Kọrint Nin Ọhẹnhẹn

10 Ibhio, mẹn guanọ nin bha yere ghe odotọ adudu amẹn, ọle aba mhan nin ẹdẹlẹ ha ye, sẹyẹ, ele rebhe na okpẹdẹ gbera. 2 Ele rebhe da mianmẹn rẹ kugbe deba Mozis, ẹghe nin ele rẹ na bhi odotọ adudu amẹn bi ẹkẹ okpẹdẹ gbera. 3 Ele rebhe le ọne ebale nọn na obọ Osẹnobulua vae. 4 Ele rebhe da yẹ wọn bhi ọne amẹn nọn na obọ Osẹnobulua vae. Ọne udo nọn rẹkhan ele, ọle ele da ha wọn amẹn. Obọ Osẹnobulua ọne udo na vae. Ọne udo mundia nin Kristi. 5 Ọkpakinọn, ene bunbun bha lu ebe yẹẹ Osẹnobulua. Ranmhude ọnan, ọle da gbono ele a bhi ẹkẹ ojẹgbo.

6 Mhan dẹ miẹn emhin luẹ bhi ene emhin nan ne sunu ji ele, ghe ọ bha khẹke nin mhan ha khu ọbhi emhin ne imhẹn beji ele lu. 7 Ọ bha khẹke nin mhan ha ga ẹbọ beji eso bhi ẹwẹ ele lu. Ebenọnkhiale da yọle: “Ele da dotua ha da yẹ le. Ele ki lu ọnin fo, ele da kpanọ ha duje.” 8 Ọ bha khẹke nin mhan ha gboghẹ,* beji eso bhi ẹwẹ ele lu, nọn zẹ nin a da gbono itue uli ea nyan uje* bhi ẹwẹ ele a bhi ukpẹdẹ ọkpa. 9 Ọ bha khẹke nin mhan dọnmhẹn Jehova* beji eso bhi ẹwẹ ele lu, nọn zẹle nin ẹnyẹn da gbono ele a. 10 Ọ bha khẹke nin mhan ha guinẹzọ beji eso bhi ẹwẹ ele lu, nọn zẹle nin ẹhi da fuẹn ele a. 11 Ene emhin nan ne sunu ji ele da ha yi ijiẹmhin rẹji mhan. A da gbẹn ele ọbhi otọ nan rẹ sekha nin mhan ne nyẹnlẹn bhi ẹghe ọkpẹnlẹn ọsi ọne agbọn nan.

12 Ọria nọn hi ki rẹ khin nọn riale ghe ọle mundia nọnsẹn mhọn ẹwanlẹn, beji a da miẹn ghe ọle bha dere. 13 A bha miẹn edọnmhẹn nin bha ha miẹn bhi egbe nin ẹbho bha sẹ ka miẹn khẹ. Ọkpakinọn, Osẹnobulua dẹ mun ọta nọnsọle sẹ. Ọle ida ji bha da miẹn edọnmhẹn nin bha ida sabọ ziẹngbe ọle. Bha ha miẹn edọnmhẹn bhi egbe, ọle ki rẹkpa bha rẹ sabọ ziẹngbe ọle.

14 Bhiriọ, ibhio mẹn nin mẹn hoẹmhọnlẹn, bha re egbe nẹ bhi igẹbọ. 15 Mẹn ne ibha talọ bọsi eria ne wanlan. Bha re ọkhọ bha rẹ ria ẹmhọn ebi mẹn taman ibha. 16 Mhan ha wọn bhi ọne ukpu anyọn nin mhan nan erọnmhọn ọi, ọ ibe yi aranlẹn ọsi Kristi mhan da gha zẹ? Mhan ha le ọne ibrẹd nin mhan khuẹnẹn an, ọ ibe yi egbe nọnsi Kristi mhan da gha zẹ? 17 Osuọ ibrẹd ọkpa, ọle ribhọ. Bhiriọ, arẹmiẹn mhan bun, egbe ọkpa mhan khin, ranmhude, ọne osuọ ibrẹd ọkpa nin, ọle mhan rebhe da gha zẹ.

