Hibru

10 Arẹkhọkhọ ọsi emhin esili ne vade bhi ẹghe odalo, ọle ọne Uhi khin, ọ iyi ene emhin esili tobele. Bhiriọ, izọese nan wo ha lu ukpe-ukpe ida sabọ re eria ne ga Osẹnobulua kiẹn eria ne gbale. 2 Sade ọne izọese sabọ re ele kiẹn eria ne gbale nọn, a iyẹ rẹ ha zọese. Ẹbho ne ga Osẹnobulua nan re ene izọese rẹ kpe khia ha rẹ wo kiẹn eria ne khiale. Ele iyẹ da ha ghe egbe ele bii eria olukhọ. 3 Sokpan ọ bha ha yi iriọ. Ene izọese nan bhọ da re ele ha yere ukpe-ukpe ghe, eria olukhọ ele khin, 4 ranmhude, aranlẹn ọsi ẹbhe bi ọsi ẹmena ida sabọ re olukhọ kie.

5 Ẹghe nin Jesu rẹ vae bhi ọne agbọn nan, ọle da taman Osẹnobulua yọle: “‘Uwẹ iyẹ guanọ izọese ọsi elanmhẹn bi emhin nekẹle nan rẹ ze ji uwẹ. Uwẹ da re egbe nin imẹn. 6 Izọese nan tuẹ a bi izọese nan ze ọbhi olukhọ bha yẹ ha ti uwẹ bhọ.’ 7 Ọle da yẹ yọle: ‘Osẹnobulua mẹn, ghọle! Mẹn vae nin mẹn dọ lu iho nọnsẹ beji a rẹ tẹmhọn mẹn bhi Ebenọnkhiale.’” 8 Ọle da ka tẹmhọn izọese nan ha lu bhi odotọ Uhi, ẹghe nin ọle rẹ yọle: “Uwẹ iyẹ guanọ izọese ọsi elanmhẹn bi emhin nekẹle nan rẹ ze ji uwẹ, sẹyẹ, izọese nan tuẹ a bi izọese nan ze ọbhi olukhọ bha yẹ ha ti uwẹ bhọ.” 9 Ọle ki ta ọnin fo, ọle da yọle: “Ghọle! Mẹn vae nin mẹn dọ lu iho nọnsẹ.” Ọle da re ọkpẹnlẹn ọbhi emhanmhan nin ọhẹnhẹn, beji ọle ha da mun ọne ọzeva gbọ. 10 Ranmhude ọne “iho” nan nọnsi Osẹnobulua, a da kpe mhan khia rẹ na obọ izọese nin Jesu Kristi re egbe nọnsọle lu osukpa ọkpa.

11 Sẹyẹ, ukpẹde-ukpẹdẹ, ọle ene ohẹn rẹ lu iwẹnna oga, yẹ re emhin zọese. Ene izọese nan bhọ isabọ re olukhọ si ọria bhi egbe re sẹsẹsẹ. 12 Bhi obọ nọnkẹle, osukpa ọkpa Kristi zọese ọbhi olukhọ nọnsẹmhan. Ọle da dọ dotua ọbhi obera nọnsi Osẹnobulua. 13 Ọle khẹ ẹghe nin Osẹnobulua ha rẹ ne eghian nesọle bhi odotọ oẹ nọnsọle. 14 Izọese ọkpa nin ọle lu, ọle ọle rẹ re ẹbho nesi Osẹnobulua kiẹn eria ne gba fo rẹ sẹbhi ighegheghe. 15 Rẹ deba ọnin, ẹlinmhin nọn khiale da yẹ sọsali ọbhọ man mhan. Ọ da ka yọle: 16 “Inian Jehova* tale, ‘Ọne ẹghe nin ha gbera, mẹn dẹ deba ele ve ọne akovẹn nan. Mẹn dẹ ne uhi nọnsẹmhẹn ele bhi otọ ẹkẹ, yẹ gbẹn ọlẹn ele bhi ọkhọle.’” 17 Ọle da yẹ yọle: “Mẹn iyẹ da ye olukhọ nọnsele bi emhin ebe nin ele lu re.” 18 Beji a ki miẹn ghe, Osẹnobulua rẹhunmhan olukhọ fo, ọ bha yẹ khẹke nan ha zọese bhi olukhọ.

