Luk

19 Ọle da ki sẹbhi Jẹriko, yẹ ha gbera. 2 Okpea ọkpa natiọle Zakiọs da ha ribhi enin. Ọdiọn ene koko igho uhọnmhọn ọle khin. Ọle wo manman fe. 3 Ọle da ha guanọ nin ọle daghe Jesu. Ọkpakinọn, ranmhude ọle bha tan, bi ranmhude ẹbho ne vẹ rẹkhan Jesu, ọle bha sabọ daghe ọle. 4 Bhiriọ, ọle da runẹ kalo dọ hẹn eran sikamọn, beji ọle ha da sabọ daghe ọle, ranmhude Jesu dẹ rẹkhan obọ nin. 5 Jesu ki sẹbhi eji ọle ye, ọle da khua ẹlo okhun yẹ taman ọlẹn yọle: “Zakiọs, jẹje huẹnre, ranmhude, isuwẹ imẹn ha dia ẹlẹnan.” 6 Bhiriọ, ọle da jẹje huẹnre, yẹ wo re eghọnghọn miẹn ọlẹn ọbhi egbe bhi uwa nọnsọle. 7 Ene ẹbho ki daghe ọnan, ele rebhe da ha guinẹzọ yọle: “Ọle dọ debhi uwa ọsi ọria olukhọ a.” 8 Ọkpakinọn, Zakiọs da kpanọ mundia yẹ taman Jesu yọle: “Ebeanlẹn imẹn, Ghọle! Imẹn dẹ wa emhin nesẹmhẹn yi eva, yẹ ne obọ ọkpa nin ene ibhioguele. Sẹyẹ, emhin nọn hi ki rẹ khin nin imẹn re eku miẹn ẹbho le, imẹn de ne fikie ji ele igba enẹn.” 9 Bhiriọ, Jesu da taman ọlẹn yọle: “Ẹlẹnan, umiẹnfan nabhi ọne uwa nan, ranmhude, ọmọn nọnsi Ebraham uwẹ yẹ khin. 10 Ene yulua, ele Ọmọn nọnsi okpea vae dọ guanọ, yẹ miẹn fan.”

11 Beji ele rẹ ha kaehọ ọne ẹmhọn nan, Jesu da gbo noo arẹkhọkhọ ọbhebhe. Ọle da lu ọnan ranmhude ọle sikẹ Jerusalẹm. Sẹyẹ, edibo nesọle da ha riale ghe, ele ha wo sẹbhi enin, Agbejele nọnsi Osẹnobulua dẹ wo re osukpa vae. 12 Ọle da ki yọle: “Okpea ọkpa nọn yi ọmọn nọnsi ojie da ha khian agbaẹbho nọn manman ree, nin ọle dọ le ejele. Ọle ha ki lu fo, ọle ki fikiere. 13 Ọkuẹsẹ ọle kpanọ, ọle da datie itue igbe bhi igbọn nesọle, yẹ ne maina* igbe nin ele. Ọle da taman ele yọle, ‘Ibha re ọle do ẹki ọkuẹsẹ imẹn vare.’ 14 Ọkpakinọn, ẹbho nesọle bha hoẹmhọn ọlẹn. Bhiriọ, ele da je ẹbho ha khian ọne agbaẹbho ne dọ yọle, ‘Imhan bha guanọ nin ọne okpea nan ha yi ojie nọnsẹmhan.’

15 “Ọle ki le ọne ejele fo yẹ fikiere, ọle da tatie ene igbọn nin ọle ne igho nan, nin ọle nọọn ele ebi ele rẹ re ọne igho do ẹki yẹ. 16 Bhiriọ, ọne ọhẹnhẹn da vae, yẹ yọle, ‘Ebeanlẹn imẹn, mẹn re maina nọnsẹ rẹ khuan maina igbe.’ 17 Ọle da yọle, ‘Uwẹ lu nọnsẹn, igbọn nọn mhẹn! Ranmhude, bhi obhi emhin khere, uwẹ da rẹman ghe, ọria nan ha sabọ gbaẹkẹ ọle uwẹ khin. Ha gbẹloghe agbaẹbho igbe.’ 18 Ọne ọzeva da vae, yẹ yọle, ‘Ebeanlẹn imẹn, mẹn re maina nọnsẹ rẹ khuan maina isẹn.’ 19 Ọle da yẹ taman ọnan yọle, ‘Ha gbẹloghe agbaẹbho isẹn.’ 20 Ọbhebhe da yẹ vae. Ọle da yọle, ‘Ebeanlẹn imẹn, miẹn maina nọnsẹ nin imẹn re ukpọn gbanọ mun ya. 21 Uwẹ lẹn ebela? Ofẹn uwẹ wo manman ha mun mẹn, ranmhude ọria nọn manman to uwẹ khin. Eji uwẹ bha da re ya, ọle uwẹ ho nin uwẹ da ha re. Sẹyẹ, ebi uwẹ bha kọ, ọle uwẹ ho nin uwẹ ha rọ.’ 22 Ebeanlẹn ọlẹn da ki taman ọlẹn yọle, ‘Uwẹ bhuohiẹn gbe egbe uwẹ fo, igbọn nọn imhẹn. Beji a miẹn ghe ọria nọn manman to imẹn khin, ghe eji imẹn bha da re ya ọle imẹn ho nin imẹn da ha re, sẹyẹ, ebi imẹn bha kọ imẹn ho nin imẹn ha rọ, 23 be ki zẹ nin uwẹ bha da mun igho nọnsẹmhẹn ya bhi aza, beji a ha da miẹn ghe, imẹn ha ki vae, imẹn ki miẹn asun bhọ?’

