Luk
20 Ẹdẹ ọkpa beji ọle ha man ẹbho emhin bhi uwa oga, yẹ ta ọne ọta nọn mhẹn man ele, ene ohẹn ne khua, ene man uhi bi ene ewanlẹn da vae. 2 Ele da nọọn ọlẹn yọle: “Taman mhan eji uwẹ da miẹn ahu nin uwẹ rẹ lu ene emhin nan. Họla re ọne ahu nin uwẹ?” 3 Ọle da taman ele yọle: “Imẹn dẹ yẹ nọọn ibha ọta. Bha wanniẹn ọlẹn. 4 Họla je Jọni nọn ha re amẹn nin ẹbho? Osẹnobulua be nọn, la eria?” 5 Ele da ki ha ne egbe ele zilo yọle: “Mhan ha yọle ‘Osẹnobulua,’ ọle ki nọọn mhan, ‘Be ki zẹ nin ibha bha da rẹọ ọle bhọ?’ 6 Ọkpakinọn, imhan ha yọle, ‘eria nọn,’ ene ẹbho nan ki re udo-udo gbe imhan, ranmhude, ele rẹọbhọ ghe akhasẹ Jọni khin.” 7 Bhiriọ, ele da yọle ele bha lẹn ọnọn je ọle. 8 Jesu da ki taman ele yọle: “Bhiriọ, imẹn ida taman ibha ọnọn re ahu nin imẹn rẹ ha lu ene emhin nan.”
9 Ọle da taman ene ẹbho arẹkhọkhọ ọkpa. Ọle da yọle: “Okpea ọkpa da mun ugbo ivain, yẹ mun nin ẹbho ha gbẹloghe ọle. Ọle da kpanọ ha khian ẹbho, yẹ manman bue bhi enin. 10 Ẹghe nan rẹ rọ emhin ugbo ki sẹ, ọle da je igbọn nọnsọle bu ene gbẹloghe ọne ugbo nin ele ne emhin ugbo nanlẹn. Ọkpakinọn, ele da gbe ọne igbọn, yẹ re obọ-obọ je ọle kpanọ. 11 Ọle da gbo je igbọn ọbhebhe bu ele. Ele da gbe ọle, re obọ oya mun ọlẹn,* yẹ re obọ khọnkhan je ọle kpanọ. 12 Ọle da gbo kie je igbọn ọbhebhe bu ele. Ele da kuan ọlẹn, yẹ khu ọle fia. 13 Bhiriọ, ọne okpea nọn nyan ọne ugbo da yọle, ‘Be imẹn ha lu yẹ nian? Imẹn dẹ je ọmọn nọnsẹmhẹn nin imẹn hoẹmhọnlẹn bu ele. Iriọ a ha da miẹn ele dẹ mun ekpẹn nanlẹn.’ 14 Ene gbẹloghe ọne ugbo ki daghe ọne ọmọn, ele da ha tale bhi ẹwẹ ele yọle, ‘Ọnan hi ọne ọmọn nọn ha le uku nọnsọle. Bha ji mhan gbe ọle a, beji mhan ha da re ọne uku kiẹn ọsẹmhan.’ 15 Bhiriọ, ele da sua ọle dagbare bhi ẹkẹ ọne ugbo yẹ gbe ọle a. Be ọnọn nyan ọne ugbo ha ki khian ele yẹ? 16 Ọle ki vae dọ gbono ele a, yẹ mun ọne ugbo nin eria ọbhebhe ha gbẹloghe.”
Ene ẹbho ki họn ọnan, ele da yọle: “Awaa!” 17 Ọle da ghe ele, yẹ nọọn ele yọle: “Be a ki re ọne ọta nan, nan gbẹn ọbhi Ebenọnkhiale ta: ‘Ọne udo nin ene bọn uwa hele, ọle ki kiẹn udo kpataki nọn mun ọne uwa mhọnlen’?* 18 Ọria nọn hi ki rẹ khin nọn degbe ọne udo nan dẹ zanzan an. Sẹyẹ, ọria nọn hi ki rẹ khin nin ọne udo nan degbe, ọne udo ki lẹnkhẹn ọlẹn an.”
19 Bhi ọne ẹghe nan, ene man uhi bi ene ohẹn ne khua da ha guanọ nin ele mun ọlẹn, ranmhude, ele lẹnmhin ghe, ele zẹle nin ọle da noo ọne arẹkhọkhọ nan. Ọkpakinọn, ofẹn ene ẹbho da ha mun ele. 20 Ele ki zẹ baba ọle, ele da re igho nin ikpea eso, yẹ je ele bu ọle, nin ele man dọ lu bii eria ne khiale, yẹ re ọta mun ọlẹn. Bhiriọ, ele ki sabọ yọle ghe, ọle gbobọrauhi ọsi ene gbẹloghe, yẹ mun ọlẹn nin ele. 21 Ene ikpea da bu ọle re, yẹ taman ọlẹn yọle: “Ọman-emhin, mhan lẹnlẹn ghe uwẹ wo ta ẹmhọanta, sẹyẹ, emhin nin uwẹ man wo gba. Uwẹ izẹ ibo. Uwedẹ ẹmhọanta uwẹ wo rẹ man ẹmhọn nọnsi Osẹnobulua: 22 Ọ be khẹke nin mhan ha ha igho uhọnmhọn ji Siza?” 23 Ọkpakinọn, ọle da daghe ọle ghe, eria eku ele khin. Bhiriọ, ọle da taman ele yọle: 24 “Bha re dinariọs* man imẹn. Elin bi amanzẹ ọsi ọria nela ribhọ?” Ele da yọle: “Ọsi Siza.” 25 Ọle da taman ele yọle: “Beji a miẹn iriọ nọn, bha ne emhin nesi Siza nin Siza, ibha ha ne emhin nesi Osẹnobulua nin Osẹnobulua.” 26 Ele bha sabọ re ọta mun ọlẹn. Uwedẹ nin ọle rẹ wanniẹn ọne inọnta da wo han ele ilo. Bhiriọ, ele bha yẹ talọ.
