Kọrint Nin Ọhẹnhẹn
5 A taman imẹn ghe, ọria bhi ẹwẹ bha gboghẹ.* Ọle da dọ ha ne okhuo aba ọle nowẹ. Ẹbho ne iga Osẹnobulua bhọ ilu emhin ebe nọn khọ sẹ inian. 2 Ọnan be rẹ bha ghọnghọn? Ọ rẹ khẹke nin ọnan re ẹkhọle ha lo bha. Ọ rẹ khẹke nin bha khu okpea nọn lu emhin nọn sẹ inian sibhi ẹwẹ bha re. 3 Arẹmiẹn imẹn iribhi eji bha ye, ọkhọ mẹn ribhi eji bha ye. Mẹn bhuohiẹn gbe okpea nọn lu ọne emhin nan fo, bọsi ghe mẹn ribhi eji bha ye. 4 Ẹghe nin bha ha rẹ sikoko bhi elin ọsi Jesu nin Ebeanlẹn mhan, bha lẹn sẹbhọ ghe mẹn ribhi ẹwẹ bha, sẹyẹ ahu ọsi Jesu nin Ebeanlẹn mhan ne bha. 5 Bhiriọ, bha ki mun okpea nọn sẹ iriọ nin Esu, nin bha rẹ re emhin ebe nọn sẹ iriọ sibhi agbotu re. Beji a ha da miẹn ghe, ọne agbotu ki re ẹlo nọn khẹke ha ghe olukhọ, rẹ dọ sẹbhi ukpẹdẹ ọsi Ebeanlẹn mhan.
6 Ọnan iyi emhin nin bha ha rẹ ha hio. La, ibha bha be lẹn ghe, obhi yisti khere, ọle re ibrẹd huẹ? 7 Bhiriọ, bha mun ọne ibrẹd nin yisti ye fia, beji bha ha da ha yi ọsọgbọn, ibrẹd nan bha re yisti ọi. Ranmhude, a re Kristi nọn yi ohuan ọsi Anagbera rẹ zọese fo. 8 Bhiriọ, bha ji mhan noo ibrẹd ọsi ẹkẹata bi ẹmhọanta rẹ lu ọne iluemhin, ọ iyi ibrẹd nọn ki dọmanlẹn nan re yisti ọi, la yisti ọsi emhin ebe bi olukhọ.
9 Bhi ebe nin mẹn gbẹn ji bha, mẹn da taman ibha ghe, nin bha hẹi yẹ ne eria ne gboghẹ* ha muobọ. 10 Ọ iyi ẹbho ne ribhi ọne agbọn nan ne gboghẹ,* ne mhọn ẹlobhiamhin, ne gbe ẹbho miẹn ele emhin, la ne ga ẹbọ imẹn ha tẹmhọnlẹn. Ahamiẹn ele mẹn tẹmhọnlẹn, ọnin ki rẹman ghe, bha dẹ sibhi ọne agbọn re. 11 Ebi mẹn gbẹn ji bha nian, ọle hi ghe, nin bha hẹi yẹ deba ọria nọn tie egbe ọle obhio mhan ha muobọ, sade ọle gboghẹ,* ọle mhọn ẹlobhiamhin, ọle ga ẹbọ, ọle re unun riia ẹbho a, ọle da anyọn gbe egbe, la ọle gbe ẹbho miẹn ele emhin. Bha bhọ hẹi deba ọria nọn sẹ iriọ le ebale. 12 Ọ iyi ẹsọn nọnsẹmhẹn nin mẹn rẹ ha bhuohiẹn ẹbho ne ribhi ẹkẹ agbọn. Bha ha bhuohiẹn ẹbho ne ribhi ẹkẹ agbotu, 13 bha ha ji Osẹnobulua da bhuohiẹn ẹbho ne ribhi ẹkẹ agbọn. “Bha khu ọria ebe sibhi ẹwẹ bha re.”