹkẹ okpẹdẹ a.’ Ọ ki gene sunu.

7 “Ji a man yọle ibha mhọn ọguọmhandia nọn dọ gua bhi ugbo, la nọn dọ re elanmhẹn kọn. Ọle ha fikiere, uwẹ dẹ be taman ọlẹn yọle, ‘Jẹje vae dọ dotua nin uwẹ le ebale’? 8 Heye, uwẹ ki taman ọlẹn yọle ‘Ka dọ nyẹn ebale nin mẹn le, uwẹ ha re ukpọn ruẹn dọ mun ebale nin mẹn. Mẹn ha ki le ebale yẹ da anyọn fo, uwẹ kuẹ dọ le ọsi ẹ. 9 Uwẹ ida ha gẹn ọne igbọn nin, ranmhude, emhin nọn khẹke ọle ọle lu. 10 Iriọ yẹ nọn. Ibha ha miẹnsọn rebhe nan mun nin ibha fo, ibha yọle: ‘Igbọn mhan gheghe khin. Ẹsọn nọn khẹke mhan, ọle mhan miẹn.’”

11 Ẹghe nin ọle rẹ ha khian Jerusalẹm, ọle da na bhi eji Sameria bi Galili da mhọn ughu gbera. 12 Ọle ki wo ha nabhi idunmhun ọkpa, ikpea igbe ne khọnmhọn emianmhẹn egbekẹn da miẹn ọlẹn. Ọkpakinọn, ele bha sikẹ ọle. 13 Ele da si urulu okhun ha taman ọlẹn yọle: “Jesu, Ọman-emhin, mhọn itohan da mhan!” 14 Ọle ki daghe ele, ọle da taman ele yọle: “Bha ha khian dọ re egbe ibha man ene ohẹn.” Ele ki ha khian bhi uwedẹ, egbe da daan ele. 15 Ọkpa bhi ẹwẹ ele ki daghe ọle ghe egbe daan ọlẹn, ọle da fikie ha bu Jesu. Ọle da si urulu okhun rẹ ha gẹn Osẹnobulua. 16 Ọle da diguẹ bhi odalo Jesu, yẹ debhẹre nanlẹn. Ọle da ha khuẹnmhẹn ọlẹn. Obhokhan Sameria ọne okpea nan khin. 17 Jesu da ki taman ọlẹn yọle: “Ibha itue igbe a re egbe daan, ọ ibe yi iriọ? Itue isinlin nekẹle ki bho? 18 Gbera ọne okpea nan nọn na bhi agbaẹbho ọbhebhe vae, ọsoso bhi ẹwẹ ele bha fikiere dọ re ogẹn ji Osẹnobulua.” 19 Ọle da ki taman ọlẹn yọle: “Kpanọ mundia. Ha khian, urẹọbhọ nọnsẹ re egbe daan ẹn.”

20 Ibhokhan Farisi ki nọọn Jesu ẹghela Agbejele nọnsi Osẹnobulua rẹ vade, ọle da wanniẹn ele yọle: “Agbejele nọnsi Osẹnobulua ida wo vae bhi uwedẹ nin ẹbho rebhe ha da wo lẹn; 21 la nin ẹbho ha yọle. ‘Ghọle bhi enan!’ la, ‘Ghọle bhi enin!’ Bhi ọsi ẹmhọanta, Agbejele nọnsi Osẹnobulua ribhi ẹwẹ ibha.”

22 Ọle da ki taman edibo nesọle yọle: “Ẹghe vade nin ibha ha rẹ ha guanọ nin bha re ẹlo miẹn ukpẹdẹ ọkpa bhi ene ikpẹdẹ ọsi Ọmọn nọnsi okpea. Ọkpakinọn, bha ida miẹn ọlẹn. 23 Sẹyẹ, ẹbho ki ha taman ibha yọle, ‘Ibha ghọle bhi enan!’ la, ‘Ibha ghọle bhi enin!’ Ibha hẹi yo, ibha hẹi rẹkhan ele. 24 Beji anyan rẹ na bhi obọ ọkpa bhi okhun bhala diọbhi obọ nọnkẹle, iriọ Ọmọn nọnsi okpea ha dia bhi ukpẹdẹ nọnsọle. 25 Ọkpakinọn, ọle dẹ ka loya emhin ne bunbun. Ọne ore nan ki yẹ he ọle. 26 Rẹ gbera ọnin, beji ọ dia bhi ẹghe nọnsi Noa, iriọ ọ da yẹ dia bhi ẹghe ọsi Ọmọn nọnsi okpea: 27 ene ẹbho da ha le, ele da ha da. Ikpea da ha ne amhẹn, ikhuo da ha bọ ọdọ ọkuẹsẹ ukpẹdẹ nin Noa nabhi ẹkẹ okọ. Okpamẹn da rọ, yẹ fuẹn ele rebhe a. 28 Ọ dẹ yẹ diabe ebe sunu bhi ẹghe ọsi Lọt. Ene ẹbho da ha le, ele da ha da, ele da ha dẹ emhin, ele da ha khiẹn emhin, ele da ha kọ emhin, ele da yẹ ha bọn uwa. 29 Ọkpakinọn, bhi ukpẹdẹ nin Lọt sibhi Sodọm re, eranlẹn bi sọfọ* da na okhun rọ kua, yẹ fuẹn ele rebhe a. 30 Iriọ emhin ha yẹ dia bhi ọne ukpẹdẹ nin Ọmọn nọnsi okpea ha zegbere.

31 “Ahamiẹn okhun uwa ọria ye bhi ọne ukpẹdẹ nin, ọle hẹi huẹnre dọ ne emhin nesọle ne ribhi ẹkẹ uwa. Sẹyẹ, ọria nọn ribhi ugbo hẹi fikiere dọ ne emhin nin ọle fi ọbhi uwa. 32 Ye ebe sunu ji amhẹn Lọt re. 33 Ọria nọn hi ki rẹ khin nọn guanọ nọn gbega iẹnlẹn nọnsọle, ọle ki re iẹnlẹn nọnsọle fia. Ọkpakinọn, ọnọn hi ki rẹ khin nọn re iẹnlẹn nọnsọle fia dẹ gbega ọle. 34 Mẹn taman ibha ghe, bhi ọne asọn nin, itue eva dẹ nowẹ bhi ibẹd ọkpa, a ki re ọkpa kpanọ, a ki fi ọnọnkẹle ya. 35 Ikhuo eva dẹ ha nọ emhin bhi uke udo ọkpa, a ki re ọkpa kpanọ, a ki fi ọnọnkẹle ya.” 36* —— 37 Edibo nesọle da ki nọọn ọlẹn yọle: “Ejela Ebeanlẹn mhan?” Ọle da taman ele yọle: “Bhi eji emhin nọn yulu ye, enin ene oghohọn* ha da sikoko.”