27 Ọkpakinọn, eso bhi ene ibhokhan Sadusi ne yọle ghe ariọkpanọ bhi uu iribhọ, da bu ọle rẹ dọ nọọn ọlẹn yọle: 28 “Ọman-emhin, Mozis gbẹn ọlẹn ọbhi otọ yọle, ‘Ahamiẹn ghe okpea yu fi okhuo ọle ya, nin ọle ida mhọn ọmọn, obhio ọle ki re ọne okhuo, yẹ nẹkẹ ọmọn nanlẹn.’ 29 Ikpea ihinlọn da ha ribhọ ne yi ibhio. Ọne ọhẹnhẹn da re okhuo, ọkpakinọn, ọle da yu, ọle bha ha mhọn ọmọn. 30 Ọne ọzeva 31 bi ọne ọzea da yẹ re ọle bhi amhẹn. Iriọ ene ikpea ihinlọn rẹ re ọle bhi amhẹn; ele rebhe da yuno, ele bha biẹ ọmọn soso. 32 Bhi ọkike ọle, ọne okhuo da yẹ yu. 33 Bhi ẹghe nin ene yu ha rẹ riọkpanọ, họla ki da ha yi ọdọ ọle, beji a miẹn ghe, ene ikpea ihinlọn ka re ọle bhi amhẹn?”
34 Jesu ki da taman ele yọle: “Ẹbho ne nyẹnlẹn bhi ọne agbọn* nan, ele bọ ọdọ yẹ re okhuo. 35 Bhi obọ nọnkẹle, ẹbho ne sẹ ene ha nyẹnlẹn bhi ọne agbọn nin, nan ha yẹ riọkpanọ bhi uu ida bọ ọdọ la re okhuo. 36 Bhi ọsi ẹmhọanta, ele bhọ iyẹ da sabọ yu, ranmhude, ele dẹ diabe ene ẹhi. Sẹyẹ, ranmhude a dẹ riọ ele kpanọ bhi uu, imọn nesi Osẹnobulua ele da ha khin. 37 Ebi Mozis gbẹn rẹji ẹghe nin ọle rẹ miẹn ẹwẹ igbẹn nọn ha to, bhọ rẹman ghe, ene yulu dẹ riọkpanọ. Ọle da tie Jehova,* ‘Osẹnobulua ọsi Ebraham, Osẹnobulua ọsi Aiziki, bi Osẹnobulua ọsi Jekọp.’ 38 Osẹnobulua ọsi ene nyẹnlẹn ọle khin, ọ iyi ọsi ene yu. Ranmhude, bhi ẹlo nọnsọle, ele rebhe sẹyẹ nyẹnlẹn.” 39 Eso bhi ene ikpea ne man uhi da taman ọlẹn yọle: “Ọman-emhin, uwẹ wo talọ nọnsẹn.” 40 Ele bha yẹ gbudu nọọn ọlẹn ọta soso.
41 Ọle ki da nọọn ele yọle: “Bezẹle nan da tie Kristi ọmọn nọnsi Devid? 42 Devid tobọle bhọ tale bhi ebe illo ogẹn yọle, ‘Jehova* da taman ebeanlẹn imẹn yọle: “Dotua bhi obọ obera nọnsẹmhẹn 43 rẹ sẹbhi ẹghe nin imẹn ha rẹ ne eghian nesẹ ọbhi otọ oẹ nọnsẹ.”’ 44 Beji a miẹn Devid tie ọle Ebeanlẹn ọlẹn, be ọle ki rẹ yi ọmọn nọnsọle yẹ?”
45 Beji ene ẹbho sẹyẹ ha kaehọ, ọle da taman edibo nesọle yọle: 46 “Bha mhọn ẹwanlẹn bhi egbe ene man uhi. Ele ki wo muno ọgulọgu* yọ ha khian nẹga, yẹ ha guanọ nin ẹbho ha tuẹ ele bhi eji a da do ẹki. Aga ne ribhi odalo* bhi sinagọg bi aga ne mhẹn nẹ bhi eji a da le ebale emuan, ọle yẹẹ ele da dotua. 47 Ele gbe ikhuo nin ọdọ ele yu miẹn ele emhin. Ele yẹ nan erọnmhọn bue beji ẹbho ha da daghe ele. Ibhuohiẹn nin ele ha miẹn dẹ kaka gbe.”