Matiu

12 Ẹghe ọkpa, Jesu bi edibo nesọle da ha na bhi ẹkẹ ugbo gbera bhi ukpẹdẹ Sabati. Ohanmhẹn da ha gbe edibo nesọle. Bhiriọ, ele da re obọ kọnnọn bhi emhin nan kọle yẹ ha le ọle. 2 Ibhokhan Farisi ki daghe ọnan, ele da taman ọlẹn yọle: “Sẹ ghe! Edibo nesẹ lu emhin nọn bha khẹke nan lu bhi ẹdẹ Sabati.” 3 Ọle da ki taman ele yọle: “Ibha bha be sẹ ka tie ebi Devid lu ẹghe nin ohanmhẹn rẹ ha gbe ọle bi ikpea ne rẹkhan ọlẹn? 4 Ọle da nabhi uwa oga nọnsi Osẹnobulua yẹ dọ ne ibrẹd nan rẹ zọese. Ọle bi ikpea ne rẹkhan ọlẹn da le ọle. Ọ bha rẹ khẹke nin ọle la eria ne rẹkhan ọlẹn le ọle, ene ohẹn ọkpa ọkhẹke ne le ọle. 5 La, ibha bha be yẹ tie bhi ebe Uhi ghe, arẹmiẹn ene ohẹn ne ribhi uwa oga miẹnsọn bhi ukpẹdẹ Sabati, uhi imun ele. 6 Sokpan, imẹn taman ibha ghe, ebe gbera uwa oga ribhi enan. 7 Ọkpakinọn, sade ibha lẹn ebi a re ọle ta ẹghe nan rẹ yọle, ‘Itohan imẹn guanọ nin ibha ha rẹman, ọ iyi nin ibha ha zọese ji imẹn,’ ibha hẹi rẹ bhuohiẹn gbe ene bha lu emhin soso. 8 Ọmọn nọnsi okpea, ọle hi Ebeanlẹn ọsi Sabati.”

9 Ọle ki sibhi enin re, ọle da ha khian sinagọg nọnsele. 10 Ghọle! okpea ọkpa nin obọ nọnsọle nẹghẹ a da ha ribhi enin. Ranmhude ikpea eso guanọ nin ele re uhi mun ọlẹn, ele da nọọn ọlẹn yọle, “Ọ be khẹke nan re egbe daan ọria bhi ukpẹdẹ Sabati?” 11 Ọle da taman ele yọle: “Ahamiẹn ọria bhi ẹwẹ bha mhọn ohuan ọkpa, nin ọne ohuan da de ọbhi uhio bhi ukpẹdẹ Sabati, ọle ida be dọ mun ọne ohuan sibhọre? 12 Bhi ọsi ẹmhọanta, ọria ghan nẹ ohuan, bhiriọ, ọria ha lu emhin esili bhi ukpẹdẹ Sabati, ọ bha gbobọrauhi.” 13 Ọle ki da taman ọne okpea yọle: “Niẹn obọ nọnsẹ a.” Ọne okpea ki niẹn ọlẹn an, ọne obọ bha yẹ nẹghẹ a, ọ da mhẹn an bii obọ nọnkẹle. 14 Ọkpakinọn, ibhokhan Farisi da dagbare dọ ha mhanmhan ebi ele ha rẹ gbe ọle a yẹ. 15 Jesu ki lẹn ọnan, ọle da sibhi enin re. Ẹbho ne bunbun da yẹ rẹkhan ọlẹn. Ọle da re egbe daan ele rebhe. 16 Sokpan, ọle da manman gbuhi nin ele, nin ele hẹi dọ taman ẹbho ẹmhọn ọlẹn. 17 Beji ọle ha da mun ọta nin Ẹzaya nin akhasẹ tale sẹ, nọn yọle:

18 “Ghọle! imẹn dẹ re ẹlinmhin nọnsẹmhẹn nin ọguọmhandia nọnsẹmhẹn nin mẹn zẹle, ọne imẹn hoẹmhọn ọlẹn, yẹ miẹn ọbhi egbe. Ọle dẹ rẹman ene agbaẹbho ebi a re ibhuohiẹn nọn gbale ta. 19 Ọle ida ha van la so dagbare, ọria soso ida họn urulu nọnsọle bhi ughe. 20 Ukpilunmhun nọn khuẹn ghẹghẹ, ọle ida nunu ọle a. Sẹyẹ, ukpa nọn khian wẹ a, ọle ida wo fun ọlẹn an, rẹ sẹbhi ẹghe nin ọle ha rẹ dọ bhuohiẹn nọn gbale. 21 Bhi ọsi ẹmhọanta, ene agbaẹbho dẹ ha mhọn iruduba, ranmhude elin nọnsọle.”