18 Ria ẹmhọn ibhokhan Izrẹl. Ele ha le bhi ene emhin nan rẹ ze, ebi a rẹ ze bhi ukhuo-izọese ele da gha zẹ. 19 Mẹn ki be re ọnan yọle ghe ẹbọ mhọn ebi ọ khin? La, ebi a rẹ ze ji ẹbọ mhọn ebi ọ khin? 20 Eye; ọkpakinọn, ebi ene ẹbho rẹ ze ji ẹbọ, ẹlinmhin-ebe ele re ọle ze je, ọ iyi Osẹnobulua. Mẹn bha guanọ nin bha bi ẹlinmhin-ebe ha mhọn ọne ibha ko ye. 21 Bha ida sabọ ha da bhi ukpu nọnsi Jehova* yẹ ha da bhi ukpu ọsi ẹlinmhin-ebe. Sẹye, bha ida sabọ ha le ebale bhi uke “itebu ọsi Jehova”* yẹ le bhi uke itebu ọsi ẹlinmhin-ebe. 22 La imhan be guanọ nin mhan re Jehova* ha mhọn ikhu? Mhan be wo nẹ ọle?

23 Mhan dẹ sabọ lu emhin nọn hi ki rẹ khin nọn ghọn mhan, ọkpakinọn, ọ iyi emhin rebhe elele ye. Mhan dẹ sabọ lu emhin nọn hi ki rẹ khin nọn ghọn mhan, ọkpakinọn, ọ iyi emhin rebhe ha bọn ọria okhun. 24 Bha ji mhan ha khu ọbhi ọmhẹn ọsi eria ọbhebhe, ọ iyi ọsi egbe mhan.

25 Bha le elanmhẹn nọn hi ki rẹ khin nan khiẹn bhi ẹki. Ọkhọle nọnsẹbha ida kpokpo ibha, sade bha zẹle nin bha rẹ le ọle, 26 ranmhude, “Jehova* nyan ọne otọ nan bi emhin rebhe ne ribhọ.” 27 Ọria nọn iga Osẹnobulua ha tie uwẹ nin uwẹ dọ le ebale, nin uwẹ da zẹ nin uwẹ rẹ yo, le ebale nọn hi ki rẹ khin nin ọle mun nin uwẹ. Hẹi ha nọọn ọta nin ọkhọle hẹi dọ ha kpokpo uwẹ. 28 Ọkpakinọn, ọria ha taman uwẹ yole: “Elanmhẹn nan rẹ ze nin ẹbọ khọnan,” hẹi le ọle, nin uwẹ hẹi dọ wẹghẹ urẹọbhọ ọsi ọne ọria nin an, yẹ re ọkhọle ha kpokpo ọle. 29 Ọkhọle ọsi ọne ọria imẹn tẹmhọnlẹn, ọ iyi ọkhọle nọnsẹ. Mẹn bha guanọ nin ọkhọle dọ ha kpokpo ọria ọbhebhe ranmhude imẹn noo isẹhoa nin mẹn mhọnlẹn. 30 Aharẹmiẹn ghe mẹn dẹ sabọ nan erọnmhọn ọbhi ebale nọn hi ki rẹ khin nọn yẹ mẹn yẹ le ọle, mẹn ida lu iriọ sade ọ dẹ re ẹbho ha re unun riia mẹn an.

31 Bhiriọ, aharẹmiẹn ebale bha le, la anyọn bha da, la emhin ọbhebhe bha lu, ọkhẹke nin bha lu ọle bhi uwedẹ nọn ha re uyi ji Osẹnobulua. 32 Hẹi kiẹn idobolo rẹji ọria soso, ọ ha rẹ ha yi ibhokhan Ju la ibhokhan Grik, la ene ribhi agbotu nọnsi Osẹnobulua. 33 Bhi emhin rebhe nin mẹn lu, mẹn yẹ wo ha dọnmhegbe nin mẹn rẹ lu emhin nọn ha ti ẹbho rebhe bhọ. Ọ iyi ebe ha mhẹn mẹn bhi egbe mẹn guanọ, ọkpakinọn, ebe ha mhẹn nin ẹbho nekẹle mẹn khu ọi, beji ele ha da sabọ miuhọnmhọn.