24 “Ọle da ki taman ene mundia bhi enin yọle, ‘Ibha miẹn ọlẹn ọne maina, ibha ha re nin ọnọn mhọn maina igbe.’ 25 Ele da ki taman ọlẹn yọle, ‘Ebeanlẹn imhan, ọle ka mhọn maina igbe!’ 26 ‘Imẹn taman bha ghe, ọria nọn hi ki rẹ khin nọn mhọnlẹn, a dẹ re ba ọle le. Ọkpakinọn, ọnọn imhọnlẹn, a ki miẹn ọlẹn ebi ọle bhọ rẹ ha mhọnlẹn. 27 Rẹ deba ọnin, bha muno ene eghian imẹn re ne bha guanọ nin imẹn ha yi ojie nọnsele, ibha ha gbono ele a bhi isira imẹn.’”

28 Ọle ki ta ene ẹmhọn nan fo, ọle da sẹyẹ ha khian Jerusalẹm. 29 Ọle ki sikẹ Bẹtfeji bi Bẹtani bhi isi Oke ọsi Oliv, ọle da je eva bhi edibo nesọle uhọnmhọn. 30 Ọle da taman ele yọle: “Ibha ha khian ọne idunmhun nin nọn ribhi odalo ibha. Bha ha nabhọ, bha dẹ daghe obhi kẹtẹkẹtẹ* nan mun diẹn. Ọria soso bha sẹ ka dotua bhọ khẹ. Ibha taan ọlẹn sibhi uri re, ibha ha mun ọlẹn re bhi enan. 31 Ọria soso ha nọọn ibha ebezẹle nin bha da ha taan ọlẹn sibhi uri re, ibha taman ọlẹn yọle, ‘Ebeanlẹn imhan yọle nin mhan mun re.’” 32 Bhiriọ, ene ọle jele da ha khian. Ele da ka ọne obhi kẹtẹkẹtẹ* re beji ọle rẹ taman ele. 33 Ọkpakinọn, ẹghe nin ele rẹ ha taan ọlẹn sibhi uri re, ene nyan ọlẹn da nọọn ele yọle: “Bezẹle nin bha da ha taan ọne obhi kẹtẹkẹtẹ* sibhi uri re?” 34 Ele da yọle: “Ebeanlẹn imhan yọle nin imhan mun re.” 35 Ele da ki mun ọlẹn ji Jesu, yẹ waa ukpọn nọnsele ọbhi uke ọle. Jesu da dotua bhọ.

36 Beji ọle rẹ ha khian, ele da ha wa ukpọn nọnsele ọbhi uwedẹ. 37 Ọle ki sikẹ eji ukhuo da kpono fia bhi Oke ọsi Oliv, edibo nesọle rebhe da munhẹn ha dujie, yẹ re ogẹn ji Osẹnobulua, ranmhude ene emhin ọhan-ilo rebhe nin ele re ẹlo nọnsele miẹn. 38 Ele da ha yọle: “Erọnmhọn hi ọsi ọne ojie nọn re elin nọnsi Jehova* vae! Mhan bhii nin ọfure ha ribhi ẹwẹ eria bi Osẹnobulua, bi nin uyi ha yi ọsi Osẹnobulua nọn ribhi okhun!” 39 Ọkpakinọn, ibhokhan Farisi ne ha ribhi ẹwẹ ene usun ẹbho da taman ọlẹn yọle: “Ọman-emhin, taman edibo nesẹ ne gue unun.” 40 Ọle da ki wanniẹn ele yọle: “Imẹn taman ibha ghe, ahamiẹn ele gue unun, ene udo nan dẹ talọ dagbare.”

41 Ọle ki sikẹ Jerusalẹm, ọle da ghe ọne agbaẹbho nẹga yẹ gbe eviẹ a. 42 Ọle da yọle: “Eo, ọ ha rẹ mhẹn gbe sade ibha sabọ lẹn ene emhin ne ha rẹ ibha ha mhọn ọfure ukpẹdẹ nin ẹlẹnan. Ọkpakinọn, bha ida sabọ daghe ene emhin nan. 43 Ọne ẹghe vade nin eghian ibha ha rẹ re oran nan kanọ ọle ukpẹ rẹ gbe ogba nẹga bha yẹ khue bha ze. 44 Ele ki fuẹn ibha bi imọn nesẹbha a sẹsẹsẹ. Sẹyẹ, ele ki dunmhun agbaẹbho nọnsẹbha sotọ, ranmhude, ibha bha sabọ lẹn ọne ẹghe nan rẹ dọ fẹ ibha ghe.”

45 Ọle da ki nabhi uwa oga, yẹ munhẹn ha khuno ene khiẹn emhin dagbare. 46 Ọle da ha taman ele yọle: “A gbẹn ọlẹn ọbhi otọ ghe, ‘Uwa nọnsẹmhẹn dẹ ha yi eji a da nan erọnmhọn.’ Ọkpakinọn, ibha re ọle kiẹn uwa oyi.”

47 Ẹdẹ-ẹdẹ ọle rẹ ha man emhin bhi uwa oga. Ọkpakinọn, ene ohẹn ne khua, ene man uhi bi ene ẹbho nan manman lẹn bhi ẹwẹ ene ẹbho da ha guanọ nin ele gbe ọle a. 48 Sokpan, ele bha miẹn isẹhoa rẹ lu ọnan, ranmhude, ẹbho ne bunbun da ha ribhi eji ọle ye ne ha ka ọle ehọ.