22 Ẹbho da mun okpea ọkpa nin ẹlinmhin-ebe kpokpo bu Jesu re. Ọne okpea idaghe, sẹyẹ, ọle isabọ talọ. Ọle da re egbe daan ọlẹn. Bhiriọ, ọne okpea da sabọ ha talọ yẹ daghe. 23 Ọnan da wo han ene usun ẹbho ilo. Ele da ha yọle: “Ibha riale ọnan iyi Ọmọn nọnsi Devid riọ?” 24 Ene ibhokhan Farisi ki họn ọnan, ele da ha yọle: “Ahu ọsi Biẹzibọb* nin ojie ọsi ene ẹlinmhin-ebe, ọle ọne okpea nan rẹ khu ene ẹlinmhin-ebe fia.” 25 Ranmhude Jesu lẹn ebi ele ria bhi ọkhọle, ọle da taman ele yọle: “Agbaẹbho nọn hi ki rẹ khin nọn imhọn okugbe, dẹ miẹn ugbekhuelo. Sẹyẹ, idunmhun nọn hi ki rẹ khin, la azagba-uwa nọn hi ki rẹ khin nọn imhọn okugbe, dẹ yẹ zagha a. 26 Iriọ yẹ nọn, ahamiẹn ghe Esu ki khu Esu, ọnin rẹman ghe Esu ne egbe ọle suan; be ejele nọnsọle ha ki rẹ mundia yẹ? 27 Sẹyẹ, ahamiẹn ghe Biẹzibọb re ahu nin mẹn rẹ khu ẹlinmhin-ebe dagbare, ahu ọsi ọria nela imọn nesẹbha rẹ khu ẹlinmhin-ebe dagbare? Ọnan zẹle nin ele ha da bhuohiẹn gbe ibha. 28 Sokpan, ahamiẹn ghe ahu ẹlinmhin nọnsi Osẹnobulua imẹn rẹ khu ẹlinmhin-ebe si ẹbho bhi egbe re, ọ rẹman ghe, Agbejele nọnsi Osẹnobulua gene ba bha ku. 29 La, be ọria ha rẹ nabhi uwa ọsi okpea nọn wolo yẹ, sẹyẹ ne emhin ọsi ọne okpea, sade ọle bha ka sabọ gba ọne okpea re ọbhi otọ? Ọle ha lu iriọ, ọle ọkpa ọle ha da sabọ ne emhin nesọle. 30 Ọnọn hi ki rẹ khin nọn iribhi ibo nọnsẹmhẹn, oghian imẹn ọle khin. Ọnọn bha deba imẹn si ẹbho koko, uvẹkua, ọle vẹ ele kua.

31 “Ranmhude ọnan, mẹn taman ibha ghe, olukhọ nọn hi ki rẹ khin nin ọria lu, la ọta ebe nọn hi ki rẹ khin nin ọria tale, a dẹ rẹhunmhan ọlẹn. Sokpan, ọnọn hi ki rẹ khin nọn re unun je ẹlinmhin nọn khiale, a ida rẹhunmhan ọlẹn. 32 Bhi ọsi ijiẹmhin, ọnọn hi ki rẹ khin nọn re unun je Ọmọn nọnsi okpea a dẹ rẹhunmhan ọlẹn, sokpan, ọnọn hi ki rẹ khin nọn rẹ unun je ẹlinmhin nọn khiale, a ida rẹhunmhan ọlẹn. Hiehie, a ida rẹhunmhan ọlẹn bhi ọne agbọn* nan, la bhi agbọn* nọn vade.

33 “Uwẹ ha ji ọne eran ha mhẹn, ikpẹ nesọle ki yẹ ha mhẹn. Uwẹ ha ji ọne eran wowo a, ikpẹ nesọle ki yẹ wowo a, ranmhude, ikpẹ nin eran mọn, ọle a rẹ lẹn ọlẹn. 34 Ibha nin ẹnyẹn ne manman mhọn obi, be ọta nọn mhẹn ha rẹ sabọ ha si ibha bhi unun re yẹ, beji a miẹn ghe, eria ebe bha khin? Ebe vuọn ọria ọkhọle, ọle unun nọnsọle ta dagbare. 35 Emhin esili ne ribhi ọkhọle ọsi ọria nọn mhẹn, ele ọne ọria ne dagbare. Sokpan, emhin ne imhẹn nin ọria nọn imhẹn ne ya bhi ọkhọle nọnsọle, ele ọle ne dagbare. 36 Imẹn taman ibha ghe, a dẹ tie ẹbho ẹzọ bhi ukpẹdẹ ibhuohiẹn bhi ọta ebe rebhe nin ele tale; 37 ranmhude, ọta nin uwẹ tale a ha rẹ tie uwẹ ọria nọn khiale. Sẹyẹ, ọta nin uwẹ tale a ha rẹ tie uwẹ ọria ebe.”