19 Ibhio, ranmhude aranlẹn nọnsi Jesu, mhan mhọn ọne izebhudu nin mhan rẹ nabhi eje khiale. 20 Ọne uwedẹ nan hi uwedẹ ọsọgbọn nin iẹnlẹn ye, nin ọle re efun nọnsọle tuje a nin mhan. Efun nọnsọle hi ọne ikọtin.* 21 Sẹyẹ, mhan mhọn ohẹn nọn khua nọn gbẹloghe uwa nọnsi Osẹnobulua. 22 Bhiriọ, bha ji mhan re ọkhọle rebhe bi urẹọbhọ nọn gbale rẹ bu Osẹnobulua re, beji a miẹn a kpe ọkhọle nọnsẹmhan khia bhi emhin ebe, yẹ re amẹn nọn khia rẹ kpe egbe nọnsẹmhan khia. 23 Bha ji mhan wo situa ha wewe iruduba nọnsẹmhan. Bha hẹi beghe, ranmhude, Osẹ nọn ve ene ive nan ihiẹ ọria. 24 Bha ji mhan ha ria ẹmhọn egbe, beji mhan ha da re ibo mhan ha mhọn oyẹẹ, yẹ re ele ha lu emhin ne mhẹn. 25 Bha hẹi ha gbẹdẹ ikolo oga beji ẹbho eso wo lu. Bha ha re izebhudu nin egbe, manman nọn beji bha ha rẹ ha daghe ọle ghe ọne ukpẹdẹ nin sire.

26 Beji a miẹn ghe mhan ki dọ lẹn ẹmhọanta, izọese ọbhebhe iyẹ ribhọ nan ha ze nin mhan sade mhan sẹyẹ taan ẹlo a bhi uhọnmhọn ha lu olukhọ. 27 Ibhuohiẹn nọnsi Osẹnobulua mhan ha ki ha hian ukpudu khẹ. Mhan ki ha khẹ ohu nọnsọle, nọn nyọn bii eranlẹn, nin ọle ha rẹ fuẹn ene nanlẹn ha suan an. 28 Itue eva la itue ea ha sọsali ọbhọ ghe ọria gbobọra uhi ọsi Mozis, a ki gbọle a, a itohan ọlẹn hiehie. 29 Eka-eka ki ọria nọn re ẹlo gbe Ọmọn nọnsi Osẹnobulua a? Oya nin ọria nọn sẹ inian ha miẹn bhi egbe dẹ khọ gbe, ranmhude, ọle bha ghe aranlẹn ọsi akovẹn nan rẹ kpe ọle khia bii emhin soso. Sẹyẹ, ọle zanọ ẹlinmhin nọnsi Osẹnobulua a, nin ọle rẹ mhọn ifuẹkẹ nọn khua da mhan. 30 Mhan lẹn Osẹnobulua hi ọnọn yọle: “Imẹn hi ọnọn ha sọikhi. Imẹn hi ọnọn ha re ihaosa nin ele.” Ebenọnkhiale da yẹ yọle: “Jehova* dẹ bhuohiẹn ẹbho nesọle.” 31 Emhin nọn re ofẹn mun nọn, nin ọria rẹ de ọbhi obọ nọnsi Osẹnobulua nọn nyẹnlẹn.

32 Bha wo ha ye ẹghe nọn gbera re—ọne ẹghe nin bha rẹ ziẹngbe ekpokpo ne bunbun, beji a man bha ẹmhọanta fo.* 33 Ẹghe eso, a da gbe ibha bhi ughe, zuọzuọ ibha yẹ ha kpokpo ibha. Bhi ẹghe nekẹle, ọbalọ ọsi ibhio bha ne ha miẹn emhin ne sẹ inian bhi egbe, da wo ha rẹso ibha. 34 Bha da wo ji ẹmhọn ibhio bha ne ribhi ighan rẹtẹ bha. Sẹyẹ, arẹmiẹn a gbe ibha miẹn ibha emhin nesẹbha, bha da yẹ wo ha ghọnghọn, ranmhude, ibha lẹnmhin ghe, emhin esili ne ha tọ sẹbhi ighegheghe khẹ bha bhi odalo.

35 Bhiriọ, bha sẹyẹ wo ha re izebhudu man, ranmhude, elele nọn khua dẹ nabhọre. 36 Ọkhẹke nin bha ha mhọn iziẹngbe, beji ive nọnsi Osẹnobulua ha da sẹ ibha obọ sade bha lu iho nọnsọle sotọ. 37 “Obhi ẹghe khere ki kẹre nin ọnọn vade ha rẹ vae. Ọle ida riia ẹghe a.” 38 “Ọkpakinọn, ọguọmhandia nọnsẹmhẹn dẹ miuhọnmhọn, ranmhude urẹọbhọ nin ọle rẹman.” “Ọle ha siegbe re ikeke, ẹmhọn ọlẹn ida yẹ ha ti mẹn bhọ.” 39 Mhan iyi unan eria ne siegbe re ikeke, ne ha miẹn ugbekhuelo. Ẹbho ne mhọn urẹọbhọ mhan khin. Ọne urẹọbhọ nan dẹ re imhan miẹn iẹnlẹn.