38 Eso bhi ene Farisi bi ene man uhi da ki taman ọlẹn yọle: “Ọman-emhin, lu emhin ọhan-ilo man imhan.” 39 Ọle da ki wanniẹn ele yọle: “Ọne ore nan nọn imhẹn, nọn yẹ fikekegbe Osẹnobulua, wo ha guanọ nan lu emhin ọhan-ilo man ele. Ọkpakinọn, a ida lu emhin ọhan-ilo ọbhebhe man ele gbera ọnọn sunu ji Jona nin akhasẹ. 40 Ranmhude, beji Jona rẹ ha ribhi ẹkẹ ọsi ọne udede ehẹn bhi ikpẹdẹ ea, asọn bi odamhẹn, iriọ Ọmọn nọnsi okpea ha yẹ rẹ ha ribhi ẹkẹ otọ bhi ikpẹdẹ ea, asọn bi odanmhẹn. 41 Ibhokhan Nenivẹ dẹ riọkpanọ bhi ukpẹdẹ ibhuohiẹn, yẹ bhuohiẹn gbe ọne ore nan, ranmhude, ẹghe nin Jona rẹ tẹmhọn Osẹnobulua man ele, ele da fidenọ. Sokpan ghọle! ebe gbera Jona bhọ ribhi enan. 42 Ọne esọn* nọn na obọ ọsi Saot* vae dẹ riọkpanọ bhi ukpẹdẹ ibhuohiẹn, yẹ bhuohiẹn gbe ọne ore nan, ranmhude, eje ree nẹ bhi ọne otọ nan ọle na vae dọ kaehọ ọta ẹwanlẹn ọsi Solomọn. Sokpan ghọle! ebe gbera Solomọn bhọ ribhi enan.

43 “Ahamiẹn ẹlinmhin-ebe sibhi egbe ọsi ọria re, ọne ẹlinmhin-ebe ki ha na ugbẹnẹbubu khian, yẹ guanọ eji ọle ha dia. Ahamiẹn ọle bha miẹn eji ọle ha dia, 44 ọ ki yole, ‘Imẹn dẹ fikie ha khian uwa nin mẹn da ka kpanọ,’ ọle ha ki sẹbhi enin, ọle ki kere ghe, ọria soso iribhi ọne uwa, sẹyẹ, a gbọnọ ijerebhe a, yẹ hẹnhẹn ọlẹn. 45 Ẹghenin, ọle ki kpanọ dọ ne ẹlinmhin-ebe ihinlọn ne kaka nẹ ọle rẹkhan egbe. Ele ha ki nabhi ẹkẹ ọne uwa, ele ki ha nyẹnlẹn bhi enin. Idia nin ọne okpea ki da ha ye, ọle ha ki khọ gbera ọne ọle ka rẹ ha ye. Ọnan hi ebe ha yẹ sunu ji ọne ore nan nọn imhẹn.”

46 Ẹghe nin ọle rẹ sẹyẹ ha ne ene usun ẹbho talọ, inẹn ọlẹn bi ibhio ọle nin ikpea da ha ribhi olele, ele da ha guanọ nin ele nanlẹn talọ. 47 Ọria da ki taman ọlẹn yọle: “Ghọle! inẹn ẹn bi ibhio ẹ nin ikpea ribhi olele, ele guanọ nin ele ne uwẹ talọ.” 48 Ọle ki da wanniẹn ọnọn nanlẹn talọ yọle: “Họla hi inẹn imẹn, hela hi ibhio imẹn nin ikpea?” 49 Ọle ki niẹn obọ da edibo nesọle, ọle da yọle: “Ghe inẹn imẹn bi ibhio imẹn nin ikpea! 50 Ranmhude, ọria nọn hi ki rẹ khin nọn lu iho nọnsi Aba imẹn nọn ribhi okhun, ọle hi obhio imẹn nin okpea, ọle hi obhio imẹn nin okhuo, ọle yẹ hi inẹn imẹn.”